Akhanda Sequel update: అఖండ చిత్రానికి సీక్వెల్.. అన్ని కుదిరితే త్వరలో పట్టాలెక్కనున్న మూవీ

Akhanda Sequel update: నందమూరి నటసింహం బాలకృష్ణ కెరీర్‌లో ప్రత్యేకంగా నిలిచే మూవీ అఖండ. 2021 డిసెంబరులో విడుదలైన ఈ సినిమా బాక్సాఫీస్ వద్ద దుమ్మురేపింది. థియేటర్లకు ప్రేక్షకులను విపరీతంగా రప్పించిన ఈ సినిమా కాసుల వర్షాన్ని కురిపించింది. బాలయ్య-బోయపాటి శ్రీను కాంబినేషన్‌లో మూడో సినిమాగా వచ్చిన అఖండ అద్భుత విజయాన్ని సొంతం చేసుకుంది. దీంతో ఈ సినిమాకు సీక్వెల్ వస్తే బాగుంటుందని అభిమానులు ఆశపడుతున్నారు. ఇదే విషయాన్ని డైరెక్టర్ బోయపాటి శ్రీను కూడా పలుమార్లు చెప్పారు. అఖండ చిత్రానికి సీక్వెల్ తీసే అవకాశముందని స్పష్టం చేశారు. తాజాగా అ దిశగా అడుగులు పడుతున్నట్లు తెలుస్తోంది. ఫిల్మ్ వర్గాల సమాచారం ప్రకారం త్వరలోనే అఖండ-2 ప్రారంభమవుతుందని సమాచారం.

ప్రస్తుతం బాలకృష్ణ.. అనిల్ రావిపూడి దర్శకత్వంలో NBK108లో నటిస్తున్నారు. అంతేకాకుండా పలు యంగ్ దర్శకులు బాలయ్యతో సినిమా తీసేందుకు ఆసక్తి చూపుతున్నారు. ఇందుకోసం స్టోరీలు వినిపిస్తున్నారు. మే చివరి కల్లా అనిల్ రావిపూడి సినిమా పూర్తయ్యే అవకాశాలున్నాయి. ఇదే సమయంలో బోయపాటి శ్రీను కూడా రామ్ పోతినేని చిత్రాన్ని కంప్లీట్ చేయనున్నారు. ఇప్పటికే షూటింగ్ వేగవంతం చేస్తున్నారు. దీంతో వీరి కాంబినేషన్‌లో అఖండ-2 ప్రారంభించనున్నట్లు తెలుస్తోంది.

ఇప్పటికే బాలయ్యకు బోయపాటి అఖండ-2 ఐడియాను కూడా వినిపించారని టాక్. ఇందుకు బాలకృష్ణ కూడా సానుకూల స్పందన తెలియజేశారని సమాచారం. అన్నీ సరిగ్గా కుదిరితే జూన్ 10 బాలయ్య పుట్టిన రోజు సందర్భంగా అఖండ-2 లాంచ్ అయ్యే అవకాశముంది. ఇక రెండు నెలల సమయమే ఉండటంతో సర్వత్రా ఆసక్తి నెలకొంది. ఈ విషయంలో బాలయ్య-బోయపాటి కూడా సైలెంట్‌గా ఉండనున్నారు. ఒకవేళ అఖండ-2 నిజంగా పట్టాలెక్కితే మాత్రం మరోసారి బాక్సాఫీస్ వద్ద బ్లాక్ బాస్టర్ అవుతుందనడంలో ఎలాంటి సందేహం లేదు.

ప్రస్తుతం ఈ మూవీ అనిల్ రావిపూడితో బాలయ్య షూటింగ్ శరవేగంగా జరుపుకుంటోంది. ఈ చిత్రంలో కాజల్ అగర్వాల్ హీరోయిన్‌గా చేస్తుండగా.. శ్రీలీల కీలక పాత్రలో నటిస్తోంది. షైన్ స్కీన్స్ పతాకంపై సాహు గారపాటి, హరీష్ పెద్ది ఈ చిత్రాన్ని ప్రతిష్టాత్మకంగా నిర్మిస్తున్నారు. అనిల్ రావిపూడి దర్శకత్వం వహిస్తున్నారు. బాలకృష్ణ మునుపెన్నడు పోషించని పాత్రలో ఆయన కనిపించనున్నారు. ఈ సినిమాలో బాలయ్య మార్క్ మాస్ యాక్షన్‌తో పాటు అనిల్ రావిపూడి తాలుకూ కామెండీ ఎలిమెంట్స్ కూడా ఉండబోతున్నాయని తెలుస్తోంది. బాలయ్య స్టార్‍‌డమ్‌ను దృష్టిలో ఉంచుకుని అనిల్ ఓ పవర్‌ఫుల్ కథను సిద్ధం చేశారు. నందమూరి బాలకృష్ణ నటిస్తున్న 108వ సినిమా కావడం విశేషం.