HanuMan First Song: హను-మాన్ నుంచి తొలి పాట రిలీజ్.. అవెంజర్లను మించిన సూపర్ హీరో అంటూ.. ఆకట్టుకునేలా..

HanuMan First Song: తెలుగులో తొలి సూపర్ హీరోగా సినిమాగా వస్తున్న ‘హను-మాన్’పై అంచనాలు భారీ స్థాయిలో ఉన్నాయి. తేజ సజ్జా ఈ చిత్రంలో హీరోగా నటిస్తున్నారు. ఆ!, కల్కి, జాంబిరెడ్డి సినిమాలతో మంచి గుర్తింపు తెచ్చుకున్న ప్రశాంత్ వర్మ.. హను-మాన్‍కు దర్శకత్వం వహిస్తున్నారు. టీజర్ తర్వాత ఈ సినిమాపై హైప్ విపరీతంగా పెరిగింది. సంక్రాంతి సందర్భంగా వచ్చే ఏడాది జనవరి 12వ తేదీన హను-మాన్ రిలీజ్ కానుంది. ఏకంగా 11 భాషల్లో విడుదల కానుంది. కాగా, నేడు (నవంబర్ 14) బాలల దినోత్సవం సందర్భంగా హను-మాన్ నుంచి తొలి పాట రిలీజ్ అయింది.

‘సూపర్ హీరో హనుమాన్’ అంటూ హను-మాన్ నుంచి ఈ తొలి సాంగ్ వచ్చేసింది. చిల్డ్రన్ డే సందర్భంగా నేడు ఈ పాటను మూవీ యూనిట్ లాంచ్ చేసింది. పిల్లలను ఆకట్టుకునేలా కామిక్స్ స్టైల్‍లో లిరికల్ సాంగ్ వీడియో ఉంది. “సూపర్ హీరోకి కొంచెం లోకల్ టచ్చా” అంటూ ఈ పాట మొదలైంది.

“సరిపోడంటా సూపర్ మ్యాన్.. భయపడి పోడా బ్యాట్‍మ్యాన్.. హిప్‍హాప్ అనడా హీమ్యాన్” అంటూ పలువురు హాలీవుడ్ సూపర్ హీరోల కంటే హను-మాన్ గ్రేట్ అనేలా ఈ సాంగ్ ఉంది.

“కెప్టెన్ అమెరికా షీల్డుకు సొట్టలు తీసిస్తాడు.. బ్లాక్ ప్యాంథర్ పంజా గోళ్లతో వీపులు గోకేడు.. ఐరన్ మ్యాన్ వీడి బట్టలు ఐరన్ చేస్తాడు.. థారూ హ్యామర్‌తోనే దింపి మేకులే.. వీడు ఆరేస్తాడు పంచెలే” అంటూ ఈ పాట లిరిక్స్ చాలా ఆకట్టుకునేలా ఉన్నాయి. అవెంజర్స్ సహా హాలీవుడ్ సూపర్ హీరోల కంటే హను-మాన్ చాలా పవర్ ఫుల్ అనేలా ఈ సాంగ్ ఉంది. వచ్చాడు కొత్త సూపర్ హీరో అంటూ పాట అదిరిపోయింది. హను-మాన్ సూపర్ పవర్లను ఈ లిరికల్ పాటలో కాస్త చూపించారు.

‘సూపర్ హీరో హనుమాన్’ పాటను సాయి వేద వాగ్దేవి, ప్రకృతి రెడ్డి, మయూఖ్ ఆలపించారు. కృష్ణ కాంత్ అందించిన లిరిక్స్ ఆకట్టుకునేలా ఉన్నాయి. మ్యూజిక్ డైరెక్టర్ అనుదీప్ దేవ్.. ఈ పాటకు ట్యూన్స్ అందించారు.

తెలుగుతో పాటు హిందీ తమిళం, కన్నడ, మలయాళం భాషల్లో హను-మాన్ తొలిపాట రిలీజ్ అయింది. ఆయా భాషల్లో సింగర్లు, లిరిక్ రైటర్లు వేర్వేరుగా ఉన్నారు.

హను-మాన్ సినిమా ఏకంగా పాన్ వరల్డ్ రేంజ్‍లోనే రానుంది. తెలుగు, హిందీ, తమిళం, కన్నడ, మరాఠీ, మలయాళంతో పాటు విదేశీ భాషలైన ఇంగ్లిష్, స్పానిష్, కొరియన్, చైనీస్, జపనీస్ భాషల్లోనూ ఈ చిత్రం రిలీజ్ కానుంది.

హనుమంతుడి వల్ల సూపర్ పవర్స్ వచ్చే యువకుడు హను-మాన్‍గా ఈ సినిమాలో తేజ సజ్జా ప్రధానపాత్ర పోషిస్తున్నారు. గ్రాఫిక్స్ అత్యుత్తమ నాణ్యతగా ఉండేలా దర్శకుడు ప్రశాంత్ చాలా జాగ్రత్తలు తీసుకుంటున్నారు. వచ్చే ఏడాది జనవరి 12న హను-మాన్ థియేటర్లలో రిలీజ్ కానుంది.