EPFO new rules: లావాదేవీలు లేని ఖాతాలకు సంబంధించి ఈపీఎఫ్ఓ కొత్త నిబంధనలు

మోసపూరిత, అనధికారిక విత్ డ్రాయల్స్ ను అరికట్టే ఉద్దేశంతో ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) లావాదేవీలు పూర్తిగా నిలిచిపోయిన ఖాతాలు కలిగిన చందాదారుల కోసం కొత్త నిబంధనలను ప్రవేశపెట్టింది. చాలా కాలం పాటు నిష్క్రియంగా ఉన్న ఖాతాల కోసం కఠినమైన ధృవీకరణ ప్రక్రియను ప్రారంభించింది. అందుకు గానూ, ప్రత్యేకంగా నిబంధనావళిని రూపొందించింది. లావాదేవీలు లేని, పని చేయని ఖాతాల విషయంలో అప్రమత్తంగా వ్యవహరించాలని ఫీల్డ్ ఆఫీస్ లను ఈపీఎఫ్ఓ హెచ్చరించింది. ఫీల్డ్ ఆఫీస్ లు మరింత శ్రద్ధతో వ్యవహరించాలని సూచించింది.

లావాదేవీలు లేని ఖాతాల కోసం..

కొత్త నిబంధనల ప్రకారం, EPFO ​​కనీసం మూడు సంవత్సరాల పాటు లావాదేవీలు (వడ్డీని క్రెడిట్ చేయడం తప్ప ఇతర డెబిట్ లేదా క్రెడిట్) లేని ఖాతాలను ‘ట్రాన్సాక్షన్ లెస్’ (transaction-less) ఖాతాలుగా గుర్తించింది. మూడు సంవత్సరాలుగా ఎటువంటి లావాదేవీలు జరగనందున అటువంటి ట్రాన్సాక్షన్ లెస్ ఖాతాలను నిష్క్రియ ఖాతాలు లేదా ఇనాపరేటివ్ ఖాతాలుగా ఈపీఎఫ్ఓ (Employees Provident Fund Organisation EPFO) పరిగణిస్తుంది. అంతేకాకుండా, EPF స్కీమ్‌లోని పారా 72(6) క్రింద ఉన్న ప్రస్తుత ప్రమాణాలకు అనుగుణంగా ఉన్న ఖాతాలను 'పనిచేయని ఖాతాలు'గా నిర్ధారిస్తారు. ఈ ఖాతాల నుంచి ఉపసంహరణలు లేదా బదిలీలను అనుమతించడానికి కఠినమైన ధ్రువీకరణలను అమలు చేయాలని ఈపీఎఫ్ఓ స్పష్టం చేసింది.

58 సంవత్సరాల వయస్సు వచ్చేవరకు..

సభ్యునికి 58 సంవత్సరాల వయస్సు వచ్చిన తర్వాత, ఆ సభ్యుడి ఖాతాను పనిచేయని ఖాతా లేదా ఇనాపరేటివ్ అకౌంట్ గా వర్గీకరిస్తారు. ఈ ఖాతాలోకి సంబంధిత సభ్యుడికి 58 సంవత్సరాల వయస్సు వరకు వడ్డీ జమ చేస్తారు. ఇనాపరేటివ్ అకౌంట్స్ క సంబంధించి పలు నిబంధనలను ఈపీఎఫ్ఓ వివరించింది. లావాదేవీలు లేని ఖాతాకు యూనివర్సల్ అకౌంట్ నంబర్ (UAN) ఉండటం, లేదా ఆ సంబంధిత యూఏఎన్ కు ఆధార్ అనుసంధానమై లేకపోవడం లేదా ఆ యూఏఎన్ కు KYC ధ్రువీకరణ లేకపోవడం వంటి సందర్భాలను ఈపీఎఫ్ఓ వివరించింది.

యూఏఎన్ లింక్ కాని ఖాతాలు..

