గుడ్​ న్యూస్​.. పెట్రోల్​, డీజిల్​పై వ్యాట్​ తగ్గించిన ఆ రాష్ట్ర ప్రభుత్వం

Petrol Diesel price | పెట్రోల్​, డీజిల్​పై కేంద్రం శనివారం వ్యాట్​ తగ్గించగా.. ఆ జాబితాలోకి రాష్ట్ర ప్రభుత్వాలు సైతం చేరుతున్నాయి. రాజస్థాన్​, కేరళ ప్రభుత్వాలు.. పెట్రోల్,​ డీజిల్​పై సుంకాన్ని తగ్గిస్తున్నట్టు ఇప్పటికే ప్రకటించాయి. తాజాగా.. ఈ జాబితాలోకి మహారాష్ట్ర కూడా చేరింది. రాష్ట్రంలో లీటరు పెట్రోల్​పై రూ. 2.08, లీటరు డీజిల్​పై రూ. 1.44 తగ్గిస్తున్నట్టు.. శివసేన ప్రభుత్వం ఆదివారం ప్రకటించింది. దీంతో తమకు రూ. 2,500కోట్ల మేర నష్టం కలుగుతుందని వెల్లడించింది.

మహారాష్ట్ర ప్రభుత్వ నిర్ణయంతో ముంబైలో లీటరు పెట్రోల్​ రూ. 109.27కు, లీటరు డీజిల్​ 95.84కు చేరింది.

తమిళనాడు 'నో'...!

పెట్రోల్​, డీజిల్​పై వ్యాట్​ను తగ్గించే యోచనలో లేనట్టు తమిళనాడు ప్రభుత్వం సంకేతాలిచ్చింది. పన్నులు పెంచే సమయంలో ప్రభుత్వాలను కేంద్రం సంప్రదించలేదని, రాష్ట్రానికి ఇప్పటికే రూ. 1000కోట్ల నష్టం వాటిల్లిందని పేర్కొంది. వ్యాట్​ రూపంలో కేంద్రానికి ఆదాయం చాలా రెట్లు పెరిగిందని, రాష్ట్రాల పరిస్థితి మాత్రం దారుణంగా ఉందని వెల్లడించింది.

మరోవైపు వ్యాట్​ను తగ్గించే అంశాన్ని పరిశీలిస్తామని కర్ణాటక ముఖ్యమంత్రి బసవరాజ్​ బొమ్మై తెలిపారు. మధ్యప్రదేశ్​ ప్రభుత్వం సైతం సుంకాలను తగ్గించాలని విపక్షాల నుంచి డిమాండ్లు పెరుగుతున్నాయి.

రాష్ట్రానికి రావాల్సిన నిధులు.. తమకు అందిన తర్వాత.. పెట్రోల్​, డీజిల్​పై సుంకాలను తగ్గించే ఆలోచనలు చేస్తామని పశ్చిమ్​ బెంగాల్​ తేల్చిచెప్పింది.

ఈ వ్యవహారంపై కాంగ్రెస్​ సీనియర్​ నేత పీ. చిదంబరం స్పందించారు. 'రాష్ట్రాలకు ఇప్పటికే కేంద్రం చాలా తక్కువ నిధులు ఇస్తోంది. మరి వ్యాట్​ తగ్గించేందుకు రాష్ట్రాలు ముందుకొస్తాయో లేదో వేచి చూడాలి,' అని అనుమానం వ్యక్తం చేశారు.

కేంద్రం అనూహ్య నిర్ణయం..

Petrol Diesel price today | దేశ ప్ర‌జ‌ల‌పై పెను భారంగా ప‌రిణ‌మించిన పెట్రో ధ‌ర‌ల‌ను త‌గ్గించే దిశ‌గా కేంద్ర ప్ర‌భుత్వం నిర్ణ‌యం తీసుకుంది. పెట్రోలు, డీజిల్‌ల‌పై ఎక్సైజ్ పన్నును గ‌ణ‌నీయంగా త‌గ్గించింది. పెట్రోలుపై లీట‌రుకు రూ. 8, డీజిల్‌పై లీట‌రుకు గ‌రూ. 6 ల మేర‌కు ఎక్సైజ్ ప‌న్నును త‌గ్గించింది. ఈ మేర‌కు కేంద్ర ఆర్థిక మంత్రి నిర్మ‌ల సీతారామ‌న్ శ‌నివారం ప్ర‌క‌ట‌న చేశారు. ఈ నిర్ణ‌యం కార‌ణంగా ప్ర‌భుత్వంపై సంవ‌త్స‌రానికి రూ. ల‌క్ష కోట్ల భారం ప‌డ‌నుంద‌ని వెల్ల‌డించారు.

పెట్రో ధ‌ర‌ల కార‌ణంగా ద్ర‌వ్యోల్బ‌ణం కూడా క‌ట్ట‌డి చేయ‌లేని స్థాయికి పెరుగుతున్న నేప‌థ్యంలో కేంద్రం ఈ నిర్ణ‌యం తీసుకుంది. ఎక్సైజ్ ప‌న్ను త‌గ్గింపుతో పెట్రోలు ధ‌ర లీట‌రుకు రూ. 9.50, డీజిల్ ధ‌ర లీట‌రుకు రూ. 7 వ‌ర‌కు త‌గ్గనుంది. అంటే, ఢిల్లీలో ఆదివారం నుంచి పెట్రోలు ధ‌ర లీట‌రుకు రూ. 95.91గా, డీజిల్ ధ‌ర లీట‌రుకు రూ. 89.67గా ఉండ‌నుంది. ప్ర‌స్తుతం ఢిల్లీలో లీట‌రు పెట్రోలు రూ. 105.41గా, లీట‌రు డీజిల్ రూ. 96.67గా ఉంది.