Sandeep Reddy Vanga: మహేశ్ బాబుకు కథ చెప్పా.. నచ్చింది కానీ: డైరెక్టర్ సందీప్ రెడ్డి వంగా

Sandeep Reddy Vanga: అర్జున్ రెడ్డి సినిమాతో సెన్సేషన్ క్రియేట్ చేశారు డైరెక్టర్ సందీప్ రెడ్డి వంగా. బాలీవుడ్ స్టార్ రణ్‍బీర్ కపూర్ హీరోగా ఆయన దర్శకత్వం వహించిన ‘యానిమల్’ సినిమా డిసెంబర్ 1వ తేదీన రిలీజ్ కానుంది. ప్రస్తుతం యానిమల్ మూవీ ప్రమోషన్లలో రణ్‍బీర్, సందీప్ బిజీగా ఉన్నారు. సందీప్ డైరెక్టర్ కావటంతో ఈ మూవీకి తెలుగులోనూ మంచి క్రేజ్ ఉంది. యానిమల్ ప్రమోషన్లలో భాగంగా ఓ ఇంటర్వ్యూలో తాజాగా మాట్లాడారు సందీప్ రెడ్డి వంగా. టాలీవుడ్ సూపర్ స్టార్ మహేశ్ బాబుకు ఓ కథ చెప్పానని ఈ సందర్భంగా వెల్లడించారు. మరిన్ని విషయాలను చెప్పారు.

పాన్ ఇండియా స్టార్ ప్రభాస్‍తో సందీప్ రెడ్డి తదుపరి స్పిరిట్ మూవీ చేయనున్నారు. ఐకాన్ స్టార్ అల్లు అర్జున్‍తోనూ ఆ తర్వాత ఓ చిత్రం చేయనున్నారు. మరే హీరోకైనా కథలు చెప్పారా అనే ప్రశ్న ఇంటర్వ్యూలో సందీప్‍కు ఎదురైంది. దీనికి ఆయన స్పందించారు. మహేశ్ బాబుకు ఓ కథ చెప్పానని వెల్లడించారు. అయితే, మహేశ్‍కు వేరే మూవీల కమిట్మెంట్ ఉండటంతో అది ముందుకు వెళ్లలేదని అన్నారు.

“నేను మహేశ్ బాబుకు ఓ స్టోరీ చెప్పాను. ఆయనకు ఆ కథ బాగా నచ్చింది. కానీ వేరే మూవీస్ కమిట్మెంట్ వల్ల అది ముందుకు వెళ్లలేదు” అని సందీప్ రెడ్డి వంగా చెప్పారు. తనకు మహేశ్ బాబు, రామ్‍చరణ్‍ సహా మరికొందరు హీరోలతో మూవీస్ చేయాలని కూడా ఉందని తెలిపారు.

అలాగే, ప్రభాస్‍తో చేయబోయే స్పిరిట్ సినిమా ప్రీ-ప్రొడక్షన్ పనులను 2024 జూన్‍లో మొదలుపెట్టనున్నట్టు సందీప్ రెడ్డి చెప్పారు. త్వరలోనే ఈ చిత్రానికి డైలాగ్‍లు రాయడం మొదలుపెడతానని అన్నారు.

యానిమల్ సినిమా హిందీ, తెలుగు, తమిళం, కన్నడ, మలయాళ భాషల్లో డిసెంబర్ 1న రిలీజ్ కానుంది. ఈ మూవీ ట్రైలర్ చాలా ఇంటెన్స్, వైలెన్స్, ఎమోషన్‍తో అదిరిపోయింది. సినిమాపై హైప్‍ను పీక్స్‌కు తీసుకెళ్లింది. ఇప్పటికే కొన్ని చోట్ల యానిమల్ అడ్వాన్స్ బుకింగ్స్ మొదలవగా.. టికెట్లు హాట్ కేకుల్లా బుక్ అవుతున్నాయి. యానిమల్‍కు భారీ ఓపెనింగ్ ఖాయంగా కనిపిస్తోంది.

యానిమల్ సినిమాలో రణ్‍బీర్ కపూర్‌కు జోడీగా రష్మిక మందన్న హీరోయిన్‍గా నటించారు. రణ్‍బీర్ తండ్రి పాత్రలో అనిల్ కపూర్, విలన్‍గా బాబి డియోల్ చేశారు.