Unstoppable With NBK: బాలకృష్ణని గుక్కతిప్పుకోకుండా తెలుగు పద్యంతో ఆశ్చర్యంలో ముంచెత్తిన అల్లు అర్జున్ కూతురు అర్హ
Allu Arjun daughter Arha: అన్‌స్టాప‌బుల్ విత్ ఎన్‌బీకేలో అల్లు అర్జున్ కూతురు అర్హాని నీకు తెలుగు వచ్చా? అని బాలయ్య సరదాగా అడిగారు. వెంటనే పద్యం అందుకున్న 8 ఏళ్ల అర్హ గుక్కతిప్పుకోకుండా తెలుగు పద్యం చెప్పేసింది.
Unstoppable With NBK Season 4: ఐకాన్ స్టార్ అల్లు అర్జున్ కూతురు అర్హ చెప్పిన తెలుగు పద్యం విని నందమూరి బాలకృష్ణ ఆశ్చర్యపోయారు. సుకుమార్ దర్శకత్వంలో అల్లు అర్జున్ నటించిన మోస్ట్ అవైటెడ్ మూవీ ‘పుష్ఫ: ది రూల్’ డిసెంబరు 5న ప్రపంచవ్యాప్తంగా రిలీజ్‌కాబోతోంది. ఈ సినిమా ప్రమోషన్స్‌లో భాగంగా ఆహాలో స్ట్రీమింగ్ అవుతున్న ‘అన్‌స్టాప‌బుల్ విత్ ఎన్‌బీకే’ షో నాలుగో సీజన్‌కి అల్లు అర్జున్ వచ్చారు. ఇప్పటికే అల్లు అర్జున్ ఎపిసోడ్ పార్-1 స్ట్రీమింగ్ అవుతుండగా.. పార్ట్-2 రానున్న శుక్రవారం (నవంబరు 22) స్ట్రీమింగ్‌కాబోతోంది.
క్లిష్టమైన పద్యం అలవోకగా
పార్ట్-2 ఎపిసోడ్ మధ్యలో అల్లు అర్జున్ కొడుకు అయాన్, కూతురు అర్హ షోలోకి ఎంట్రీ ఇచ్చారు. వచ్చీరాగానే బాలయ్య కాళ్లు మొక్కి ఆశీర్వాదం తీసుకున్నారు. ఆ తర్వాత బాలయ్య సరదాగా అర్హ నీకు తెలుగు వచ్చా? అని అడిగారు. దాంతో అర్హ పక్కనే ఉన్న అల్లు అర్జున్ తెలుగు వచ్చా??? అంటూ ఏదో చెప్పబోతుండగా వెంటనే అర్హ ‘అటజని కాంచె భూమిసురు డంబర చుంబిర’ అంటూ తెలుగు పద్యాన్ని అందుకుంది.
ఆశ్చర్యపోయిన బాలయ్య.. గొప్పగా దీవెన
అర్హ ఆ పద్యం చెప్తున్నంతసేపు బాలకృష్ణ ఆశ్చర్యంగా అలా చూస్తుండిపోయారు. పద్యం పూర్తవగానే అర్హని దగ్గరికి తీసుకుని బాలయ్య ముద్దు పెట్టుకున్నారు. ‘‘తెలుగు చల్లగా.. నాలుగు కాలాల పాటు హాయిగా.. ఈ భూమ్మీద బతుకుతుంది అనిపిస్తుంది’’ అంటూ బాలయ్య ఎమోషనల్‌గా అర్హని చూస్తూ ప్రశంసించారు. ఇక అయాన్ విషయానికొస్తే యానిమల్ సినిమాలో రణబీర్ కపూర్ టైప్ అని.. నాన్న కోసం ఏమైనా చేస్తాడంటూ అల్లు అర్జున్ చెప్పుకొచ్చారు.
పర్సనల్ లైఫ్‌ గురించి బాలయ్య ప్రశ్నలు
అల్లు అర్జున్ పిల్లల గురించే కాకుండా సతీమణి స్నేహా రెడ్డి గురించి కూడా కొన్ని సరదా ప్రశ్నలు అడిగిన బాలయ్య.. ఫ్యామిలీ రిలేషన్స్‌ మెరుగుపడాలంటే ఎలాంటి సూచనలు చేస్తావ్? అంటూ అడిగారు. అలానే అల్లు అర్జున్ అలవాట్ల గురించి కూడా వాకబు చేసిన బాలయ్య.. ఐకాన్ స్టార్ సమాధానాలపై సరదాగా సెటైర్ వేశారు.
పుష్ప 2 ట్రైలర్‌తో హైప్ పీక్స్‌కి
పుష్ప 2 మూవీ ట్రైలర్ గత ఆదివారం పాట్నా వేదికగా రిలీజ్ అయ్యింది. రెండు రోజుల్లోనే యూట్యూబ్‌ని షేక్ చేసిన ఈ ట్రైలర్.. సినిమాపై అంచనాల్ని మరింత పెంచేసింది. పుష్ప 2లో అల్లు అర్జున్ సరసన రష్మిక మంధాన నటించగా.. ఫహద్ ఫాజిల్, జగపతి బాబు, సునీల్, అనసూయ, తదితరులు కీలక పాత్రల్లో నటించారు. క్రేజీ హీరోయిన్ శ్రీలీల ఈ సినిమాలో ఐటెం సాంగ్ చేసింది.
