Bentley Mulsanne Theft | లండన్‌లో చోరీ, పాకిస్తాన్‌లో రికవరీ!
04 September 2022, 11:23 IST
- యునైటెడ్ కింగ్‌డమ్‌లో చోరీకి గురైన ఒక ఖరీదైన లగ్జరీ కారు పాకిస్తాన్‌లో ప్రత్యక్షమైంది. లండన్ నుంచి బెంట్లీ ముల్సానే సెడాన్ కారును ఒక ముఠా పాకిస్తాన్‌కు ఎగుమతి చేసినట్లు UK ఇంటెలిజెన్స్ ఏజెన్సీ గుర్తించింది. ఈ సమాచారాన్ని పాకిస్తాన్‌లోని కస్టమ్స్ అధికారులకు చేరవేయడంతో, అక్కడి అధికారులు సెర్చ్ ఆపరేషన్ నిర్వహించారు. కరాచీ నగరంలోని ఓ భవంతి ముందు కార్ పార్క్ చేసి ఉండటాన్ని గమనించిన పాక్ అధికారులు, చోరీకి గురైన కారు అదేనని నిర్ధారించుకున్నారు. భవంతి యజమాని కారుకు సంబంధించి పత్రాలు చూపకపోవటంతో ఆ కారును స్వాధీనం చేసుకున్నారు. ఆ ఇంట్లో లైసెన్స్ లేని తుపాకులను అధికారులు స్వాధీనం చేసుకున్నారు. కాగా, ఈ కారును బ్రోకర్ల నుంచి తక్కువ ధరకు నిందితుడు కొనుగోలు చేసినట్లు నివేదికలు వెల్లడించాయి. ఆ లగ్జరీ కారు ధర, సుమారు రూ, 5.60 కోట్లు.