Animal 8 Days Collections: తన రికార్డును దాటేసిన రణ్‍బీర్ కపూర్.. యానిమల్‍కు కొనసాగుతున్న కలెక్షన్ల దూకుడు

Animal 8 Days Collections: యానిమల్ సినిమా బాక్సాఫీస్ వద్ద దూకుడు కొనసాగిస్తోంది. రెండో వారంలోనూ దుమ్మురేపుతోంది. సందీప్ రెడ్డి వంగా దర్శకత్వం వహించిన యాక్షన్ థ్రిల్లర్ మూవీలో బాలీవుడ్ స్టార్ రణ్‍బీర్ కపూర్ హీరోగా నటించారు. డిసెంబర్ 1న ఈ మూవీ రిలీజ్ కాగా.. ప్రారంభం నుంచి కలెక్షన్లలో జోరు చూపిస్తోంది. రణ్‍బీర్ కెరీర్లోనే బిగ్గెస్ట్ హిట్‍గా నిలిచింది.

రణ్‍బీర్ కపూర్ కెరీర్లో ఇప్పటి వరకు సంజూ సినిమా అత్యధిక కలెక్షన్లు సాధించిన మూవీగా ఉండేది. అయితే, యానిమల్‍తో తన రికార్డును రణ్‍బీర్ దాటేశారు. యానిమల్ సినిమా ప్రపంచవ్యాప్తంగా 8 రోజుల్లో రూ.600.67కోట్ల గ్రాస్ కలెక్షన్లను దక్కించుకుంది. ఈ విషయాన్ని మూవీ యూనిట్ అధికారికంగా ప్రకటించింది.

రణ్‍బీర్ హీరోగా నటించిన సంజూ సినిమా 2018లో ప్రపంచవ్యాప్తంగా రూ.586.85కోట్ల గ్రాస్ కలెక్షన్లను దక్కించుకుంది. ఇప్పుడు, యానిమల్ 8 రోజుల్లోనే సంజూ లైఫ్‍టైమ్ కలెక్షన్లను దాటేసింది. రణ్‍బీర్‌కు బిగ్గెస్ట్ బ్లాక్‍బాస్టర్‌గా నిలిచింది. బాక్సాఫీస్ వద్ద ఈ మూవీ ఇంకా జోరు కొనసాగించే అవకాశం ఉంది.

వైలెన్స్, బోల్డ్ సీన్స్ ఎక్కువగా ఉన్న యానిమల్‍పై భిన్నాభిప్రాయాలు వ్యక్తమవుతున్నాయి. ఈ మూవీ చాలా బాగుందని కొందరు అంటుంటే.. మరికొందరేమో తీవ్రంగా విమర్శిస్తున్నారు. అయితే, మిక్స్డ్ టాక్‍ను అధిగమించి బాక్సాఫీస్ దగ్గర మాత్రం యానిమల్ వండర్స్ క్రియేట్ చేస్తోంది. హాలీడేస్ పెద్దగా లేని సమయంలో రిలీజై భారీ వసూళ్లను రాబడుతోంది.

ఇండియాలోనే యానిమల్ చిత్రానికి ఇప్పటి వరకు రూ.362.11 కోట్ల నెట్ కలెక్షన్లు వచ్చాయి. అన్ని భాషల్లోనూ మంచి కలెక్షన్లు ఈ మూవీ రాబడుతోంది. నార్త్ అమెరికాలో యానిమల్ చిత్రం 10 మిలియన్ మార్క్ కలెక్షన్లను దాటింది.

యానిమల్ చిత్రాన్ని భూషణ్ కుమార్, కృషన్ కుమార్ (టీ-సిరీస్), మురాద్ ఖేతానీ (సినీ1 స్టూడియోస్), ప్రణయ్ రెడ్డి వంగా (భద్రకాళి పిక్చర్స్) సంయుక్తంగా నిర్మించారు. ఈ సినిమాకు ఏడుగురు మ్యూజిక్ డైరెక్టర్లు పని చేశారు.

యానిమల్ సినిమాలో రష్మిక మందన్నా హీరోయిన్‍గా నటించారు. బాబీ డియోల్, అనిల్ కపూర్, తృప్తి డిమ్రి, చారు శంకర్, బబ్లూ పృథ్విరాజ్ కీలకపాత్రలు చేశారు.