చింతన్ శివిర్: రాహుల్ గాంధీ అధ్యక్షుడయ్యేలా పార్టీ శ్రేణుల ప్రయత్నాలు

మార్చి 14న జరిగిన కాంగ్రెస్‌ వర్కింగ్‌ కమిటీ (సీడబ్ల్యూసీ) సమావేశంలో రాహుల్‌ గాంధీ కాంగ్రెస్‌ అధ్యక్ష పదవిని చేపట్టాలని పార్టీ అగ్రనేతలు డిమాండ్‌ చేశారు.

ఈ సమావేశంలో కాంగ్రెస్ సీనియర్ నాయకుడు అధిర్ రంజన్ చౌదరి రాహుల్ గాంధీ అధ్యక్ష పదవిని అంగీకరించాలని చెప్పినట్లు పార్టీ వర్గాలు తెలిపాయి.

‘రాహుల్ అధ్యక్ష పదవిని పరిగణనలోకి తీసుకోవడానికి సిద్ధంగా ఉన్నారు. అలాగే ఆగస్టు-సెప్టెంబర్‌లో అధ్యక్ష ఎన్నికలను నిర్వహించాలని సమావేశంలో ప్రతిపాదన వచ్చింది. అయితే ఇప్పటికే కొనసాగుతున్న సంబంధిత ప్రక్రియను ప్రీ-పోన్ చేయలేమని ఆ సమావేశంలో నిర్ణయించారు..’ అని పార్టీ వర్గాలు తెలిపాయి.

2019లో ఓటమి తరువాత రాహుల్ గాంధీ కాంగ్రెస్ అధ్యక్ష పదవికి రాజీనామా చేశారు. సోనియా గాంధీ పార్టీ తాత్కాలిక అధ్యక్షురాలిగా వ్యవహరిస్తున్నారు.

ఉదయ్‌పూర్‌లో జరగనున్న చింతన్ శివిర్‌లో కాంగ్రెస్ అధ్యక్ష పదవికి సంబంధించి చర్చలు, కీలక నిర్ణయాలు తీసుకోనున్నారు.

ఈ ఏడాది ప్రారంభంలో జరిగిన ఐదు రాష్ట్రాల అసెంబ్లీ ఎన్నికల్లో పార్టీ పరాజయం పాలైన నేపథ్యంలో చింతన్ శివిర్ నిర్వహిస్తున్నారు. గత ఎనిమిదేళ్లలో జరిగిన ఎన్నికల్లో పార్టీ అనేక పరాజయాలను చవిచూసింది. కాంగ్రెస్‌కు చెందిన కొంతమంది ప్రముఖులు పార్టీని వీడివెళ్లారు. 

రేపు మే 13న సోనియా గాంధీ ప్రజలనుద్దేశించి ప్రసంగించడంతో ప్రారంభమై మే 14న రాహుల్ గాంధీ ప్రసంగంతో చింతన్ శివిర్ ముగుస్తుంది.