Pawan Kalyan OG: పవన్ కల్యాణ్ ఓజీలో ఛాన్స్ కొట్టేసిన ఫోక్ సింగర్.. మ్యూజిక్ డైరెక్టర్ తమన్ షాకింగ్ అనౌన్స్‌మెంట్

Pawan Kalyan OG: పవన్ కల్యాణ్ సినిమాలో నటించడం కాదు కదా ఏ రకంగా అవకాశం వచ్చినా చాలని అనుకునే వాళ్లు ఎంతో మందే ఉంటారు. కానీ ఆ అదృష్టం ఓ జానపద సింగర్ కు అనుకోని వరంలా వచ్చి పడింది. దీనికి కారణం మ్యూజిక్ డైరెక్టర్ తమన్. ఆహాలో వస్తున్న ఇండియన్ ఐడల్ సీజన్ 3 స్టేజ్ పై పాడిన ఆమెకు.. అప్పటికప్పుడు తన సినిమాలో అతడు అవకాశం ఇవ్వడం గమనార్హం.

ఓజీలో పాడనున్న లక్ష్మి

ఆహా ఓటీటీలో వస్తున్న ఇండియన్ ఐడల్ సీజన్ 3 చూస్తున్నారా? ఈ సింగింగ్ రియాల్టీ షోకి మ్యూజిక్ డైరెక్టర్ తమన్ తోపాటు సింగర్లు గీతా మాధురి, కార్తీక్ జడ్జీలుగా ఉండగా.. మరో సింగర్ శ్రీరామచంద్ర హోస్ట్ చేస్తున్నాడు. ఈ షోలో 12 మంది సింగర్లు విజేతగా నిలవడానికి పోటీ పడుతున్నారు. మూడో సీజన్ ఎంతో రంజుగా సాగుతున్న వేళ ఓ జానపద సింగర్ ఈ స్టేజ్ పై పాట పాడింది. ఓ పల్లె పాటతో అదరగొట్టింది.

ఆమె పేరు లక్ష్మి. ఈ సీజన్లో ప్రత్యేకంగా నిలుస్తున్న ఆమెకు తాను మ్యూజిక్ కంపోజ్ చేస్తున్న, పవన్ కల్యాణ్ నటిస్తున్న ఓజీ మూవీలో అవకాశం ఇస్తున్నట్లు అనౌన్స్ చేసి తమన్ ప్రతి ఒక్కరినీ షాక్ కు గురి చేశాడు. ఈ అనౌన్స్‌మెంట్ లక్ష్మినే కాదు.. అక్కడున్న మిగిలిన కంటెస్టెంట్లు, జడ్జీలు, అభిమానులను ఆశ్చర్యానికి గురి చేసింది. "అమ్మా ఇది మా టోకెన్ అడ్వాన్స్.. మీరు మా ఓజీ సినిమాలో పాట పాడాలి" అని తమన్.. లక్ష్మి చేతిలో కొంత మొత్తం పెట్టడం విశేషం.

దీనికి సంబంధించిన వీడియోను ఆహా ఓటీటీ తన ఎక్స్ అకౌంట్లో గురువారం (జులై 18) పోస్ట్ చేసింది. "పల్లె పాటలతో పరవశించిన స్టేజీ.. పవన్ కల్యాణ్ ఓజీ సినిమాలో ఛాన్స్ ఇచ్చిన తమన్. ఒకే స్టేజ్ పై అందరూ, అన్నీ.. అదే తెలుగు ఇండియన్ ఐడల్. తెలుగు ఇండియన్ ఐడల్ 11, 12 ఎపిసోడ్లు జులై 19, 20 తేదీల్లో స్ట్రీమింగ్ అవుతుంది" అనే క్యాప్షన్ తో ఆ ప్రోమోను రిలీజ్ చేసింది.

ఓజీ మూవీ గురించి..

పవన్ కల్యాణ్ నటిస్తున్న ఓజీ మూవీ ఎంతో ఆసక్తి రేపుతోంది. అతడు ఏపీలో ఎమ్మెల్యేగా గెలిచి, తర్వాత కూటమి ప్రభుత్వంలో మంత్రి అయిన తర్వాత రిలీజ్ అయ్యే అవకాశం ఉన్న తొలి సినిమా కావడంతో దీనిపై ఎక్కడ లేని ఆసక్తి నెలకొంది. తన సభల్లో పవన్ కూడా ఆ మధ్య ఈ సినిమా గురించి చెబుతూ.. ఓజీ వస్తోంది.. చూడండి బాగుంటుంది అని అనడం విశేషం.

ప్రభాస్ తో సాహో మూవీ తీసిన సుజీత్ ఈ ఓజీకి డైరెక్టర్ గా ఉన్నాడు. ప్రియాంకా అరుల్ మోహన్ ఫిమేల్ లీడ్ గా చేస్తోంది. ఆర్ఆర్ఆర్ ప్రొడ్యూసర్ డీవీవీ దానయ్య నిర్మిస్తున్నాడు. ఈ సినిమా ఈ ఏడాది చివర్లో వచ్చే అవకాశం ఉంది. ఈ సినిమా కోసం ఫ్యాన్స్ ఎంతో ఆతృతగా ఎదురు చూస్తున్నారు.