Shoaib Akhtar on Pakistan Team: ఈ పాకిస్థాన్‌ టీమ్‌ కచ్చితంగా తొలి రౌండ్‌లోనే ఇంటికొచ్చేస్తుంది: అక్తర్‌

Shoiab Akhtar on Pakistan Team: టీ20 వరల్డ్‌కప్‌ కోసం గురువారం (సెప్టెంబర్‌ 15) పాకిస్థాన్‌ ఎంపిక చేసిన టీమ్‌పై తీవ్ర విమర్శలు వ్యక్తమవుతున్నాయి. ఆ టీమ్‌ మాజీ క్రికెటర్లు షోయబ్‌ అక్తర్‌, మహ్మద్‌ ఆమిర్‌లు సెలక్షన్‌పై మండిపడుతున్నారు. చీఫ్‌ సెలక్టర్‌ చేసిన చీప్‌ సెలక్షన్‌ అంటూ ఆమిర్‌ తీవ్ర వ్యాఖ్యలు చేశాడు.

ఇక మరో మాజీ బౌలర్‌ షోయబ్‌ అక్తర్‌ అయితే ఈ టీమ్‌ టీ20 వరల్డ్‌కప్‌ తొలి రౌండ్‌లోనే ఇంటికొచ్చేస్తుందని అనడం గమనార్హం. టీమ్‌ ఎంపిక తర్వాత తన యూట్యూబ్‌ ఛానెల్‌లో అక్తర్‌ మాట్లాడాడు. చీఫ్‌ సెలక్టర్‌ యావరేజ్ అయినప్పుడు టీమ్ కూడా యావరేజ్‌గానే ఉంటుందని అక్తర్‌ తీవ్రంగా స్పందించాడు. ఇక హెడ్‌ కోచ్‌ సక్లైన్‌ ముస్తాక్‌పై విమర్శలు గుప్పించాడు.

ఇది కూడా చదవండి | West Indies team for T20 World Cup: రసెల్‌కు దక్కని చోటు.. టీ20 వరల్డ్‌కప్‌కు విండీస్‌ టీమ్‌ ఇదే

అతడు ఎప్పుడో 2002లో రిటైరయ్యాడని, అతనికి టీ20 క్రికెట్‌ గురించి ఏమీ తెలియదని అనడం విశేషం. పాకిస్థాన్‌ మిడిలార్డర్‌ చాలా బలహీనంగా ఉందని, ఇలాంటి టీమ్‌ను ఎలా ఎంపిక చేశారో అర్థం కావడం లేదని అక్తర్‌ చెప్పాడు. ఆస్ట్రేలియా కండిషన్స్‌లో ఇలాంటి టీమ్‌తో ఆడటం చాలా కష్టమని, అందులోనూ ఇండియాతో తొలి మ్యాచ్‌ ఉందన్న విషయాన్ని కూడా గుర్తు చేశాడు.

ఇలాంటి టీమ్‌ సెలక్షన్‌ కారణంగా రానున్న రోజుల్లో పాకిస్థాన్‌ చాలా కఠినమైన పరిస్థితులను ఎదుర్కోబోతోందని, కోచ్‌లు, టీమ్‌ స్టాఫ్‌ ఎగిరిపోవడం ఖాయమని కూడా అన్నాడు. మహ్మద్‌ యూసుఫ్‌లాంటి వ్యక్తి బ్యాటింగ్‌ కోచ్‌గా ఉన్న టీమ్‌ బ్యాటింగ్‌ ఇంత బలహీనంగా ఎలా ఉంటుందని ప్రశ్నించాడు. ఫకర్‌ జమాన్‌ను ఎంపిక చేయకపోవడంపై అక్తర్‌ అసంతృప్తి వ్యక్తం చేశాడు. ఆస్ట్రేలియా కండిషన్స్‌ అతనికి బాగా అనుకూలించేవని అన్నాడు.

ఇది కూడా చదవండి | Jimmy Neesham: వరల్డ్‌కప్‌కు ముందు న్యూజిలాండ్‌కు షాక్‌.. సెంట్రల్‌ కాంట్రాక్ట్‌ వద్దన్న నీషమ్‌

చీఫ్‌ సెలక్టర్‌ మహ్మద్‌ వసీమ్‌, హెడ్‌ కోచ్‌ సక్లైన్‌ ముస్తాక్‌ తీసుకున్న నిర్ణయాలు తనకు తీవ్ర అసంతృప్తి మిగిల్చాయని, చాలా ఆగ్రహంగా ఉందని అక్తర్‌ స్పష్టం చేశాడు. ఇలాంటి టీమ్‌తో తొలి రౌండ్‌ దాటడం కూడా కష్టమేనని, కావాలంటే ఈ వీడియోను సేవ్‌ చేసి పెట్టుకోందని చెప్పాడు. ఎంతో మంది మంచి ప్లేయర్స్‌ అందుబాటులో ఉన్నా.. ఇలాంటి టీమ్‌ను ఎంపిక చేయడమేంటో అర్థం కాలేదని అన్నాడు.

ఇక కెప్టెన్‌ బాబర్‌ ఆజంపైనా అక్తర్‌ తీవ్ర విమర్శలు చేశాడు. అసలు ఫామ్‌లో లేని సమయంలో క్రీజులో నిలదొక్కుకోవడానికి ప్రయత్నించకుండా క్లాసిక్‌ కవర్‌ డ్రైవ్‌లు ఆడటానికి ప్రయత్నిస్తున్నాడని ఎద్దేవా చేశాడు. తన ఆందోళన అంతా ఈ పాకిస్థాన్‌ టీమ్‌ బ్యాటింగ్‌పైనే అని స్పష్టం చేశాడు.