CM Revanth Reddy: ఓటుకు నోటు కేసులో రేవంత్ అవినీతికి ఆధారాలున్నాయంటున్న ఈడీ.. నేడు కోర్టులో కేసు విచారణ

CM Revanth Reddy: ఓటుకు నోటు కేసులో తెలంగాణ ముఖ్యమంత్రి రేవంత్‌ రెడ్డి బుధవారం హైదరాబాద్ కోర్టుకు హాజరుకానున్న నేపథ్యంలో రేవంత్ రెడ్డిపై మనీలాండరింగ్, రూ.50 లక్షల అక్రమాలకు పాల్పడినట్లు ఎన్ ఫోర్స్ మెంట్ డైరెక్టరేట్ (ఈడీ) వద్ద ఆధారాలు ఉన్నాయని అధికారులు తెలిపారు.

మనీలాండరింగ్ నిరోధక చట్టం (పీఎంఎల్ఏ) కింద దాఖలు చేసిన చార్జిషీట్లో రేవంత్‌ రెడ్డిని 1వ నిందితుడిగా పేర్కొన్న ఈడీ అధికారులు 2019లో విచారణ సమయంలో తప్పించుకున్నారని దర్యాప్తు వివరాలు, కోర్టు పత్రాలను ఉటంకిస్తూ తెలిపారు.

2015 జూన్ 1న జరిగిన తెలంగాణ శాసనమండలి ఎన్నికలకు ముందు తెలుగుదేశం పార్టీ అభ్యర్థి వేం నరేందర్ రెడ్డికి అనుకూలంగా ఓటు వేసినందుకు ఎమ్మెల్యే ఎల్విస్ స్టీఫెన్ సన్ కు రేవంత్ రూ.50 లక్షలు ఇస్తూ పట్టుబడ్డారు. ఆ సమయంలో రేవంత్ టీడీపీ ఎమ్మెల్యేగా ఉన్నారు.

2018లో ఈ వ్యవహారంపై ఈడీ దర్యాప్తు ప్రారంభించి, ఈ కేసులో ఫిర్యాదుదారుగా ఉన్న ఎల్విస్ స్టీఫెన్ సన్, ఇతరుల వాంగ్మూలాలను నమోదు చేసింది. అదే ఏడాది రేవంత్ కాంగ్రెస్ లో చేరారు. 2023 డిసెంబర్లో తెలంగాణలో 119 అసెంబ్లీ స్థానాలకు గాను 65 సీట్లు గెలుచుకుని కాంగ్రెస్ అధికారంలోకి రావడంతో ఆయన ముఖ్యమంత్రిగా నియమితులయ్యారు.

ఈ కేసులో 2021 జూలై 25న చార్జిషీట్ దాఖలు చేసిన దర్యాప్తు ఏజెన్సీ రేవంత్‌ రెడ్డితో పాటు మరో నలుగురిపై అభియోగాలు నమోదు చేసింది. ఇందులో రేవంత్‌ను ప్రధాన నిందితుడిగా పేర్కొంది.

పీఎంఎల్ ఏ సెక్షన్ 50 కింద నమోదు చేసిన వాంగ్మూలంలో ఎల్విస్ స్టీఫెన్ సన్ ను కలిసి వేం నరేందర్ రెడ్డికి అనుకూలంగా క్రాస్ ఓటింగ్ లో ఓటు వేసేలా ఒప్పించాలని రేవంత్ రెడ్డి చెప్పినట్లు మత్తయ్య జెరూసలెం (నిందితుల్లో ఒకరు) ధ్రువీకరించారు. ఎల్విస్ స్టీఫెన్ సన్ టీడీపీ ఎమ్మెల్సీకి అనుకూలంగా ఓటు వేస్తే రూ.5 కోట్లు ఇస్తామని, ఎల్విస్ స్టీఫెన్ సన్ ఓటింగ్ కు గైర్హాజరైతే రూ.3 కోట్లు ఇస్తామని, జెరూసలేం వెళ్లేందుకు విమాన టికెట్ తో పాటు రూ.3 కోట్లు ఇస్తామని రేవంత్ రెడ్డి తనతో చెప్పారని పేరు చెప్పడానికి ఇష్టపడని ఈడీ అధికారి ఒకరు తెలిపారు.

2019 ఫిబ్రవరిలో ఆర్థిక నేరాల దర్యాప్తు సంస్థ రేవంత్ రెడ్డిని ప్రశ్నించింది. రుద్ర ఉదయ్ సింహా అనే వ్యక్తితో తాను కొన్ని అంశాలపై చర్చిస్తుండగా కొందరు పోలీసులు బలవంతంగా సమీపంలోని అపార్ట్ మెంట్ కు తీసుకెళ్లారని తప్పుడు వాంగ్మూలం ఇచ్చారని ఈడీ ఆరోపిస్తోంది. అయితే, రేవంత్ రెడ్డి గన్ మెన్లు తమ వాంగ్మూలంలో రేవంత్ రెడ్డికి అలాంటిదేమీ జరగలేదని దర్యాప్తు బృందాలక వాంగ్మూలం ఇచ్చినట్టు పేర్కొన్నారు.

ఈ ఘటనకు సంబంధించిన వీడియో రికార్డింగ్ ను రేవంత్‌ రెడ్డికి చూపించారని, అందులో అతను డబ్బును హ్యాండిల్ చేసి ఎల్విస్ స్టీఫెన్ సన్ కు ఇవ్వడం స్పష్టంగా కనిపించిందని మరో అధికారి తెలిపారు. అయితే, అతను తన సమాధానంలో 'ఒక వ్యక్తి నాలాగే కనిపిస్తున్నాడు' అని సమాధానం ఇచ్చినట్టు పేరు చెప్పడానికి ఇష్టపడని మరో ఈడీ అధికారి చెప్పారు.

మనీ లాండరింగ్‌ నిరోధక చట్టం కింద నమోదైన అభియోగాల దర్యాప్తులో రేవంత్ రెడ్డి నేరుగా ఓటుకు నోటుకు సంబంధించిన నేరంలో పాలుపంచుకున్నారని, పీఎంఎల్ ఏ సెక్షన్ 4 ప్రకారం మనీ లాండరింగ్ నేరానికి పాల్పడ్డారని తేలింది. ఫిర్యాదుదారుడు ఒక నిర్దిష్ట అభ్యర్థికి అనుకూలంగా ఓటు వేయమని ప్రేరేపించడం పిఎంఎల్‌ఏ ప్రకారం నేరమేనని, తద్వారా మనీలాండరింగ్ నేరానికి పాల్పడ్డాడు" అని ఈడీ అధికారి తెలిపారు.

ఈ కేసును ఈ ఏడాది సెప్టెంబర్ 24న అభియోగాల నమోదుకు లిస్ట్ చేశారు. అభియోగాల విచారణ నిమిత్తం ఈ నెల 16న రేవంత్ సహా నిందితులంతా కోర్టుకు హాజరుకావాలని కోర్టు ఆదేశించింది.