'‘అదానీ’ కోసం శ్రీలంకపై ప్రధాని మోదీ ఒత్తిడి?'
13 June 2022, 17:02 IST
- శ్రీలంకలో ఓ పవర్ ప్రాజెక్ట్ చుట్టూ వివాదం రాజుకుంది. ఆ ప్రాజెక్టు.. అదానీ గ్రూప్నకు ఇవ్వాలంటూ ప్రధాని మోదీ.. శ్రీలంక అధ్యక్షుడిపై ఒత్తిడి తెచ్చారని ఓ అధికారి వ్యాఖ్యానించారు. ఆ తర్వాత కొన్ని రోజులకే ఆయన పదవి నుంచి తప్పుకున్నారు!
ప్రధాని నరేంద్ర మోదీ
శ్రీలంకలోని పవర్ ప్రాజెక్టులు అదానీ గ్రూప్నకు దక్కే విధంగా చూడాలని ఆ దేశాధ్యక్షుడు గొటబాయ రాజపక్సపై ప్రధాని మోదీ ఒత్తిడి తెచ్చారంటూ ఓ అధికారి చేసిన వ్యాఖ్యలు సంచలనం సృష్టించాయి. కాగా.. ఈ వ్యాఖ్యలు చేసిన మూడు రోజులకే.. ఆ అధికారి తన పదవి నుంచి తప్పుకున్నారు.
ఇదీ వివాదం..
శ్రీలంకలోని మన్నర్ జిల్లాలో.. 500మెగావాట్ల రినవెబుల్ ఎనర్జీ ప్రాజెక్టును నిర్మించాల్సి ఉంది. దీనితో పాటు 10మెగా వాట్ల ప్రాజెక్టుకు సంబంధించిన కాంట్రాక్టు.. భారత్కు చెందిన అదానీ గ్రూప్నకు గతేడాది డిసెంబర్లో దక్కిందని వార్తలొచ్చాయి.
కాగా.. ఈ ప్రాజెక్టు చుట్టూ గత కొంత కాలంగా ఎన్నో వివాదాలు రాజుకున్నాయి. ఇటీవలి కాలంలో ఈ వివాదం మరోమారు వార్తల్లో నిలిచింది. శ్రీలంక పార్లమెంట్లో ఈ ప్రాజెక్టుపై చర్చ జరిగింది. అక్కడి ప్రభుత్వం.. ఎనర్జీ ప్రాజెక్టుకు సంబంధించిన బిడ్డింగ్ ప్రక్రియను తొలగించేందుకు బిల్లు ప్రవేశపెట్టింది. విపక్షాల నిరసనల మధ్య ఈ బిల్లు పార్లమెంట్లో గట్టెక్కింది. కాగా.. అదానీ గ్రూప్నకు ఈ ప్రాజెక్టును ఇచ్చేందుకే.. బిడ్డింగ్ ప్రక్రియను తొలగించిందని విపక్షాలు మండిపడ్డాయి. బిడ్డింగ్ను తిరిగి ప్రవేశపెట్టాలన్న వారి డిమాండ్లను ప్రభుత్వం పట్టించుకోలేదు!
కాగా.. గత శుక్రవారం ఈ వివాదం తీవ్ర రూపం దాల్చింది. ఎనర్జీ ప్రాజెక్టు.. అదానీ గ్రూప్నకు దక్కెట్టు చూడాలని.. శ్రీలంక అధ్యక్షుడు గొటబాయ రాజపక్సపై భారత ప్రధానమంత్రి నరేంద్ర మోదీ ఒత్తిడి తీసుకొచ్చారని ఓ ఉన్నతాధికారి వ్యాఖ్యలు చేయడం తీవ్ర దుమారానికి దారితీసింది.
"ప్రధాని మోదీ.. తనను ఒత్తిడి చేస్తున్నారని రాజపక్స నాతో చెప్పారు. అదానీ గ్రూప్నకు ఆ ప్రాజెక్టు ఇవ్వాలని మోదీ అడుగుతున్నారట," అని.. సీఈబీ(సిలోన్ ఎలక్ట్రిసిటీ బోర్డు) ఛైర్మన్ ఎంఎంసీ ఫెర్డినాండో అన్నారు. సీఓపీఈ(కమిటీ ఆన్ పబ్లిక్ ఎట్రిప్రైజెస్)కి చెందిన కార్యక్రమంలో భాగంగా ఆయన ఈ వ్యాఖ్యలు చేశారు.
ఫెర్డినాండో వ్యాఖ్యలు వివాదాస్పదంగా మారాయి. ఈ వ్యవహారంపై గొటబాయ రాజపక్స వివరణ ఇవ్వాల్సి వచ్చింది.
"ఫెర్డినాండో వ్యాఖ్యలను నేను ఖండిస్తున్నాను. ఒక వ్యక్తికి లేదా సంస్థకు.. ఆ ప్రాజెక్టు కేటాయించాలని నేను ఎవరికి, ఎప్పుడు చెప్పలేదు. నాపై ఎలాంటి ఒత్తిడి లేదు," అని రాజపక్స స్పష్టం చేశారు.
"శ్రీలంకలో ప్రస్తుతం తీవ్ర విద్యుత్ కొరత ఉంది. దానిని పరిష్కరించేందుకు మెగా పవర్ ప్రాజెక్టును వెంటనే నిర్మించాలని ఆయన భావిస్తున్నారు. కానీ ఈ వ్యవహారంలో ఆయనపై ఎలాంటి ఒత్తిడి లేదు," అని అధ్యక్షుడి కార్యాలయం ఓ ప్రకటనను విడుదల చేసింది.
ఒక రోజు తర్వాత.. తన వ్యాఖ్యలకు క్షమాపణలు చెప్పారు ఫెర్డినాండో. తీవ్ర భావోద్వేగం, తీవ్ర ఒత్తిడి నేపథ్యంలో అనుకోకుండా ప్రధాని మోదీ పేరు వచ్చిందని వివరణ ఇచ్చారు.
ఈ వ్యవహారం జరిగిన అనంతరం.. ఫెర్డినాండో.. సోమవారం తన పదవి నుంచి తప్పుకున్నారు.