లావాదేవీలు లేని ఖాతాలు లేదా పని చేయని ఖాతాలు ఉన్న సభ్యులు, వారికి యూనివర్సల్ అకౌంట్ నంబర్లు (UANలు) లేనట్లయితే, వారు వ్యక్తిగతంగా EPFO ​​కార్యాలయాలను సందర్శించాలి. లేదా బయోమెట్రిక్ ధృవీకరణ కోసం ఏర్పాటు చేసిన ప్రత్యేక శిబిరాలకు హాజరు కావాలి. ఈ తప్పనిసరి ప్రక్రియ హక్కుదారుల గుర్తింపును ప్రామాణీకరించడానికి ఏర్పాటు చేశారు.

యూఏఎన్ ఉన్న ఖాతాలు..

ఇప్పటికే యూనివర్సల్ అకౌంట్ నంబర్‌లకు (UAN) లింక్ చేసి ఉన్న ఖాతాల కోసం, సరైన నో యువర్ కస్టమర్ (KYC) వివరాలు లేకుంటే, సభ్యులు KYC సీడింగ్‌ను పూర్తి చేయాల్సి ఉంటుంది. ఇది వారి యజమానుల ద్వారా లేదా నేరుగా EPFO ​​(ఎంప్లాయీస్ ప్రావిడెంట్ ఫండ్ ఆర్గనైజేషన్) కార్యాలయాలతో చేయవచ్చు. UAN జనరేషన్, KYC అప్‌డేట్‌లను ఆమోదించడానికి బాధ్యత వహించే అధికారులు ఖాతా బ్యాలెన్స్ ఆధారంగా మారుతూ ఉంటారు. అధిక-విలువ ఖాతాలకు సీనియర్ అధికారుల నుండి క్లియరెన్స్ అవసరం.

క్లెయిమ్ సెటిల్మెంట్ ఎలా?

లావాదేవీలు నిలిచిపోయిన ఖాతాల కోసం ఇప్పటికే ఉన్న క్లెయిమ్ సెటిల్‌మెంట్ విషయంలో కూడా అప్రమత్తంగా వ్యవహరించాలని ఫీల్డ్ ఆఫీస్ లను ఈపీఎఫ్ఓ హెచ్చరించింది. ఆయా ఖాతాల నుంచి విత్ డ్రాయల్స్ ను అనుమతించేముందు డిజిటల్ టెక్నాలజీ సహాయంతో ధ్రువీకరించుకోవాలని సూచించింది.

స్తంభింపచేసిన ఖాతాల పరిస్థితి ఏంటి?

స్తంభింపచేసిన ఈపీఎఫ్ ఖాతాల సమస్యను పరిష్కరించడానికి EPFO ​​సమగ్ర ధృవీకరణ ప్రక్రియను ప్రవేశపెట్టింది. ఈ కొత్త విధానంలో డిజిటల్, ఫిజికల్ రికార్డ్‌లు రెండింటినీ క్షుణ్ణంగా తనిఖీ చేయడం, యజమానుల నుండి ధృవీకరణ మరియు 'క్రౌడ్‌సోర్సింగ్' పద్ధతిని ఉపయోగించడం వంటివి ఉంటాయి. ఈ చొరవలో భాగంగా, EPFO ​​ధృవీకరణ కోసం క్లెయిమ్ చేసే సమయంలో అదే సంస్థలో ఉద్యోగం చేస్తున్న 20 మంది యాక్టివ్ యూనివర్సల్ అకౌంట్ నంబర్ (UAN) హోల్డర్‌లను చేరుకుంటుంది. అదనపు గుర్తింపు ధ్రువీకరణగా పనిచేయడానికి ఈ సభ్యుల నుండి కనీసం ఐదు నిర్ధారణలు అవసరం. గతంలో ఇన్‌యాక్టివ్‌గా ఉన్న ఖాతాల నుండి వచ్చే అభ్యర్థనలకు ఇప్పుడు క్లెయిమ్ చేస్తున్న మొత్తంపై ఆధారపడి వివిధ స్థాయిల అధికారుల ఆమోదం తప్పనిసరి. ఉదాహరణకు, రూ. 25 లక్షలకు మించిన క్లెయిమ్‌లకు ఆఫీసర్-ఇన్-చార్జ్ స్థాయి వరకు ఆమోదం తప్పనిసరి.