SS Rajamouli: ‘మహేశ్ బాబుతో సినిమా గురించి అప్‍డేట్ చెప్పండి’: కర్ర పట్టుకున్న రాజమౌళి: వీడియో

దర్శక ధీరుడు ఎస్ఎస్ రాజమౌళి, సూపర్ స్టార్ మహేశ్ బాబు (SSMB29) కాంబినేషన్‍లో ఓ గ్లోబల్ రేంజ్ మూవీ రానుంది. ఆర్ఆర్ఆర్ చిత్రంతో ప్రపంచవ్యాప్తంగా రాజమౌళి పాపులర్ అయ్యారు. దీంతో మహేశ్‍తో మూవీకి గ్లోబల్ రేంజ్ టార్గెట్ పెట్టుకున్నారు. అయితే, ఈ చిత్రం షూటింగ్ ఎప్పుడు మొదలవుతుందనే ఆసక్తి సినీ ప్రేక్షకుల్లో ఉంది. ఈ సినిమా అప్‍డేట్ల గురించి అడిగితే శ్రీసింహను కర్ర తీసుకొని కొట్టేందుకు వచ్చారు రాజమౌళి. ఆ వివరాలు ఇవే.

మత్తువదలరా 2 కోసం..

రాజమౌళి అన్న స్టార్ మ్యూజిక్ డైరెక్టర్ ఎంఎం కీరవాణి కుమారుడు శ్రీసింహ హీరోగా ‘మత్తువదలరా 2’ వస్తోంది. సెప్టెంబర్ 13వ తేదీన ఈ చిత్రం రిలీజ్ కానుంది. 2019లో వచ్చి మంచి హిట్ అయిన మత్తువదలరాకు సీక్వెల్‍గా ఈ మూవీ వస్తోంది. మత్తువదలరా 2 కోసం రాజమౌళితో ఓ ప్రమోషనల్ వీడియో చేసింది మూవీ టీమ్.

బాహుబలి 2కు ఎందుకు చేశారు?

మత్తువదలరా 2కు సంబంధించిన పనులు అయిపోయాయని, రిలీజ్‍కు ముందు గట్టిగా సౌండ్ చేయాలని హీరో శ్రీసింహతో మ్యూజిక్ డైరెక్టర్ కాలభైరవ అన్నారు. మనం సౌండ్ చేయాల్సిందని ఇక్కడ కాదని, చెబుతా పదా అని రాజమౌళి ఉండే చోటికి శ్రీసింహ, కాలభైరవ వెళతారు. దొంగతనం, తస్కరించుట అంటూ ఆ ఇద్దరూ వాదించుకుంటారు.

దీంతో ఇంట్లో నుంచి రాజమౌళి కుమారుడు కార్తికేయ బయటికి వస్తారు. ఆ గోలేంటి లోపల రాజమౌళి డిస్ట్రబ్ అవుతారని అంటారు. తమకు రిలీజ్ టెన్షన్‍గా ఉందని, ప్రమోషన్స్ గట్టిగా చేయాలి కదా అని శ్రీసింహ చెబుతారు. ప్రీప్రొడక్షన్ జరుగుతుంటే ప్రమోషన్లు ఏంటని ఎస్ఎస్ఎంబీ27ను ఉద్దేశించి కార్తికేయ అంటారు. అంటే తాము మాట్లాడుతున్నది మత్తువదలరా 2 గురించి అని కాలభైరవ గుర్తు చేస్తారు. అప్పుడప్పుడు తమ టైర్ గురించి కూడా ఆలోచించాలని చెబుతారు. దీంతో ‘ఏ.. టైర్ పంచర్ అయిందా” అని పంచ్ వేశారు కార్తికేయ.

మత్తువదలా 2కు ప్రమోషన్లు ఎందుకు.. సినిమా వస్తుందని చెబితే ప్రేక్షకులు వచ్చేస్తారని కార్తికేయ అన్నారు. దీంతో బాహుబలి 2కు అన్ని ప్రమోషన్లు ఎందుకు చేశారని శ్రీసింహ అన్నారు. “మరి మీరు బాహుబలి 2కు అన్ని ఊర్లు ఎందుకు తిరిగారు.. అన్ని ప్రమోషన్లు ఎందుకు చేశారు” అని చెప్పారు.

ఫైర్ అయిన రాజమౌళి

ఈ ముగ్గురు మాట్లాడుకుంటూ ఉంటే రాజమౌళి కూడా ఇంట్లో నుంచి బయటికి వచ్చారు. ఏంటి ఈ గోల పని చేసుకోనివ్వరా అంటూ చిరాకు పడ్డారు. ముందు తమ పని అయ్యాక అని శ్రీసింహ అంటే .. ఏంటా పని అని రాజమౌళి ప్రశ్నించారు. మత్తువదలరా 2 కోసం సౌండ్ చేయాలని, లేకపోతే తాము సౌండ్ ఆపమని శ్రీసింహ అన్నారు. “డిమాండ్ ఎక్కువైపోయింది రా” అని రాజమౌళి వెటకారంగా అన్నారు. “సెప్టెంబర్ 13న మత్తువదలరా 2.. థియేటర్లకు వచ్చేయండి.. చాలా” అని చెప్పారు.

వెళ్లే ముందు ఎస్ఎస్ఎంబీ అప్‍డేట్ ఏమైనా ఇవ్వాలని రాజమౌళిని శ్రీసింహ అడిగారు. దీంతో ఇక్కడ కర్ర ఉండాలని రాజమౌళి అంటే.. చిన్నది ఇచ్చారు సింహ. దీంతో పక్కనే ఉన్న పెద్ద కర్ర తీసుకొని బెదిరించారు రాజమౌళి. “అప్‍డేట్లు కావాలంట… అప్‍డేట్లు” అంటూ చిరాకుగా లోపలికి వెళ్లిపోయారు. ఈ వీడియో సరదాగా ఉంది.

మత్తువదలరా 2 కోసం చేసిన ఈ ప్రమోషనల్ వీడియో సోషల్ మీడియాలో వైరల్ అవుతోంది. ఈ క్రైమ్ కామెడీ మూవీలో శ్రీసింహ, సత్య, ఫారియా అబ్దుల్లా లీడ్ రోల్స్ చేశారు. ఈ చిత్రానికి రితేశ్ రానా దర్శకత్వం వహించారు. ఇటీవలే పాన్ ఇండియా రెబల్ స్టార్ ప్రభాస్ చేతుల మీదుగా ఈ మూవీ ట్రైలర్ రిలీజ్ అయింది. అప్పుడు చేసిన వీడియో కూడా నవ్వించింది. సెప్టెంబర్ 13న ఈ చిత్రం ప్రేక్షకుల ముందుకు రానుంది.