CCL 2024: బుర్జ్ ఖలీఫాలో సెలబ్రిటీ క్రికెట్ లీగ్ 2024 ప్రారంభం.. ఆ రోజు నుంచి సీసీఎల్ మ్యాచ్‌లు.. గతంలో కంటే పెద్దగా!

Celebrity Cricket League 2024 Start: తెలుగు సినీ ప్రేక్షకులకు హీరోలంటే ఎంతో అమితమైన అభిమానం. ఆ అభిమానంతోనే థియేటర్లలోకి వెళ్లి వారి సినిమాలను చూస్తూ ఎంజాయ్ చేస్తారు.. వారిని ఎంకరేజ్ చేస్తారు. అలాగే హీరోలు సైతం తమ డైలాగ్స్, ఫైట్స్, డ్యాన్స్‌లతో ఆకట్టుకునేందుకు ప్రయత్నిస్తుంటారు. ఇప్పటివరకు థియేటర్, ఓటీటీల్లో తమ సినిమాలతో సందడి చేసిన హీరోలు, నటులు ఇప్పుడు మైదానంలో బ్యాటింగ్, బౌలింగ్, ఫీల్డింగ్ వంటి తదితర పనులతో అలరించేందుకు రెడీ అవుతున్నారు.

ఈ ఏడాది సెలబ్రిటీ క్రికెట్ లీగ్ ప్రారంభం కాబోతుంది. అందుకు సంబంధించిన అన్ని పనులు పూర్తిగా సిద్ధం కానున్నాయి. ఈ క్రమంలోనే సెలబ్రిటీ క్రికెట్ లీగ్ 10వ సీజన్‌ను (CCL Season 10) దుబాయ్‌లో (2 ఫిబ్రవరి 2024) అద్భుతమైన షోతో కిక్ స్టార్ చేశారు. గ్లోబల్ మెట్రోపాలిస్, వండర్‌ఫుల్ బుర్జ్ ఖలీఫాపై ఈ పదో సీజన్ ప్రోమోను గ్రాండ్‌గా లాంచ్ చేశారు.

సెలబ్రిటీ క్రికెట్ లీగ్‌లోని మొత్తం 8 జట్ల (Celebrity Cricket League 8 Teams) నుండి సూపర్ స్టార్లు, కెప్టెన్లు కిచ్చా సుదీప్ (కన్నడ), సోహైల్ ఖాన్ (హిందీ), ఆర్య, జీవా (తమిళం), థమన్ అండ్ సుధీర్ బాబు (తెలుగు), జిస్సు సేన్‌గుప్తా (బెంగాల్), బన్ను ధిల్లాన్, సోనూ సూద్ (పంజాబీ), ఇంద్రజిత్ సుకుమారన్, ఉన్ని ముకుందన్ (మలయాళం) దుబాయ్‌లో ప్రత్యక్షంగా వీక్షించారు. అందుకు సంబంధించిన ఫొటోలు, వీడియోలు సోషల్ మీడియాలో వైరల్ అవుతున్నాయి.

సెలబ్రిటీ క్రికెట్ లీగ్ అనేది సినిమా, క్రికెట్‌ను కలిపే స్పోర్టైన్‌మెంట్. భారతదేశంలో 8 విభిన్న భాషల నుంచి 200+ మంది నటీనటులను ఒకచోట చేర్చే ఏకైక స్పోర్ట్స్ లీగ్. ఇది క్రీడలు, వినోదాల కలయిక. గ్రాండియస్ లీగ్ సెలబ్రిటీ క్రికెట్ లీగ్ ఫిబ్రవరి 23న దుబాయ్‌లోని షార్జాలో ప్రారంభం కానుంది. భారతదేశంలో మరో మూడు వీకెండ్స్‌లో 20 యాక్షన్-ప్యాక్డ్, అద్భుతమైన మ్యాచ్‌లతో క్రికెట్ అభిమానులను, ప్రేక్షకులను అలరిస్తుంది. ఆడ్రినలిన్-పంపింగ్ టోర్నమెంట్ సోనీ స్పోర్ట్స్ టెన్ 5, జియో సినిమా, పలు ప్రాంతీయ ఛానెల్‌లో ఈ క్రికెట్ లీగ్ పదో సీజన్ ప్రత్యక్ష ప్రసారం కానుంది.

ఈ సందర్భంగా సెలబ్రిటీ క్రికెట్ లీగ్ వ్యవస్థాపకుడు అండ్ మేనేజింగ్ డైరెక్టర్ విష్ణు వర్ధన్ ఇందూరి మాట్లాడారు. "CCL మొదటి నుంచి అద్భుతంగా అలరిస్తుంది. ప్రతి సంవత్సరం లీగ్ వృద్ధి చెందడం లీగ్‌లో క్రికెట్ ఆడే ప్లేయర్స్ ప్యాషన్‌కి ప్రతిబింబం. CCL 2024 గతంలో కంటే బిగ్గర్‌గా ఉండబోతుంది'' అని సీసీఎల్ వ్యవస్థాపకుడు, మేనేజింగ్ డైరెక్టర్ విష్ణు వర్ధన్ ఇందూరి తెలిపారు. బుర్జ్ ఖలీఫా ప్రోమో లాంచ్ గురించి కిచ్చా సుదీప్ మాట్లాడుతూ "నేను ఇంతకుముందు నా సినిమాల కోసం బుర్జ్ ఖలీఫా వచ్చాను. క్రికెటర్‌గా బుర్జ్ ఖలీఫాలో ఉండటం చాలా ప్రత్యేకమైనది, ఇది మరచిపోలేనిది'' అని అన్నాడు.

"మన గొప్ప దేశంలోని 8 పవర్ ఫుల్ ఫిల్మ్ ఇండస్ట్రీలు ప్రాతినిధ్యం వహిస్తున్న సూపర్‌స్టార్‌లతో కలిసి ఉండటం, ప్రపంచంలోని ఎత్తైన ఐకానిక్ నిర్మాణం ముందు నిలబడి మొత్తం భారతదేశం ఉద్వేగభరితంగా ఇష్టపడే లీగ్ ప్రారంభోత్సవాన్ని వీక్షించడం ఒక అద్భుతమైన అనుభవం. ఈ సంవత్సరం CCL అద్భుతమైన ఎడిషన్‌గా అలరిస్తుంది'' అని రియల్ హీరో సోనూ సూద్ చెప్పుకొచ్చాడు.