Sai Dharam Tej: ఏపీ డిఫ్యూటీ సీఎం నుంచి స్పెషల్ గిఫ్ట్ అందుకున్న సాయి ధ‌ర‌మ్‌తేజ్‌

Sai Dharam Tej: ఏపీ డిప్యూటీ సీఏం, సినీ హీరో ప‌వ‌న్ క‌ళ్యాణ్ నుంచి మెగా హీరో సాయిధ‌ర‌మ్‌తేజ్ స్పెష‌ల్ గిఫ్ట్ అందుకున్నాడు. ఇటీవ‌ల త‌న పుట్టిన‌రోజు సంద‌ర్భంగా మావ‌య్య ప‌వ‌న్ క‌ళ్యాణ్‌ను క‌లిసిన సాయి ధ‌ర‌మ్ తేజ్‌ ఆయ‌న ఆశీస్సులు తీసుకున్నారు. తేజ్ కు సావర తెగలు చేసిన పెయింటింగ్ ను బ‌హుమ‌తిగా అందించాడు ప‌వన్ కల్యాణ్. ఈ సందర్భంగా తీసుకున్న ఫొటోను సోషల్ మీడియా ద్వారా సాయిధ‌ర‌మ్‌ తేజ్ షేర్ చేశారు.

గిఫ్ట్ ఎంతో ప్ర‌త్యేక‌మైన‌ది...

ప‌వ‌న్ క‌ళ్యాన్ బ‌హుమ‌తిపై సాయిధ‌ర‌మ్‌తేజ్ మాట్లాడుతూ... పవన్ కల్యాణ్ దగ్గర నుంచి అందుకునే బ్లెస్సింగ్స్ తో పాటు ఆయన ఇచ్చే ప్రతి గిఫ్ట్ ఎంతో ప్రత్యేకమైనది. ఇప్పుడు నేను అందుకున్న ఆర్ట్ వర్క్స్ సావర గిరిజ‌న క‌ళాకారులు తయారుచేసింది. ఏపీ లేపాక్షి షోరూం నుంచి ఈ పెయింటింగ్స్ తీసుకొచ్చారు. ఏపీలోని ఉత్తరాంధ్ర ఏజెన్సీకి చెందిన ఈ సావర తెగ‌ల వారు స‌హ‌జ రంగుల‌ తో ఈ పెయింటింగ్స్ గీస్తారు.

శతాబ్దాల చరిత్ర ఉన్న సావర తెగల వారి కళ అంతరించిపోతోంది. వీరి ఉనికిని కాపాడాలంటే మనమంతా సావర తెగలు తయారుచేసిన పెయింటింగ్స్, ఇతర అలంకరణ వస్తువులు కొనుగోలు చేసి ప్రోత్సహించాలి.

పవన్ కల్యాణ్ గారు ఎవరికైనా బహుమతిగా కొండపల్లి, ఏటి కొప్పాక బొమ్మలతో పాటు సావర తెగల పెయింటింగ్స్ ఇస్తారు. మనమూ ఆ కృషిని, స్ఫూర్తిని కొనసాగించాలి అంటూ సాయిదుర్గాతేజ్ ట్వీట్ చేశాడు. అత‌డి ట్వీట్ వైర‌ల్ అవుతోంది.

పీరియాడిక‌ల్ యాక్ష‌న్ డ్రామా...

విరూపాక్ష‌, బ్రో స‌క్సెస్‌ల త‌ర్వాత పీరియాడిక‌ల్ యాక్ష‌న్ డ్రామా మూవీ చేయ‌బోతున్నాడు సాయిధ‌ర‌మ్‌తేజ్‌. పాన్ ఇండియ‌న్ లెవెల్‌లో ఐదు భాష‌ల్లో రూపొందుతోన్న ఈ మూవీతో రోహిత్ కేపీ డైరెక్ట‌ర్‌గా టాలీవుడ్‌లోకి ఎంట్రీ ఇస్తోన్నాడు. ఈ మూవీలో ఐశ్వ‌ర్య ల‌క్ష్మీ హీరోయిన్‌గా న‌టిస్తోంది. హ‌నుమాన్ ప్రొడ్యూస‌ర్స్ నిరంజ‌న్ రెడ్డి, చైత‌న్య రెడ్డి ఈ మూవీని ప్రొడ్యూస్ చేస్తోన్నారు.

హ‌రిహ‌ర‌వీర‌మ‌ల్లు...

మ‌రోవైపు ప్ర‌స్తుతం ప‌వ‌న్ క‌ళ్యాణ్ హ‌రిహ‌ర‌వీర‌మ‌ల్లుతో పాటు ఓజీ సినిమాలు చేస్తోన్నాడు. ఎన్నిక‌ల కార‌ణంగా చాలా రోజుల పాటు సినిమాల‌కు దూరంగా ఉన్న ప‌వ‌న్ క‌ళ్యాణ్ ఇటీవ‌లే హ‌రిహ‌ర‌వీర‌మ‌ల్లు షూటింగ్‌ను ప్రారంభించాడు. హిస్టారిక‌ల్ యాక్ష‌న్ మూవీ వ‌చ్చే ఏడాది మార్చి 28న రిలీజ్ కాబోతోంది.

త్వ‌ర‌లోనే ఓజీ మూవీ షూటింగ్‌లోనూ ప‌వ‌న్ క‌ళ్యాణ్ అడుగుపెట్ట‌బోతున్న‌ట్లు స‌మాచారం. ఓజీ సినిమాకు సుజీత్ ద‌ర్శ‌క‌త్వం వ‌హిస్తోన్నాడు. ఆర్ఆర్ఆర్ ప్రొడ్యూస‌ర్ డీవీవీ దాన‌య్య నిర్మిస్తోన్న ఈ సినిమాలో ప్రియాంక అరుళ్ మోహ‌న్ హీరోయిన్‌గా న‌టిస్తోంది.