Sajjan Jindal: ముఖ్యమంత్రి వైయస్‌.జగన్‌తో సజ్జన్ జిందాల్ భేటీ.. కడప స్టీల్ ప్లాంట్‌పై చర్చలు
Sajjan Jindal: జేఎస్‌డబ్ల్యూ గ్రూప్‌ ఛైర్మన్‌ సజ్జన్ జిందాల్ ముఖ్యమంత్రి జగన్‌తో తాడేపల్లి నివాసంలో సమావేశమయ్యారు. కడపలో ఉక్కు కర్మాగారం నిర్మాణ పురోగతి, ఇతరత్రా అంశాలపై ఇరువురు చర్చించారు.
Sajjan Jindal: శంకుస్థాపన చేసి నెలలు గడుస్తున్నా పనుల్లో పురోగతి లేకపోవడంపై పెద్ద ఎత్తున విమర్శలు ఎదురవుతున్న నేపథ్యంలో సజ్జన్ జిందాల్.. సిఎంతో భేటీ కావడం ప్రాధాన్యత సంతరించుకుంది.
కడప ఉక్కు కర్మాగారం నిర్మాణ ప్రగతిని ముఖ్యమంత్రికి సజ్జన్ జిందాల్ వివరించారు. జనవరి నుంచి ప్రాజెక్టు పనులు మరింత వేగవంతం అవుతాయని తెలిపారు. రాష్ట్ర ప్రభుత్వం అందిస్తున్న సహాయ సహకారాలకు ధన్యవాదాలు తెలియజేశారు.
జేఎస్‌డబ్ల్యూ గ్రూప్‌లో కడప స్టీల్ ప్లాంటు కీలక పాత్ర పోషిస్తుందని, రాష్ట్ర పారిశ్రామికాభివృద్ధిలో ఒక మైలు రాయిగా నిలిచిపోతుందని జిందాల్ పేర్కొన్నారు. వెనకబడ్డ ప్రాంతాల్లో పారిశ్రామిక ప్రగతిని పోత్సహిస్తున్నామని, పారిశ్రామిక వేత్తలకు అవసరమైన సహాయ సహకారాలు అందించడానికి ప్రభుత్వం ఎప్పుడూ సిద్ధంగా ఉంటుందని సీఎం జిందాల్‌తో పేర్కొన్నారు.
విజయనగరం జిల్లా ఎస్‌.కోట సమీపంలో ఎంఎస్‌ఎంఈ పార్కు అభివృద్ధికోసం అన్ని రకాలుగా సిద్ధంగా ఉన్నామని సజ్జన్ జిందాల్ సీఎంకు వెల్లడించారు. వచ్చే నెలలో దీని శంకుస్థాపకు సన్నద్ధమవుతున్నామని తెలిపారు. సౌరవిద్యుత్‌ రంగానికి సంబంధించి రాష్ట్రంలో పెట్టుబడులకు సైతం జేఎస్‌డబ్ల్యూ గ్రూప్‌ సిద్ధంగా ఉందని జిందాల్ సీఎంకు తెలిపారు.
