The Kerala story ban : ‘ది కేరళ స్టోరీ’ విడుదలపై స్టే ఇవ్వము- సుప్రీంకోర్టు

The Kerala story Supreme court : వివాదాస్పదంగా మారిన 'ది కేరళ స్టోరీ' సినిమా రిలీజ్​ను అడ్డుకోవాలంటూ దాఖలైన పిటిషన్లను సుప్రీంకోర్టు కొట్టివేసింది. ఫలితంగా ఈ సినిమా మే 5న యథావిథిగా విడుదలకానుంది.!

కేరళ స్టోరీ చుట్టూ వివాదం..

ఐఎస్​లో చేరి సిరియా, అఫ్గానిస్థాన్​కు వెళ్లే విధంగా వేలాది మంది ముస్లిం మహిళలను ఏ విధంగా బ్రెయిన్​వాష్​ చేశారు? అన్న కథతో ఈ చిత్రాన్ని తెరకెక్కించారు. ఈ సినిమాకు సుదీప్తో సేన్​ దర్శకత్వం వహించగా.. విపుల్​ అమృత్​లాల్​ షా నిర్మాతగా వ్యవహరించారు. ప్రముఖ నటి అదా శర్మతో పాటు యోగిత శర్మ, సిద్ధి ఇద్నాని, సోనియా బలానీలు కీలక పాత్రలు పోషించారు.

The Kerala story release date : ఈ సినిమా ఆడియో, వీడియో .. విద్వేషపూరితంగా ఉన్నాయని, రిలీజ్​ను అడ్డుకోవాలని పిటిషనర్లు ఆరోపించారు. ఇక మంగళవారం సుప్రీంకోర్టులో జరిగిన విచారణలో భాగంగా.. సీనియర్​ అడ్వకేట్​ కపిల్​ సిబల్​తో పాటు న్యాయవాది నిజామ్​ పాషాలు సినిమాకు వ్యతిరేకంగా వాదనలు వినిపించారు. ఈ సినిమా ట్రైలర్​కు 16మిలియన్​ వ్యూస్​ వచ్చాయని, కానీ ఇందులో విద్వేష ప్రసంగాలు ఎక్కువగా ఉన్నాయని పేర్కొన్నారు.

ఇందుకు స్పందించిన సుప్రీంకోర్టు.. "విద్వేష ప్రసంగాల్లో చాలా రకాలు ఉన్నాయి. ఈ సినిమాకు సెన్సార్​ సర్టిఫికేట్​ వచ్చింది. బోర్డు క్లియర్​ చేసింది. సినిమా రిలీజ్​పై స్టే విధించాలని అడగడం సరికాదు. సరైన వేదికపై సర్టిఫికేషన్​ను సవాలు చేయండి," అని స్పష్టం చేసింది. ఈ వ్యవహారంపై రిట్​ పిటిషన్​ దాఖలు చేయాలని జస్టిస్​ జోసెఫ్​ సూచించగా.. ముందు హైకోర్టుకు వెళ్లాలని జస్టిస్​ నాగరత్న అభిప్రాయపడ్డారు.

The Kerala story latest news : అయితే.. సినిమా రిలీజ్​ డేట్​ సమిపిస్తోందని, హైకోర్టుకు వెళ్లే టైమ్​ లేదని న్యాయావాది పాషా వాదించారు. ఈ వాదనను ధర్మాసనం తిరస్కరించింది. సినిమాపై స్టే విధించేందుకు ఈ వాదన సరైనది కాదని పేర్కొంది. ఇలాంటివి తీసుకుని సుప్రీంకోర్టుకు ఎవరూ రావద్దని ధర్మాసనం హెచ్చరించింది.

సినిమాపై రాజకీయ దుమారం..

ఈ సినిమాపై కేరళలోని అధికార ఎల్​డీఎఫ్​, విపక్షాలు యూడీఎఫ్​- కాంగ్రెస్​లు తీవ్రస్థాయిలో మండిపడుతున్నాయి. సినీ బృందం.. సంఘ్​ పరివార్​ చేసే ప్రచారాలను ప్రోత్సహిస్తూ, కేరళలో మత తీవ్రవాదాన్ని పెంచుతోందని విమర్శిస్తున్నాయి. రాష్ట్రంలో మతసామరస్యాన్ని నాశనం చేసి, సమాజంలో విషాన్ని చిమ్మేందుకు ప్రయత్నాలు జరుగుతున్నాయని మండిపడ్డారు సీఎం పినరయి విజయన్​.

The Kerala Story ban : సీఎం, కాంగ్రెస్​ ఆరోపణలను బీజేపీ కొట్టిపారేసింది. వివాదాస్పద చిత్ర ది కేరళ స్టోరీకి మద్దతిచ్చింది.

ది కేరళ స్టోరీ వ్యవహారంపై కాంగ్రెస్​ ఎంపీ శశి థరూర్​ స్పందించారు. "ఈ సినిమాను నిషేధించాలని నేను చెప్పను. భావప్రకటనా స్వేచ్ఛను దుర్వినియోగించినంత మాత్రాన అది విలువలేకుండా పోదు. కానీ ఈ సినిమా వాస్తవానికి చాలా దూరంలో ఉందని మాట్లాడే హక్కు ప్రతి కేరళవాసికి ఉంది," అని వ్యాఖ్యానించారు.