Jani Master: జానీ మాస్టర్‌ హీరోగా యాక్షన్ సినిమా ‘రన్నర్’.. ఫస్ట్ లుక్ రివీల్: వివరాలివే

Jani Master: కొరియోగ్రాఫర్‌గా ‘జానీ మాస్టర్’ చాలా ఫేమస్. దాదాపు ప్రస్తుత స్టార్ హీరోలందరికీ అతడు డ్యాన్స్ కంపోజ్ చేశాడు. ఎన్నో సూపర్ హిట్ పాటలకు హీరోలతో స్టెప్‍లు వేయించాడు. తెలుగుతో పాటు హిందీ, తమిళం, కన్నడ మూవీ ఇండస్ట్రీల్లోనూ మంచి పేరు సాధించాడు. కెరీర్ తొలినాళ్లతో డ్యాన్స్ షోలతో పరిచయమైన జానీ మాస్టర్.. ప్రస్తుతం టాప్ సినీ కొరియోగ్రాఫర్లలో ఒకడిగా ఉన్నాడు. అయితే, ఇప్పుడు జానీ మాస్టర్.. సినీ హీరోగా మారాడు. జానీ మాస్టర్ హీరోగా ప్రస్తుతం ‘రన్నర్’ అనే యాక్షన్ థ్రిల్లర్ రూపొందుతోంది. జానీ మాస్టర్ పుట్టిన రోజు సందర్భంగా నేడు (జూలై 2) రన్నర్ మూవీ టైటిల్, ఫస్ట్ లుక్‍ను చిత్ర యూనిట్ రివీల్ చేసింది.

రన్నర్ సినిమాలో పోలీస్ పాత్ర పోషిస్తున్నాడు జానీ మాస్టర్. ఫస్ట్ లుక్ పోస్టర్‌లో ఖాకీ ప్యాంట్ వేసుకున్నాడు జానీ మాస్టర్. అయితే, షర్ట్ మాత్రం పోలీస్ యూనిఫామ్‍లా కాకుండా కాస్త విభిన్నంగా ఉంది. చొక్కాకు ఓ వైపు ఖాకీ రంగు.. మరోవైపు తెలుగు రంగు ఉంది. జానీ మాస్టర్ పరుగెత్తుతున్నట్టు మరో పోస్టర్‌ను కూడా చిత్ర యూనిట్ విడుదల చేసింది. పోలీస్ నేపథ్యంలో తండ్రీకొడుకుల మధ్య ఉండే అనుబంధాల నేపథ్యంలో ఈ సినిమా కథ ఉంటుందని మూవీ యూనిట్ తెలిపింది. యథార్థ ఘటనల ఆధారంగా ఈ మూవీ రూపొందుతోందని సమాచారం.

రన్నర్ చిత్రానికి విజయ్ చౌదరి దర్శకత్వం వహిస్తున్నాడు. డైరెక్టర్‌గా ఇదే అతడి తొలి మూవీ. ఈ సినిమాకు మెలోడీ బ్రహ్మ మణిశర్మ సంగీతం అందిస్తున్నాడు. ఈ సినిమాను విజయ్ భాస్కర్, జి ఫణీంద్ర, ఎం హరి సంయుక్తంగా నిర్మిస్తున్నారు. విజయ ఢమరుక ఆర్ట్స్ బ్యానర్‌పై ఈ చిత్రం రూపొందుతోంది.

జానీ మాస్టర్ క్యారెక్టరైజేషన్ రన్నర్ చిత్రంలో ఆసక్తికరంగా ఉంటుందని, కథలో తండ్రీ కొడుకుల మధ్య సాగే సెంటిమెంట్‍ హైలైట్‍గా నిలుస్తుందని విన్నర్ మూవీ డైరెక్టర్ విజయ్ చౌదరి అన్నాడు. విభిన్నమైన థ్రిల్లర్‌గా ఈ మూవీని రూపొందిస్తున్నామని, జానీ మాస్టర్ వేసే స్టెప్పులు ఈ చిత్రానికి మరో హైలైట్‍గా ఉంటాయని ఆయన వెల్లడించాడు. మిగిలిన నటీనటుల వివరాలను త్వరలో చెబుతామని తెలిపాడు. ఇక, ఈ రన్నర్ సినిమా ఈ ఏడాది డిసెంబర్‌లో విడుదల కానుందని చిత్ర యూనిట్ తెలిపింది.