India home series schedule: హైదరాబాద్‌లో న్యూజిలాండ్‌తో వన్డే.. ఇండియా హోమ్‌ సిరీస్‌ షెడ్యూల్‌ ఇదే

India home series schedule: టీమిండియా హోమ్‌ సిరీస్‌ షెడ్యూల్‌ ఖరారైంది. ఇందులో భాగంగా శ్రీలంక, న్యూజిలాండ్‌, ఆస్ట్రేలియాలతో సిరీస్‌లు ఆడనుంది. ఈ పూర్తి షెడ్యూల్‌ను గురువారం (డిసెంబర్‌ 8) బీసీసీఐ రిలీజ్‌ చేసింది. జనవరి 3న ప్రారంభమయ్యే ఈ సీజన్‌.. మార్చి 22 వరకూ సాగనుంది. ఈ సీజన్‌లో హైదరాబాద్‌కు ఓ వన్డే మ్యాచ్‌ నిర్వహించే అవకాశం దక్కింది.

బంగ్లాదేశ్‌తో ప్రస్తుతం జరుగుతున్న వన్డే సిరీస్‌ ముగిసిన తర్వాత టెస్ట్‌ సిరీస్‌ జరుగుతుంది. దాని తర్వాత టీమిండియా స్వదేశానికి వస్తుంది. న్యూఇయర్‌లో మొదట సిరీస్‌ను శ్రీలంకతో ఆడుతుంది. ఆ టీమ్‌ వెళ్లగానే న్యూజిలాండ్, ఆ తర్వాత ఆస్ట్రేలియా టీమ్స్‌ ఇండియాలో అడుగుపెట్టనున్నాయి.

శ్రీలంక సిరీస్‌ షెడ్యూల్‌ ఇదే

టీమిండియా 2022-23 హోమ్‌ సీజన్‌ శ్రీలంకతో జరగబోయే టీ20 సిరీస్‌తో ప్రారంభమవుతుంది. మొదట ఆ టీమ్‌తో మూడు టీ20ల సిరీస్‌ జరుగుతుంది. జనవరి 3న ముంబైలో జరిగే తొలి టీ20తో ఈ సిరీస్ ప్రారంభమవుతుంది. ఆ తర్వాత జనవరి 5న పుణెలో రెండో టీ20, జనవరి 7న రాజ్‌కోట్‌లో మూడో టీ20 జరుగుతుంది.

ఇక ఆ వెంటనే మూడు వన్డేల సిరీస్‌ ప్రారంభమవుతుంది. జనవరి 10న గువాహటిలో తొలి వన్డే జరుగుతుంది. ఇక జనవరి 12న కోల్‌కతాలో రెండో వన్డే, జనవరి 15న త్రివేండ్రంలో మూడో వన్డే జరుగుతుంది. ఈ మ్యాచ్‌తో ఇండియాలో శ్రీలంక టూర్‌ ముగుస్తుంది.

న్యూజిలాండ్‌ సిరీస్‌ షెడ్యూల్‌ ఇదే..

శ్రీలంక వెళ్లిపోగానే ఇండియా టూర్‌కు న్యూజిలాండ్‌ రానుంది. మొదట ఆ టీమ్‌తో మూడు వన్డేల సిరీస్ జరుగుతుంది. ఇందులో భాగంగా జనవరి 18న హైదరాబాద్‌లో ఇండియా, న్యూజిలాండ్‌ తొలి వన్డే జరుగుతుంది. జనవరి 21న రెండో వన్డే రాయ్‌పూర్‌లో, జనవరి 24న మూడో వన్డే ఇండోర్‌లో ఉంటాయి.

ఇక ఆ తర్వాత న్యూజిలాండ్‌తోనే మూడు టీ20ల సిరీస్‌ ప్రారంభమవుతుంది. తొలి టీ20 జనవరి 27న రాంచీలో, రెండో టీ20 జనవరి 29న లక్నోలో, మూడో టీ20 ఫిబ్రవరి 1న అహ్మదాబాద్‌లో జరుగుతాయి. ఈ మ్యాచ్‌తో ఇండియాలో న్యూజిలాండ్‌ టూర్‌ ముగుస్తుంది.

ఆస్ట్రేలియాతో సిరీస్‌ షెడ్యూల్‌ ఇదే

న్యూజిలాండ్‌ వెళ్లిపోయిన తర్వాత నాలుగు టెస్ట్‌ల సిరీస్‌ కోసం ఆస్ట్రేలియా.. ఇండియా రానుంది. బోర్డర్‌ గవాస్కర్‌ ట్రోఫీలో భాగంగా ఈ రెండు టీమ్స్‌ మధ్య నాలుగు టెస్టులు జరుగుతాయి. తొలి టెస్ట్‌ ఫిబ్రవరి 9 నుంచి 13 వరకూ నాగ్‌పూర్‌లో జరుగుతుంది. ఆ తర్వాత రెండో టెస్ట్‌ ఫిబ్రవరి 17 నుంచి 21 వరకూ ఢిల్లీలో ఉంటుంది.

మూడో టెస్ట్‌ మ్యాచ్‌ మార్చి 1 నుంచి 5 వరకూ ధర్మశాలలో జరగనుంది. నాలుగో టెస్ట్‌ అహ్మదాబాద్‌లో మార్చి 9 నుంచి 13 వరకూ జరుగుతుందని బీసీసీఐ వెల్లడించింది. ఐదేళ్ల తర్వాత తొలిసారి టెస్ట్‌ సిరీస్‌ ఆడటానికి ఇండియాకు వస్తుంది ఆస్ట్రేలియా టీమ్‌. 2017లో చివరిసారి నాలుగు టెస్ట్‌ల సిరీస్‌ కోసం స్టీవ్‌ స్మిత్‌ కెప్టెన్సీలోని ఆస్ట్రేలియా ఇక్కడికి రాగా.. 1-2తో సిరీస్‌ కోల్పోయింది.

ఈ గ్యాప్‌లో రెండుసార్లు ఆస్ట్రేలియా వెళ్లిన ఇండియా.. రెండు టెస్ట్‌ సిరీస్‌లలోనూ విజయాలు సాధించింది. ఆస్ట్రేలియాను సొంతగడ్డపై వరుసగా రెండు సిరీస్‌లలో ఓడించిన తొలి టీమ్‌గా నిలిచింది. టెస్ట్‌ సిరీస్‌ ముగిసిన తర్వాత ఇండియా, ఆస్ట్రేలియా మూడు వన్డేల సిరీస్‌ ఆడతాయి. ఈ మ్యాచ్‌లు మార్చి 17, 19, 22వ తేదీల్లో ముంబై, వైజాగ్‌, చెన్నైలలో జరుగుతాయి.