Hanuman Trailer Date, Time: హనుమాన్ ట్రైలర్‌కు టైమ్ ఫిక్స్: వివరాలివే

HanuMan Trailer Date, Time: సినీ ప్రేక్షకులు ఎంతగానో ఎదురుచూస్తున్న చిత్రాల్లో హనుమాన్ మొదటి వరుసలో ఉంది. తెలుగులో తొలి సూపర్ హీరో మూవీగా రానున్న ఈ చిత్రంపై అంచనాలు భారీగా ఉన్నాయి. ఆ!, జాంబిరెడ్డి లాంటి చిత్రాలను తెరకెక్కించిన టాలెంటెడ్ డైరెక్టర్ ప్రశాంత్ వర్మ.. హనుమాన్ సినిమాకు దర్శకత్వం వహించారు. తేజ సజ్జా హీరోగా నటించారు. ఇప్పటికే వచ్చిన టీజర్, పాటలు ఆకట్టుకున్నాయి. సినిమాపై క్రేజ్‍ను మరింత పెంచాయి. 2024 జనవరి 12న హనుమాన్ సినిమా 11 భాషల్లో రిలీజ్ కానుంది. ప్రమోషన్లను కూడా మూవీ యూనిట్ జోరుగా చేస్తోంది. ఈ క్రమంలో హనుమాన్ ట్రైలర్ వచ్చేస్తోంది. ట్రైలర్ రిలీజ్‍కు డేట్, టైమ్‍ను ప్రకటించింది.

హనుమాన్ సినిమా ట్రైలర్ రేపు (డిసెంబర్ 19) ఉదయం 11 గంటల 7 నిమిషాలకు రిలీజ్ కానుంది. తేదీని ఇటీవలే ఫిక్స్ చేసిన మూవీ యూనిట్.. టైమ్‍ను నేడు వెల్లడించింది. “ఇంతకు ముందెన్నడూ సినిమాటిక్ అద్భుతాన్ని చూసేందుకు రెడీ అవండి. రేపు 11.07 గంటలకు హనుమాన్ ట్రైలర్” అని ప్రైమ్‍షో ఎంటర్‌టైన్‍మెంట్ ట్వీట్ చేసింది. హనుమంతుడికి ఇష్టమైన మంగళవారం రోజునే ఈ ట్రైలర్‌ను కూడా మూవీ యూనిట్ తీసుకొస్తోంది.

ప్రశాంత్ వర్మ సినిమాటిక్ యూనివర్స్ (PVCU)లో తొలి చిత్రంగా హనుమాన్ వస్తోంది. హనుమంతుడి వల్ల అతీత శక్తులు పొంది సూపర్ హీరోలా మారిన యువకుడి పాత్రను ఈ చిత్రంలో పోషిస్తున్నారు హీరో తేజా సజ్జా. అంజనాద్రి అనే ఫిక్షనల్ ప్రాంతంలో ఈ మూవీ కథ నడుస్తుంది. ఇప్పటి వరకు వచ్చిన టీజర్, మూడు పాటలు బాగా పాపులర్ అయ్యాయి.

హనుమాన్ సినిమాలో అమృత అయ్యర్ హీరోయిన్‍గా నటించారు. వరలక్ష్మి శరత్ కుమార్, వినయ్ రాయ్, వెన్నెల కిశోర్, సత్య, గెటప్ శీను, రాజ్ దీపక్ శెట్టి కీలకపాత్రలు పోషించారు. ఈ చిత్రానికి అనుదీప్ దేవ్, హరి గౌడ, కృష్ణ సౌరభ్ సంగీతం అందిస్తున్నారు. ప్రైమ్‍షో ఎంటర్‌టైన్‍మెంట్ పతాకంపై కే నిరంజన్ రెడ్డి ఈ సినిమాను నిర్మించారు.

2024 జనవరి 12వ తేదీన తెలుగు, హిందీ, తమిళం, కన్నడ, మలయాళం, మరాఠీతో పాటు ఇంగ్లిష్, స్పానిష్, కొరియన్, చైనీస్, జపనీస్ భాషల్లోనూ విడుదల కానుంది. పాన్ వరల్డ్ రేంజ్‍లో ఏకంగా ఈ మూవీ వస్తోంది.