Jonty Rhoads on Team India: 2023 వ‌ర‌ల్డ్ క‌ప్‌ను ఇండియానే గెలుస్తుంది - జాంటీ రోడ్స్ జోస్యం

Jonty Rhoads on Team India: ఈ ఏడాది జ‌రుగ‌నున్న వ‌న్డే వ‌ర‌ల్డ్ క‌ప్‌లో టీమ్ ఇండియానే ఫేవ‌రేట్‌గా బ‌రిలో దిగ‌నున్న‌ట్లు సౌతాఫ్రికా మాజీ క్రికెట‌ర్ జాంటీ రోడ్స్ తెలిపాడు. టైటిల్ గెలిచే స‌త్తా టీమ్ ఇండియాకే ఉంద‌ని అన్నాడు. విరాట్ కోహ్లి, రోహిత్ శ‌ర్మ‌, సూర్య‌కుమార్ యాద‌వ్ వంటి మేటి బ్యాట్స్‌మెన్స్‌తో పాటు హార్దిక్‌, జ‌డేజా వంటి ఆల్‌రౌండ‌ర్ల‌తో ఇండియా టీమ్ ప‌టిష్టంగా ఉంద‌ని జాంటీ రోడ్స్ చెప్పాడు.

స్వ‌దేశంలో ఈ వ‌ర‌ల్డ్ క‌ప్ జ‌రుగ‌నుండ‌టం టీమ్ ఇండియాకు క‌లిసివ‌చ్చే అవ‌కాశం ఉన్న‌ట్లు జాంటీ రోడ్స్ పేర్కొన్నాడు. 2023 వ‌న్డే వ‌ర‌ల్డ్ క‌ప్ అక్టోబ‌ర్, న‌వంబ‌ర్ నెల‌ల్లో జ‌రుగ‌నుంది. పూర్తిగా వ‌ర‌ల్డ్ క‌ప్ మొత్తానికి ఇండియానే ఆతిథ్యం ఇవ్వ‌బోతుండ‌టం ఇదే మొద‌టిసారి.

గ‌తంలో 1987, 1996, 2011ల‌లో ఇత‌ర ఆసియా దేశాల‌తో క‌లిసి వ‌ర‌ల్డ్ క‌ప్‌కు ఇండియా ఆతిథ్యం ఇచ్చింది. 2023 వ‌ర‌ల్డ్ క‌ప్‌ ఫిబ్ర‌వ‌రిలోనే మొద‌లుకావాల్సింది. కానీ కొవిడ్ దృష్ట్యా అక్టోబ‌ర్‌కు వాయిదావేశారు.

మొత్తం ప‌ది జ‌ట్లు ఈ వ‌ర‌ల్డ్ క‌ప్‌లో పాల్గొన‌బోతున్నాయి. ఏడు దేశాలు నేరుగా క్వాలిఫై కాగా, మ‌రో మూడు దేశాలు క్వాలిఫైయ‌ర్ మ్యాచ్‌లు ఆడి వ‌ర‌ల్డ్ క‌ప్‌లో చోటు ద‌క్కించుకోనున్నాయి.