Triptii Dimri: ఇలా చేస్తే నన్నెవరూ పెళ్లి చేసుకోరని అన్నారు: బోల్డ్ బ్యూటీ తృప్తి డిమ్రి కామెంట్స్ వైరల్
Triptii Dimri: తాను సినిమా ఇండస్ట్రీలోకి వస్తే తనను ఎవరూ పెళ్లి చేసుకోరని తన పేరెంట్స్ ను బంధువులు హెచ్చరించారని బోల్డ్ బ్యూటీ తృప్తి డిమ్రి గుర్తు చేసుకుంది. ఆమె లేటెస్ట్ మూవీ విక్కీ ఔర్ విద్య కా వో వాలా వీడియో ప్రమోషన్లలో భాగంగా ఆమె చేసిన కామెంట్స్ వైరల్ అవుతున్నాయి.
Triptii Dimri: యానిమల్ మూవీతో రాత్రికి రాత్రే నేషనల్ క్రష్‌గా మారిపోయిన నటి తృప్తి డిమ్రి. ఫ్యాన్స్ ఆమెను ముద్దుగా భాభీ 2 అని కూడా పిలుచుకుంటున్నారు. యానిమల్ లో బోల్డ్ క్యారెక్టర్ తర్వాత ఆమెకు వరుస ఆఫర్లు వస్తున్నాయి. అయితే తాను సినిమా ఇండస్ట్రీలోకి రాకుండా ఉండేందుకు తన బంధువులు చాలానే ప్రయత్నించారని, తన పేరెంట్స్ కు వార్నింగ్ కూడా ఇచ్చినట్లు తాజాగా ఆమె గుర్తు చేసుకుంది.
ఎవరూ పెళ్లి చేసుకోరన్నారు: తృప్తి
తృప్తి డిమ్రి ప్రస్తుతం తన నెక్ట్స్ మూవీ విక్కీ ఔర్ విద్య కా వో వాలా వీడియో ప్రమోషన్లలో బిజీగా ఉంది. ఈ సినిమాలో ఆమె రాజ్ కుమార్ రావ్ సరసన నటిస్తోంది. ఈ సినిమా అక్టోబర్లో రిలీజ్ కానుండగా.. మేకర్స్ ఇప్పుడు ఓ రొమాంటిక్ సాంగ్ రిలీజ్ చేశారు. ఉత్తరాఖండ్ కు చెందిన తృప్తి ఈ మధ్యే తన సినిమా జర్నీ గురించి గుర్తు చేసుకుంటూ.. తన బంధువులు ఎలా తాను రాకుండా అడ్డు పడ్డారో వెల్లడించింది.
"ఇలాంటి దాంట్లోకి మీ అమ్మాయిని ఎందుకు పంపించారు? ఆమె పూర్తిగా పాడవుతుంది. తప్పుడు మనుషులతో ఆమె కలుస్తుంది. తప్పుడు నిర్ణయాలు తీసుకుంటుంది. ఎవరూ ఆమెను పెళ్లి చేసుకోరు. ఆమె అసలు పెళ్లే చేసుకోదు అని మా పేరెంట్స్ తో బంధువులు అనేవారు" అని తృప్తి గుర్తు చేసుకుంది.
తాను కూడా తన యాక్టింగ్ కెరీర్ పై పూర్తిగా ఆశలు వదిలేసుకున్న సందర్భాలు కూడా ఉన్నట్లు ఆమె వెల్లడించింది. "ఓ దశలో నేను పూర్తి అయోమయానికి గురయ్యాను. ఎందుకంటే ఉదయం లేవగానే అసలు మనకు ఎలాంటి పని దొరకడం లేదన్న బాధ ఎలా ఉంటుందో తెలుసు కదా. కానీ నేను తిరిగి మా పేరెంట్స్ దగ్గరకు వెళ్లి నేను చేయలేకపోయాను అని మాత్రం చెప్పకూడదని నిర్ణయించుకున్నాను" అని తృప్తి తెలిపింది.
అన్నీ బోల్డ్ మూవీసే
తృప్తి డిమ్రి సినిమా ఇండస్ట్రీలోకి అడుగుపెట్టినప్పటి నుంచీ అన్నీ బోల్డ్ మూవీసే చేస్తోంది. నిజానికి యానిమల్ మూవీతో ఆమె దేశవ్యాప్తంగా పేరు సంపాదించినా.. అంతకుముందు కూడా బుల్బుల్, లైలా మజ్నూలాంటి సినిమాల్లోనూ బోల్డ్ క్యారెక్టర్స్ చేసింది. యానిమల్ తర్వాత కూడా బ్యాడ్ న్యూస్ పేరుతో మరో మూవీ చేసింది.
అందులో ఇద్దరి ద్వారా ఒకేసారి కవలలకు తల్లి అయ్యే మరో బోల్డ్ క్యారెక్టర్లో తృప్తి నటించింది. ఇక ఇప్పుడు విక్కీ విద్యా కా వో వాలా వీడియో పేరుతో మరో సినిమా చేస్తోంది. ఇదే కాకుండా దఢక్ 2, భూల్ భులయ్యా 3లాంటి సినిమాల్లోనూ ఆమె నటించనుంది.
