Tailor attacks customer | కత్తెరతో కస్టమర్​పై టైలర్​ దాడి.. నడిరోడ్డు మీద..!

Pant alteration dispute | మహారాష్ట్ర ముంబయిలో దారుణ ఘటన వెలుగులోకి వచ్చింది. ఓ టైలర్​.. తన కస్టమర్​పై నడిరోడ్డు మీద కత్తెరతో దాడి చేశాడు. పారిపోయేందుకు ప్రయత్నించిన కస్టమర్​ను వెంబడించి పట్టుకుని, కత్తెరతో అనేకమార్లు పొడిచాడు. రూ. 30 కోసం జరిగిన గొడవ ఇందుకు కారణం.

రూ. 30 కోసం..

రోహిత్​ యాదవ్​ అనే వ్యక్తి అంధేరీలోని ఓ కంపెనీలో హెచ్​ఆర్​ మేనేజర్​గా పనిచేస్తున్నాడు. సోమవారం.. ఇంటి దగ్గర ఉన్న హరీశ్​ ఠాకర్​(40) అనే టైలర్​ దగ్గరికి వెళ్లాడు. తన ప్యాంట్​ ఆల్ట్రేషన్​ చేయమని చెప్పి ఠాకర్​కు ఇచ్చాడు. రూ. 100 అవుతుందని టైలర్​ చెప్పగా.. సరే అని రోహిత్​ వెళ్లిపోయాడు.

అదే రోజు మధ్యాహ్నం.. పనైపోయిందని, వచ్చి ప్యాంట్​ తీసుకోవాలని రోహిత్​కు హరీశ్​ ఫోన్​ చేశాడు. అక్కడి రోహిత్​ వెళ్లగా.. తొందరగా పనిపూర్తి చేశానని, అందుకే మొత్తం 130 రూపాయలు ఇవ్వాలని హరీశ్​ డిమాండ్​ చేశాడు. తాను రూ. 100 మాత్రమే ఇస్తానని రోహిత్​ వాదించాడు. వారి మధ్య కొంతసేపు వాగ్వాదం నడిచింది.

రూ. 100 ఇచ్చి ప్యాంట్​ తీసుకుని వెళ్లిపోయాడు రోహిత్​. అది చూసి హరీశ్​కు కోపమొచ్చింది. తన కత్తెరతో రోహిత్​ను వెంబడించాడు. నడిరోడ్డు మధ్యలో రోహిత్​ను ఆపి కత్తెరతో బెదిరించాడు. భయపడిన రోహిత్​.. హరీశ్​ను శాంతిపజేసేందుకు ప్రయత్నించాడు. కానీ ఆ టైలర్​ మాత్రం తన చేతిలో ఉన్న కత్తెరతో రోహిత్​ కడుపులో పొడిచాడు. పారిపోడానికి ప్రయత్నించిన రోహిత్​ను.. హరీశ్​ పట్టుకుని మరీ పలుమార్లు దాడి చేశాడు. ఆ తర్వాత టైలర్​ అక్కడి నుంచి పారిపోయాడు. స్థానికులు.. రోహిత్​ను ఆసుపత్రిలో చేర్చారు.

ఘటనపై సమాచారం అందుకున్న పోలీసులు హరీశ్​ ఠాకర్​ కోసం తీవ్రంగా గాలించారు. మంగళవారం అతడిని పట్టుకుని అరెస్ట్​ చేశారు.