Cheap Bikes 2021: లక్షలోపు ధర​లో 2021లో బెస్ట్​ బైక్స్ ఇవే.. ఓ లుక్కేయండి

Cheap Bikes 2021.. 2020తో పోలిస్తే 2021లో ఆటో పరిశ్రమ మిశ్రమ ఫలితాలు అందుకుంది. కరోనా మహమ్మారి కారణంగా కొంత ఒడుదొడుకులకు గురైనప్పటికీ తిరిగి పుంజుకుంది. ముఖ్యంగా ప్రజా రవాణాకు బదులు ప్రైవేటు రవాణాను అధికంగా ఉపయోగిస్తున్నారు. ఈ కారణంగా మోటార్ సైకిళ్లు, స్కూటర్లకు డిమాండ్ పెరిగింది. ప్రధానంగా కమ్యూటర్ సెగ్మెంట్​ టూ-వీలర్లను ఎక్కువగా కొనుగోలు చేస్తున్నారు. ఎప్పటిలానే ఈ సంవత్సరం కూడా ఈ విభాగానిదే ఆధిపత్యం. ధర తక్కువగా ఉండి, మైలేజ్​ ఎక్కువగా ఇచ్చే మోటార్​ సైకిళ్లపై వినియోగదారులు ఎక్కువ ఆసక్తి చూపుతున్నారు. ఈ నేపథ్యంలో లక్ష లోపు కాస్ట్​లో 2021లో టాప్ మోటార్ సైకిళ్లేంటో ఇప్పుడు చూద్దాం.

బజాజ్ పల్సర్ 125..

లక్షలోపు ధరలో పవర్​ఫుల్ బైక్ కావాలంటే పల్సర్ 125 అత్యుత్తమమైంది. పల్సర్ 150 డిజైన్​నే కలిగి ఉండటమే కాకుండా మైలేజ్ విషయంలో ఆ బైక్ కంటే మెరుగ్గా ఉంటుంది. బాడీ ప్యానెళ్లు, టైర్లు, డిస్క్ బ్రేకులు, ఛేసిస్, సస్పెన్షన్ ప్రతి అంశంలోనూ 150సీసీ సెగ్మెంట్ మాదిరిగానే పనితీరు ఉంటుంది. ఆ బైక్ కు 125సీసీ మోడల్​కు ఉన్న పెద్ద వ్యత్యాసం ఫ్యూయల్ ట్యాంక్ మాత్రమే. పల్సర్ 125 ఫ్యూయల్ ట్యాంక్ పరిమాణం కొంచెం చిన్నగా ఉంటుంది. ఫలితంగా 4 కేజీల బరువు తగ్గుతుంది. ఇవి కాకుండా స్టైలింగ్, డిజైన్ లాంటి అన్ని విషయాల్లో సేమ్ టు సేమ్ ఉంటుంది. ఎక్స్ షోరూంలో ఈ బైక్ ధర రూ.72,122 నుంచి రూ.80,218లుగా కంపెనీ నిర్దేశించింది.

టీవీఎస్ రైడర్..

చాలా కాలం తర్వాత టీవీఎస్ సంస్థ 125 సీసీ సెగ్మెంట్లో ఓ బైక్​ను లాంచ్ చేసింది. అదే టీవీఎస్ రైడర్ మోడల్. బజాజ్ ఎన్ఎస్ 125 బైక్​ను పోలి ఉండే ఈ మోటార్ సైకిల్లో ఎన్నో అధునాతన ఫీచర్లు ఉన్నాయి. ఇది 124.8 సీసీ బీఎస్6 ఇంజిన్​ను కలిగి ఉండి 11.2 బీహెచ్​పీ బ్రేక్ హార్స్ పవర్, 11.2 ఎన్ఎం టార్క్​ను ఉత్పత్తి చేస్తుంది. కమ్యూనిటీ మోటార్ సైకిల్ సెగ్మెంట్​లో అత్యుత్తమ బైక్​గా సంస్థ పేర్కొంది. ఎక్స్ షోరూంలో ఈ మోటార్ సైకిల్ ధర రూ.77,500 నుంచి 90,989 మధ్యలో ఉంటుంది.

హోండా ఎస్పీ125..

మార్కెట్​లో బాగా విజయవంతమైన మోడల్ సీబీ షైన్ ఎస్పీ. దీనికి సంబంధించిన బీఎస్6 మోడల్ ను హోండా ఈ ఏడాది విడుదల చేసింది. పాత మోడల్ మాదిరిగానే అన్ని ఫీచర్లు ఇందులోనూ ఉంటాయి. అంతేకాకుండా ఆ బండితో పోలిస్తే ప్రీమియం లుక్ తో మరింత స్టైలిష్ గా కనిపిస్తుంది. ఈ ఎస్పీ125 మోడల్ రెండు వేరియంట్లలో లభ్యమవుతుంది. డ్రమ్, డిస్క్ బ్రేక్స్ ను కలిగి ఉంటుంది. ఇది 124 సీసీ ఇంజిన్ ను కలిగి ఉండి 10.72 బీహెచ్​పీ బ్రేక్ హార్స్ పవర్, 10.9 ఎన్ఎం టార్క్ ను ఉత్పత్తి చేస్తుంది. ఎక్స్ షోరూంలో ఈ బైక్ ధర రూ.78,844 నుంచి రూ. 83,134 రేంజ్​లో ఉంటుంది.

బజాజ్ ఎన్ఎస్ 125..

నేకెడ్ టైప్ కావాలంటే కమ్యూటర్ మోటార్ సైకిళ్లలో బెస్ట్ ఆప్షన్ ఎన్ఎస్ 125 మోడలే. పల్సర్ సెగ్మెంట్​లో వచ్చే ఈ మోటార్ సైకిల్​కు యువతలో మంచి ఫాలోయింగ్ ఉంది. ఎక్స్ షోరూంలో ఈ పల్సర్ ఎన్ఎస్125 ప్రారంభ ధర వచ్చేసి రూ.99,192లు ఉంటుంది. సింగిల్ వేరియంట్లో మాత్రమే లభ్యమయ్యే ఈ మోటార్ సైకిల్ నాలుగు రంగుల్లో వస్తుంది. 124.45సీసీ బీఎస్6 ఇంజిన్ ను కలిగి ఉండి 11.6 బీహెచ్​పీ బ్రేక్ హార్స్ పవర్, 11ఎన్ఎం టార్క్​ను ఉత్పత్తి చేస్తుంది. అంతేకాకుండా ఫ్రంట్ డిస్క్ బ్రేక్, వెనుక డ్రమ్ బ్రేక్స్ ను కలిగి ఉంటుంది. దీని బరువు 144 కేజీలు ఉండగా.. ఫ్యూయల్ ట్యాంక్ కెపాసిటీ 12 లీటర్లు ఉంటుంది.