Nani 31: నాని - వివేక్ ఆత్రేయ సినిమా టైటిల్ ఇదేనా! దసరా రోజున ముహూర్తం

Nani 31: నేచురల్ స్టార్ నాని వరుస సినిమాలతో జోరు మీద ఉన్నారు. ఆయన హీరోగా నటించిన పాన్ ఇండియా మూవీ ‘హాయ్ నాన్న’ డిసెంబర్ 7న రిలీజ్ కానుంది. అయితే, ఈ క్రమంలో మరో సినిమాకు నాని సిద్ధమయ్యారు. వివేక్ అత్రేయ దర్శకత్వంలో మూవీ చేయనున్నారు. నాని - వివేక్ కాంబినేషన్‍లో గతేడాది వచ్చిన ‘అంటే సుందరానికి’ సినిమా మంచి విజయం సాధించింది. ప్రేక్షకులకు నవ్వులు పంచింది. విభిన్నమైన స్క్రీన్‍ప్లేతో ఆకట్టుకున్నారు వివేక్. ఇప్పుడు మరోసారి నాని - వివేక్ ఆత్రేయ కాంబినేషన్ రిపీట్ అవుతోంది. ఈ చిత్రానికి (Nani 31) సంబంధించి నేడు (అక్టోబర్ 21) అధికారిక ప్రకటన చేసింది డీవీవీ ఎంటర్‌టైన్‍మెంట్. ఆ వివరాలివే..

నాని - వివేక్ ఆత్రేయ కాంబినేషన్ మళ్లీ వచ్చేస్తోందంటూ డీవీవీ ఎంటర్‌టైన్‍మెంట్ నేడు ప్రకటించింది. ఈ చిత్రాన్ని డీవీవీ దానయ్య నిర్మించనున్నారు. దసరా పండుగ అయిన అక్టోబర్ 24న ఈ సినిమా ముహూర్తం ఉంటుందని ప్రకటించింది. అంటే, ఆ రోజు పూజా కార్యక్రమాలు జరగనున్నాయి. అలాగే, అంతకంటే ఒకరోజు ముందు అక్టోబర్ 23న అన్‍చైన్డ్ అని పేర్కొంది. అంటే ఏవైనా వివరాలు ప్రకటించే అవకాశం ఉంది. నానికి ఈ సినిమా 31వ చిత్రంగా ఉంది.

నాని - వివేక్ ఆత్రేయ సినిమాకు ఇప్పటికే టైటిల్ ఖరారైనట్టు సమాచారం బయటికి వచ్చింది. ఈ విషయంలో లీకులు వచ్చాయి. ఈ చిత్రానికి ‘సరిపోదా శనివారం’ అనే టైటిల్‍ను ఫిక్స్ చేసినట్టు తెలుస్తోంది. ఈ విషయాన్ని అక్టోబర్ 24న మూవీ యూనిట్ ప్రకటించే అవకాశం ఉంది.

ఇక, Nani 31 చిత్రంలో నాని సరసన ప్రియాంక మోహన్ హీరోయిన్‍గా ఫిక్స్ అయ్యారని తెలుస్తోంది. గ్యాంగ్ లీడర్ తర్వాత వీరిద్దరూ మళ్లీ కలిసి నటించనున్నారు. ఇక ఈ సినిమాలో విలన్ పాత్ర కోసం ఎస్‍జే సూర్యతో మూవీ యూనిట్ చర్చలు జరుపుతోంది. నాని - వివేక్ కాంబోలో రానున్న ఈ మూవీ ఈసారి యాక్షన్ డ్రామాగా ఉంటుందని తెలుస్తోంది. అనిరుధ్ రవిచందర్, జీవీ ప్రకాశ్ కుమార్‌ల్లో ఒకరు ఈ సినిమాకు సంగీతం అందించే అవకాశం ఉందని టాక్.