Varun Tej on OG Movie: ఓజీపై మరింత హైప్ పెంచిన వరుణ్ తేజ్.. ‘ఎన్ని రోజులు వెయిట్ చేసినా..’

పవర్ స్టార్ పవన్ కల్యాణ్ హీరోగా రావాల్సిన ఓజీ చిత్రంపై సినీ ప్రేక్షకుల్లో హైప్ ఓ రేంజ్‍లో ఉంది. ఒక్క గ్లింప్స్‌తోనే ఈ చిత్రంపై అంచనాలు ఆకాశానికి చేరాయి. మోస్ట్ అవైటెడ్ చిత్రాల్లో ముందు వరుసగా నిలిచింది. ఓజీ మూవీకి సుజీత్ దర్శకత్వం వహిస్తున్నారు. ఏపీ ఎన్నికలు, ఆ తర్వాత డిప్యూటీ సీఎంగా పవన్ పదవి చేపట్టడంతో ఓజీకి బ్రేక్‍లు పడ్డాయి. ఇటీవలే షూటింగ్ మళ్లీ షూటింగ్స్ స్టార్ట్ చేసిన పవన్.. ముందుగా హరి హర వీరమల్లు చిత్రాన్ని పూర్తి చేసేందుకు నిర్ణయించారు. దీంతో ఓజీ కోసం మరింత ఎక్కువ కాలం నిరీక్షించాల్సి ఉంది.

ఓజీ మూవీ టీమ్‍లోని వారితో పాటు మెగా ఫ్యామిలీలో ఎవరు ఏ సినిమా ఈవెంట్లలో పాల్గొన్నా ‘ఓజీ.. ఓజీ’ అంటూ ప్రేక్షకులు మోతెక్కిస్తున్నారు. కొన్ని సందర్భాల్లో రెస్పాన్స్ కూడా వస్తోంది. మెగా ప్రిన్స్ వరుణ్ తేజ్ హీరోగా నటించిన మట్కా మూవీ టీజర్ లాంచ్ కోసం నేడు (అక్టోబర్ 5) ఈవెంట్ జరిగింది. ఈ కార్యక్రమంలోనూ ఓజీ గురించి ఫ్యాన్స్ అడగటంతో వరుణ్ స్పందించారు.

ఊహలకు అందనట్టు..

ఎన్ని రోజులు వేచి చూసినా ఊహలకు అందనట్టు ఓజీ చిత్రం ఉంటుందని వరుణ్ తేజ్ అన్నారు. తాను ముందే ఈ మూవీ కథ కొంచెం విన్నానని చెప్పారు. “ఆ కథ బాబాయ్ (పవన్ కల్యాణ్) కన్నా ముందే ఒకసారి నేనే విన్నా. మీరు ఎన్ని రోజులు వెయిట్ చేసినా మీ ఊహలకు అందనట్టు ఉంటుంది ఆ సినిమా. అదిరిపోతుంది. బాబాయ్ బిజీగా ఉన్నారు కాబట్టి కొంచెం టైమ్ పడుతుంది. మీరు కూల్‍గా వెయిట్ చేస్తే అయిపోతుంది” అని వరుణ్ అన్నారు.

ఓజీపై ఇప్పటికే హైప్ విపరీతంగా ఉండగా.. వరుణ్ తేజ్ కామెంట్స్ మరింత పెంచాయి. ఇప్పటికే ఈ మూవీలో నటిస్తున్న కొందరు నటీనటులు, టెక్నిషియన్లు ఈ చిత్రంపై గొప్పగా చెప్పారు.

కాగా, వరుణ్ తేజ్ హీరోగా నటించిన మట్కా చిత్రం నవంబర్ 14వ తేదీన థియేటర్లలో రిలీజ్ కానుంది. ఈ క్రమంలో నేడు టీజర్ వచ్చింది. ఇంటెన్స్‌గా, పవర్‌ఫుల్‍గా ఈ టీజర్ ఉంది. డిఫరెంట్ గెటప్‍ల్లో వరుణ్ తేజ్ అదరగొట్టారు. 1958-80ల మధ్య విశాఖపట్నం బ్యాక్‍డ్రాప్‍లో మట్కా మూవీ సాగుతుంది. ఈ చిత్రానికి కరుణ్ కుమార్ దర్శకత్వం వహించారు. జీవీ ప్రకాశ్ కుమార్ ఈ మూవీకి సంగీతం అందిస్తున్నారు. మట్కా మూవీని వైరా ఎంటర్‌టైన్‍మెంట్స్, ఎస్ఆర్‌టీ ఎంటర్‌టైన్‍మెంట్స్ పతాకాలు ప్రొడ్యూజ్ చేస్తున్నాయి.

రీసెంట్‍గా థమన్ కూడా..

ఓజీ సినిమా గురించి తాజాగా ట్వీట్ చేశారు మ్యూజిక్ డైరెక్టర్ థమన్. తమ నుంచి బ్లాక్‍బస్టర్ ఇండస్ట్రీ హిట్ రానుందంటూ పోస్ట్ చేశారు. ఓజీ గురించి అప్‍డేట్స్ ఇవ్వాలని ఫ్యాన్స్ అడుగుతుండటంతో థమన్ రియాక్ట్ అయ్యారు. ఓజీ అప్‍డేట్లు త్వరలో వస్తాయని తెలిపారు. సుజీత్ అదరగొడతారని అన్నారు. డీవీవీ ఎంటర్‌టైన్‍మెంట్ బ్యానర్‌కు ఇది అతి పెద్ద సినిమా అవుతుందని థమన్ రాసుకొచ్చారు. ఈ ట్వీట్ పిన్ చేసుకోవాలని, అప్‍డేట్లతో కలుద్దామంటూ ట్వీట్ ముగించారు.