Nani on Jai Bhim: ‘జైభీమ్’ మూవీకి అవార్డు రాకపోవటంతో హర్ట్ అయిన నాని!: వివరాలివే

Nani on Jai Bheem: 69వ జాతీయ చలనచిత్ర అవార్డులను కేంద్ర ప్రభుత్వం గురువారం ప్రకటించింది. 2021కు గాను పురస్కరాలను వెల్లడించింది. తెలుగు చిత్రాలకు ఏకంగా 10 జాతీయ అవార్డులు వచ్చాయి. జాతీయ ఉత్తమ నటుడి అవార్డు ఐకాన్ స్టార్ అల్లు అర్జున్‍కు లభించింది. ఆర్ఆర్ఆర్ చిత్రానికి ఆరు జాతీయ పురస్కారాలు దక్కాయి. ఇక, నేషనల్ అవార్డులు గెలుచుకున్న వారికి టాలీవుడ్ నేచురల్ స్టార్ నాని అభినందనలు తెలిపారు. అయితే, ‘జై భీమ్’ సినిమాకు ఏ విభాగంలోనూ అవార్డు రాకపోవటంతో నిరాశ చెందాననేలా సంకేతం ఇచ్చారు. ఆ వివరాలు ఇవే.

జాతీయ అవార్డులు గెలుచుకున్న వారిని అభినందిస్తూ ఇన్‍స్టాగ్రామ్ స్టోరీ పోస్ట్ చేశారు నాని. “జాతీయ అవార్డులు గెలిచిన వారందరికీ అభినందనలు. అన్ని అర్హతలు ఉన్న తెలుగు సినిమా సత్తాచాటింది. ఆర్ఆర్ఆర్, పుష్ప, ఉప్పెన టీమ్‍లతో పాటు తెలుగు సినిమా నుంచి, ఇతర సినీ ఇండస్ట్రీల నుంచి జాతీయ అవార్డులు దక్కించుకున్న వారందరికీ కాంగ్రాచులేషన్స్. తెలుగు సినిమా నుంచి తొలిసారి ఉత్తమ జాతీయ నటుడి అవార్డును బన్నీ (అల్లు అర్జున్) గెలుచుకోవడం మరింత ప్రత్యేకం” అని నాని ఇన్‍స్టాగ్రామ్ స్టోరీ పోస్ట్ చేశారు. ఇదే క్రమంలో జై భీమ్ గురించి కూడా పేర్కొన్నారు.

జైభీమ్ అని టైప్ చేసి పక్కన బద్దలైన హార్ట్ ఎమోజీని ఉంచారు నాని. అంటే జైభీమ్ చిత్రానికి ఒక్క జాతీయ అవార్డు కూడా రానందుకు నాని హర్ట్ అయినట్టు సంకేతాలు ఇచ్చారు. సూర్య హీరోగా నటించిన ‘జైభీమ్’ సినిమాపై తనకు ఉన్న ఇష్టాన్ని నాని గతంలో కొన్నిసార్లు చెప్పారు. రవితేజతో ఓ ఇంటర్వ్యూ సందర్భంగా కూడా ఆ సినిమా ప్రస్తావన తెచ్చారు. రవితేజతో బైభీమ్ లాంటి చిత్రం చేస్తే నిర్మాతగా తనకు అత్మసంతృప్తి కలుగుతుందని నాని అప్పట్లో అన్నారు. అయితే, తనకు అంత నచ్చిన సినిమాకు ఒక్క కేటగిరీలోనూ నేషనల్ అవార్డు రాకపోవటంతో నాని హర్ట్ అయినట్టు అర్థమవుతోంది.

నాని హీరోగా నటించిన ‘శ్యామ్ సింగరాయ్’ చిత్రం కూడా 2021లోనే రిలీజ్ అయింది. ఈ సినిమాకు కూడా ఒక్క జాతీయ అవార్డు కూడా రాలేదు. ఉత్తమ నటిగా ఈ చిత్రానికి గాను సాయిపల్లవికి పురస్కారం దక్కుతుందని అంచనాలు వేసినా అలా జరగలేదు. అయితే, తన చిత్రానికి అవార్డు రానందుకు అసంతృప్తి వ్యక్తం చేయని నాని.. జైభీమ్ విషయంలో మాత్రం నిరుత్సాహం చెందారు.

ప్రముఖ న్యాయవాది చంద్రు జీవితం ఆధారంగా జై భీమ్ సినిమా రూపొందింది. చంద్రు పాత్రను తమిళ స్టార్ హీరో సూర్య పోషించారు. తమిళంలో రూపొందిన ఈ సినిమా తెలుగుతో పాటు మరిన్ని భాషల్లో డబ్ అయింది. 2021లో కరోనా ప్రభావం ఉండడంతో నేరుగా అమెజాన్ ప్రైమ్ వీడియో ఓటీటీలో జైభీమ్ నేరుగా రిలీజ్ అయింది. ఈ సినిమాకు దేశవ్యాప్తంగా ప్రశంసలు దక్కాయి. సూర్య నటన సహా అన్ని విషయాల్లో జైభీమ్ ఆకట్టుకుంది. ఆలోచింపజేసింది. అందరితో ప్రశంసలను దక్కించుకుంది. దీంతో ఈ చిత్రానికి జాతీయ చలన చిత్ర అవార్డులు వస్తాయని చాలా మంది అంచనాలు వేశారు. అయితే, ఈ సినిమాకు ఏ విభాగంలోనూ పురస్కారం రాలేదు.