No Toll For Cars : వాహనదారులకు అలర్ట్- ఇక నుంచి ఈ టోల్స్ వద్ద డబ్బులు కట్టాల్సిన పని లేదు!
Mumbai tolls news : మీరు ముంబైకి వెళుతున్నారా? అయితే మీకో గుడ్ న్యూస్! ముంబై ప్రవేశంలో ఉండే 5 కీలక ప్లాజాల వద్ద కార్లు, ఎస్యూవీల ఇక నుంచి టోల్స్ ఛార్జీలు కట్టాల్సిన అవసరం లేదు! ఈ విషయాన్ని మహారాష్ట్ర సీఎం ఏక్నాథ్ శిండే వెల్లడించారు.
2024 మహారాష్ట్ర అసెంబ్లీ ఎన్నికల వేళ ప్రజలకు గుడ్ న్యూస్ని ఇచ్చింది ఏక్నాథ్ శిండే ప్రభుత్వం! దేశ వాణిజ్య రాజధాని ముంబైలోకి ప్రవేశించేందుకు ప్రస్తుతం ఉన్న 5 మార్గాల్లోని టోల్ బూత్స్లో ఇక డబ్బులు కట్టాల్సిన అవసరం లేదు. ఈ మేరకు సీఎం ఏక్నాథ్ శిండే కేబినెట్ సోమవారం కీలక నిర్ణయం తీసుకుంది. ఆయా ప్రాంతాల్లో ప్రయాణించే కార్లు, ఎస్యూవీలు వంటి లైట్ వెహికిల్స్కి టోల్ ఛార్జీల వసూళ్ల నుంచి మినహాయింపు ఇస్తున్నట్టు, ఈ నిర్ణయం సోమవారం అర్థరాత్రి నుంచే అమల్లోకి వస్తుందని ప్రకటించింది.
ఆ 5 టోల్స్ దగ్గర డబ్బులు కట్టాల్సిన పని లేదు..!
"ఈ టోల్ ఛార్జీలను మాఫీ చేయాలని ప్రజలు చాలా కాలంగా విజ్ఞప్తి చేస్తున్నారు. అందుకే ముంబై ఎంట్రీలో ఉన్న 5 టోల్ ప్లాజాల్లో టోల్స్ ఛార్జీలను రద్దు చేస్తున్నాము. అసెంబ్లీ ఎన్నికలు ముగిసిన తర్వాత కూడా ఈ నిర్ణయం అమల్లో ఉంటుంది," అని సీఎం ఏక్నాథ్ శిండే స్వయంగా చెప్పారు.
దహిసర్, ఆనంద్ నగర్, వైశాలి, ఔరోలి, ములుంద్ టోల్ ప్లాజాల్లో ఇక నుంచి లైట్ వెహికిల్స్ టోల్స్ కట్టాల్సిన పని లేదని మహారాష్ట్ర మంత్రి దాదాజి భూసే తెలిపారు.
2002 నుంచి ఈ 5 టోల్స్ కార్యకలాపాలు సాగిస్తున్నాయి. మహా నగరంలో ఫ్లైఓవర్ల నిర్మాణానికి అయ్యే ఖర్చులను కవర్ చేసేందుకు ఈ 5 టోల్స్ని గతంలో మహారాష్ట్ర ప్రభుత్వం ప్రారంభించింది.
"2026 వరకు ఈ టోల్స్లో రూ. 45 నుంచి రూ. 75 వరకు వసూలు చేయాల్సి ఉంది. 2.80లక్షల లైట్ వెహికిల్స్తో పాటు మొత్తం 3.5 లక్షల వాహనాలు ఈ టోల్స్ నుంచి ప్రయాణిస్తాయి. క్యూలో వెయిట్ చేసే సమయం ఆదా అవుతుంది. డబ్బు కూడా ఆదా అవుతుంది. ఈ విషయంపై ప్రభుత్వం చాలా నెలలుగా చర్చలు జరిపింది. చివరికి, ఈ విప్లవాత్మక నిర్ణయాన్ని నేడు ప్రకటించింది," అని భూసే మీడియాకు తెలిపారు.
ఎన్నికల కోసమేనా?
అయితే ఏక్నాథ్ శిండే తీసుకున్న ఈ నిర్ణయం.. ఎన్నికల జిమ్మిక్ అని విపక్షాలు మండిపడుతున్నాయి.
"ఎన్నికలు సమీపిస్తున్న సయమంలో మీరు ఈ ప్రకటన చేస్తున్నారు. తలుచుకుంటే ముందే మీరు టోల్స్ని ఆపేయొచ్చు. కానీ అలా చేయలేదు," అని శివసేన ఉద్ధవ్ ఠాక్రే వర్గానికి చెందిన ఆనంద్ దూబే ప్రభుత్వాన్ని విమర్శించారు. కేవలం లైట్ వెయిట్ వెహికిల్స్కి మాత్రమే టోల్స్ మాఫీ చేయడం ఎందుకుని, హెవీ వెయిట్ వెహికిల్స్కి కూడా ఈ నిర్ణయం వర్తించేలా చేయాలని ఆయన డిమాండ్ చేశారు. లేకపోతే రానున్న ఎన్నికల్లో ప్రజలు తగిన బుద్ధి చెబుతారని అన్నారు.
మరోవైపు ఈ టోల్స్ వసూళ్లను నిలిపివేయాలని చాలా కాలంగా అడుగుతున్నట్టు అభిప్రాయాలు వ్యక్తమవుతున్నాయి.
"ఈ నిర్ణయంతో ముంబై ప్రజలు సంతోషంగా ఉంటారు. నేను థానె నుంచి వస్తాను. ప్రతిసారి ఈ టోల్ చూసి బాధపడతాను. ఇప్పుడు ఉచిత రవాణాతో ఆయా ప్రాంతాల్లో అభివృద్ధి మరింత పెరుగుతుంది," అని శివసేన ఎంపీ నరేశ్ అన్నారు.
2024 మహారాష్ట్ర ఎన్నికల తేదీని ఎన్నికల సంఘం ప్రకటించాల్సి ఉంది.
సంబంధిత కథనం