Krithi Shetty | విజిల్ మ‌హాల‌క్ష్మిగా కృతిశెట్టి... ‘ది వారియ‌ర్’ ఫ‌స్ట్ లుక్ విడుద‌ల‌

‘ఉప్పెన’ చిత్రంతో బేబ‌మ్మ పాత్ర ద్వారా తెలుగు ప్రేక్ష‌కుల‌కు చేరువైంది కృతిశెట్టి. తొలి సినిమాతోనే ల‌క్కీ ఛార్మ్ గా గుర్తింపును తెచ్చుకున్న  ఆమె టాలీవుడ్ భారీ ఆఫ‌ర్స్ అందుకుంటోంది. ‘బంగార్రాజు’ చిత్రంతో సంక్రాంతి  పెద్ద హిట్ ను త‌న ఖాతాలో వేసుకుంది కృతిశెట్టి. రామ్ హీరోగా తెర‌కెక్కుతున్న ‘ది వారియ‌ర్’ చిత్రంలో కృతిశెట్టి క‌థానాయిక‌గా న‌టిస్తున్న‌ది. వాలెంటైన్స్ డే సంద‌ర్భంగా సోమ‌వారం ఆమె ఫ‌స్ట్ లుక్‌ను చిత్ర బృందం విడుద‌ల‌చేసింది. ఇందులో కృతిశెట్టి విజిల్ మ‌హాల‌క్ష్మి పాత్ర‌లో క‌నిపించ‌బోతున్న‌ట్లు తెలిపారు. క‌ర్నూల్ సిటీలో రేడియో జాకీగా ప‌నిచేసే అమ్మాయిగా కృతిశెట్టి పాత్ర డిఫ‌రెంట్ గా ఉంటుంద‌ని  చెబుతున్నారు. ఉప్పెన‌, బంగార్రాజు సినిమాల్లో సంప్ర‌దాయ దుస్తుల్లో క‌నిపించిన కృతిశెట్టి ది వారియ‌ర్ ఫ‌స్ట్ లుక్ లో మాత్రం మోడ్ర‌న్ డెస్సులో స్టైలిష్ గా ద‌ర్శ‌న‌మిచ్చింది. ఈ సినిమాలో రామ్ పోలీస్ ఆఫీస‌ర్ గా న‌టిస్తున్నారు. కెరీర్ తొలిసారి ఆయ‌న పోలీస్ పాత్ర‌లో న‌టిస్తున్న చిత్ర‌మిది. తెలుగు, త‌మిళ భాష‌ల్లో రూపొందుతున్న ఈ చిత్రానికి లింగుస్వామి ద‌ర్శ‌క‌త్వం వ‌హిస్తున్నారు. శ్రీ‌నివాస చిట్టూరి నిర్మిస్తున్నారు. హీరో రామ్ ఈ సినిమా ద్వారా త‌మిళంలోకి అరంగేట్రం చేయ‌బోతున్నారు.  ఇందులో ఆది పినిశెట్టి విల‌న్ గా క‌నిపిస్తున్నారు. రామ్ హీరోగా న‌టిస్తున్న19వ చిత్ర‌మిది. 

మూడు సినిమాల‌తో బిజీ...

ప్ర‌స్తుతం హీరోయిన్ గా ఫుల్ బిజీ అయిపోయింది కృతిశెట్టి. ‘ది వారియ‌ర్’ తో పాటు నితిన్ స‌ర‌స‌న ‘మాచ‌ర్ల నియోజ‌క‌వ‌ర్గం’ సినిమా చేస్తోంది. పొలిటిక‌ల్ యాక్ష‌న్ ఎంట‌ర్ టైన‌ర్‌గా ఈ చిత్రం రూపుదిద్దుకోనుంది. అలాగే సుధీర్ బాబు, మోహ‌న‌కృష్ణ ఇంద్ర‌గంటి క‌ల‌యిక‌లో రానున్న‌ ‘ఆ అమ్మాయి గురించి మీకు చెప్పాలి’ సినిమాలో కృతిశెట్టి హీరోయిన్ గా న‌టిస్తోంది.