OTT Hollywood Movies: ఈవారమే తెలుగులో ఓటీటీలోకి వస్తున్న రెండు హాలీవుడ్ సూపర్ హిట్ సినిమాలు.. ఎక్కడ చూడొచ్చంటే..

హాలీవుడ్ సినిమాలను తెలుగులో చూడాలనుకునే వారి కోసం ఈవారంలోనే రెండు బ్లాక్‍బస్టర్ చిత్రాలు ఓటీటీల్లోకి వచ్చేస్తున్నాయి. చాలా రోజుల నుంచి వేచిచూస్తున్న ఈ సినిమాలు స్ట్రీమింగ్‍కు రానున్నాయి. ఎపిక్ సైన్స్ ఫిక్షన్ మూవీ ‘డ్యూన్ 2’ భారీ హిట్ అయింది. ఈ చిత్రం ఓటీటీలోకి వచ్చేస్తోంది. అలాగే, ‘కింగ్‍డమ్ ఆఫ్ ది ప్లానెట్ ఆఫ్ ది ఏప్స్’ స్ట్రీమింగ్‍కు రానుంది. ఈ రెండు చిత్రాలు తెలుగులోనూ అందుబాటులోకి రానున్నాయి. ఈ సినిమాల స్ట్రీమింగ్ వివరాలు ఇక్కడ తెలుసుకోండి.

డ్యూన్ 2

తిమోతీ చాలమే, జెండెయా ప్రధాన పాత్రలు పోషించిన ‘డ్యూన్ 2’ సినిమా ప్రపంచవ్యాప్తంగా సూపర్ హిట్ అయింది. భారీ కలెక్షన్లను దక్కించుకుంది. డ్యూన్‍కు సీక్వెల్‍గా వచ్చిన ఈ ఎపిక్ సైన్స్ ఫిక్షన్ మూవీ మళ్లీ అదే మ్యాజిక్ రిపీట్ చేసి భారీ వసూళ్లను కొల్లగొట్టింది. డ్యూన్ 2 మూవీ మార్చి 1వ తేదీన థియేటర్లలో రిలీజ్ అయింది. కథ, కథనం, విజువల్స్, వార్ సీక్వెన్స్.. ఇలా అన్ని విషయాల్లో ప్రేక్షకులను విపరీతంగా ఆకట్టుకుంది. గతంలోనే డ్యూన్ 2 సినిమా కొన్ని ఓటీటీల్లో రెంటల్ విధానంలో అందుబాటులోకి వచ్చింది. ఇప్పుడు రెంట్ లేకుండానే ఈ సినిమా ఇండియాలో జియోసినిమా ఓటీటీలోకి ఆగస్టు 1వ తేదీన వచ్చేస్తోంది. తెలుగులోనూ స్ట్రీమింగ్ కానుంది.

డ్యూన్ 2 చిత్రం జియోసినిమాలో ఇంగ్లిష్‍తో పాటు ఆరు భారతీయ భాషల్లో స్ట్రీమింగ్‍కు రానుంది. తెలుగు, హిందీ, తమిళం, మరాఠీ, కన్నడ, బెంగాలీ భాషల్లోనూ ఆగస్టు 1వ తేదీన డ్యూన్ 2 మూవీ జియోసినిమా ఓటీటీలోకి స్ట్రీమింగ్‍కు రానుంది. జియో సినిమా ప్రీమియమ్ సబ్‍స్క్రైబర్లు ఈ చిత్రాన్ని చూసేయవచ్చు. డ్యూన్ 2 మూవీకి డెనిస్ విల్‍నోవ్ దర్శకత్వం వహించారు. ఆరాకస్ గ్రహంపై ఆధిపత్యం కోసం కొన్ని రాజ్యాల మధ్య జరిగే పోరు నేపథ్యంలో ఈ చిత్రం రూపొందింది. ప్రపంచవ్యాప్తంగా ఈ చిత్రం సుమారు రూ.5,940 కోట్ల కలెక్షన్లు దక్కించుకుంది. బడ్జెట్‍కు సుమారు మూడు రెట్లకు పైగా వసూలు చేసి బ్లాక్‍‍బస్టర్ అయింది.

కింగ్‍డమ్ ఆఫ్ ది ప్లానెట్ ఆఫ్ ది ఏప్స్

కింగ్‍డమ్ ఆఫ్ ది ప్లానెట్ ఆఫ్ ది ఏప్స్ చిత్రం మే 10వ తేదీన థియేటర్లలో రిలీజ్ అయింది. వెస్ బాల్ దర్శకత్వం వహించిన ఈ సైన్స్ ఫిక్షన్ చిత్రం భారీ అంచనాలతో ప్రేక్షకుల ముందుకు వచ్చింది. అందుకు తగ్గట్టే ఈ చిత్రం సూపర్ హిట్ అయింది. ప్రపంచవ్యాప్తంగా సుమారు రూ.3,300 కోట్ల కలెక్షన్లు దక్కించుకుంది. ఈ మూవీ ఇప్పుడు ఇండియాలో ఓటీటీలోకి వస్తోంది. ఆగస్టు 2వ తేదీన డిస్నీ+ హాట్‍స్టార్ ఓటీటీలో కింగ్‍డమ్ ఆఫ్ ది ప్లానెట్ ఆఫ్ ది ఏప్స్ చిత్రం స్ట్రీమింగ్‍కు రానుంది. ఇంగ్లిష్‍తో పాటు తెలుగు, హిందీ, తమిళంలో స్ట్రీమింగ్ అవనుంది.

కింగ్‍డమ్ ఆఫ్ ది ప్లానెట్ ఆఫ్ ది ఏప్స్ చిత్రంలో ఓపెన్ టీగ్, కెనిన్ డురాండ్, పీటర్ మాకోన్ ప్రధాన పాత్రలు పోషించారు. డైరెక్టర్ వెస్ బాల్ తెరకెక్కించారు. ఈ మూవీని ఆగస్టు 2వ తేదీ నుంచి హాట్‍స్టార్ ఓటీటీలో చూసేయవచ్చు.