భోజనం ఆలస్యమైందని.. పెళ్లి మండపం నుంచి వెళ్లిపోయిన వరుడు!

వివాహ వేడుకలు అర్థాంతరంగా ఆగిపోయిన ఎన్నో ఘటనలను ఈ మధ్యకాలంలో మనం వింటూనే ఉన్నాము. వైరల్​గా మారిన ఆ దృశ్యాలను చూస్తూనే ఉన్నాము. తాజాగా.. బిహార్​ పూర్ణియాలో ఇలాంటి ఘటనే వెలుగులోకి వచ్చింది. వరుడు.. ఒక్కసారిగా పెళ్లి మండపం నుంచి వెళ్లిపోయాడు. తమ బంధువులకు.. సమయానికి భోజనం పెట్టలేదనే కోపంతో అతడు ఈ పనిచేసినట్టు తెలుస్తోంది.

కోపం వచ్చేసింది..

బటౌనా గ్రామంలోని ఈశ్వరీ టౌలాలో కొన్ని రోజుల క్రితం ఓ వివాహ వేడుక అంగరంగ వైభవంగా జరిగింది. వరుడు.. బారాత్​లో పెళ్లి మండపానికి చేరుకున్నాడు. కోలాహలంతో ఆ ప్రాంగణం నిండిపోయింది. ఇక్కడ వరకు అంతా బాగానే ఉన్నప్పటికీ.. కొద్ది సేపటికే.. జరగాల్సిన పెళ్లి ఆగిపోయింది.

బారాత్​ ముగించుకుని అనుకున్న సమయానికి పెళ్లి మండపానికి వెళ్లింది వరుడు రాజ్​కుమార్​ బృందం. కానీ వారికి భోజనం ఆలస్యమైంది. బహుశా మంచి ఆకలి మీద ఉన్నారు అనుకుంటా.. వరుడి తరఫున బంధువులకు చిర్రెత్తుకొచ్చింది. ఇక రాజ్​కుమార్​ తండ్రి అయితే ఏకంగా అక్కడి వారిని తిట్టడం మొదలుపెట్టారు. పెళ్లి ఆపేసి, వెనక్కి వెళ్లిపోదామని ఆయన నిర్ణయించుకున్నారు.

కానీ అక్కడి స్థానికులు, పంచాయతీ పెద్దలు వరుడి తండ్రిని శాంతింపజేసే పనిలో పడ్డారు. కొద్దిసేపు.. ఆ తండ్రిని బుజ్జగించారు. శాంతించిన తండ్రి.. పెళ్లికి ఒప్పుకున్నాడు. ఇక సమస్య పరిష్కారమైనట్టే! అన్న దశలో మరో ట్విస్ట్​ ఎదురైంది. 

వరుడు రాజ్​కుమార్​.. అప్పటికే పెళ్లి మండపాన్ని విడిచిపెట్టి వెళ్లిపోయాడు. ఇక చివరికి పెళ్లిని నిలిపివేశారు. అయితే వరుడు తండ్రి.. పెళ్లి ఖర్చులు వధువు తండ్రికి ