OTT Crime Thriller: మూడు నెలల తర్వాత ఓటీటీలోకి వస్తున్న బిగ్ బాస్ ఫేమ్ క్రైమ్ థ్రిల్లర్ మూవీ.. స్ట్రీమింగ్ డేట్ ఇదే

OTT Crime Thriller: బిగ్ బాస్ తెలుగు 7తో పేరు తెచ్చుకున్న అర్జున్ అంబటి నటించిన మూవీ తెప్ప సముద్రం. ఈ సినిమా ఏప్రిల్ 19న థియేటర్లలో రిలీజ్ కాగా.. ఇప్పుడు మూడున్నర నెలల తర్వాత ఓటీటీలోకి వస్తోంది. అర్జున్ అంబటితోపాటు చైతన్య రావు కూడా లీడ్ రోల్ పోషించిన ఈ సినిమాను సతీష్ రాపోల్ డైరెక్ట్ చేశాడు. ఇప్పుడీ మూవీ ఆహా ఓటీటీలో స్ట్రీమింగ్ కానుంది.

తెప్ప సముద్రం ఓటీటీ రిలీజ్ డేట్

తెప్ప సముద్రం మూవీ వచ్చే శనివారం (ఆగస్ట్ 3) నుంచి ఆహా ఓటీటీలో స్ట్రీమింగ్ కానుంది. ఈ విషయాన్ని మంగళవారం (జులై 30) సదరు ఓటీటీ తన అధికారిక ఎక్స్ అకౌంట్ ద్వారా వెల్లడించింది. "సుడిగుండాల సముద్రంలో తెప్ప తీరం దాటేనా? తెప్ప సముద్రం మీ ఆహాలో వస్తోంది.. తెప్ప సముద్రం ఆగస్ట్ 3న కేవలం ఆహా ఓటీటీలో స్ట్రీమింగ్ కానుంది" అనే క్యాప్షన్ తో స్ట్రీమింగ్ విషయాన్ని వెల్లడించింది.

ఏంటీ తెప్ప సముద్రం మూవీ?

అర్జున్ అంబటి, చైతన్య రావు నటించిన తెప్ప సముద్రం మూవీ ఓ మర్డర్ మిస్టరీ. చిన్నారులపై అత్యాచారం, హత్య చేసే ఓ సైకో కిల్లర్ కథే ఈ తెప్ప సముద్రం మూవీ. తెలంగాణలోని తెప్ప సముద్రం అనే ఊళ్లో తరచూ చిన్నారులు మాయం కావడం, తర్వాత హత్యకు గురవడం, ఆ హత్యలు ఎవరు చేస్తున్నారనే విషయం తెలుసుకోవడానికి ఓ పోలీస్ అధికారి, ఓ రిపోర్టర్, ఓ ఆటో డ్రైవర్ చేసే ప్రయత్నం చుట్టూ కథ తిరుగుతుంది.

తెప్ప సముద్రం మూవీ ఏప్రిల్ 19న థియేటర్లలో రిలీజైంది. మర్డర్ మిస్టరీ, క్రైమ్ థ్రిల్లర్ జానర్ లో తీసిన ఈ సినిమాలో ఆ హత్యలు చేసే సైకో కిల్లర్ ఎవరు అన్నది చివరి దాకా తెలియకుండా దర్శకుడు ఆసక్తికరంగా చిత్రీకరించాడు. ఈ సినిమాలో గణేష్ అనే ఎస్సై పాత్రలో చైతన్య రావు, విజయ్ అనే ఆటో డ్రైవర్ పాత్రలో అర్జున్ అంబటి, ఇందు అనే రిపోర్టర్ పాత్రలో కిశోరి ధాత్రిక్ నటించారు.

ఓ రొటీన్ లవ్ స్టోరీగా మూవీ ప్రారంభమై.. తర్వాత వరుస హత్యలు, దానిపై ఎస్సై గణేష్ చేసే ఇన్వెస్టిగేషన్ తో మూవీ ఆసక్తికరంగా మారుతుంది. సస్పెన్స్, మిస్టరీ సినిమాలకు అవసరమైన ట్విస్టులు కూడా ఇందులో బాగానే ఉన్నాయి. చివరి వరకు కిల్లర్ ఎవరన్నది తెలియకుండా కథను ఆసక్తిగా నడపడం మాటలు కాదు. అందులో దర్శకుడు కొంత వరకు సక్సెస్ అయ్యాడు.

ఈ సినిమాలో నటించిన అర్జున్ అంబటి.. బిగ్‌బాస్ తెలుగు సీజ‌న్ 7లో కంటెస్టెంట్‌గా పాల్గొని ఆరో స్థానంలో షో నుంచి బ‌య‌ట‌కు వ‌చ్చాడు. ఫైన‌ల్ చేరుకున్న అత‌డు చివ‌ర‌లో ఓటింగ్ లో వెనుక‌బ‌డ్డాడు. బిగ్‌బాస్ కంటే ముందు తెలుగులో ప‌లు సీరియ‌ల్స్‌, సినిమాల్లో అర్జున్ అంబాటి కీల‌క పాత్ర‌లు పోషించాడు. అటు చైతన్య రావు కూడా షరతులు వర్తిస్తాయి, కీడాకోలా, అన్నపూర్ణ ఫొటో స్టూడియోలాంటి సినిమాలతో మంచి పేరు సంపాదించాడు.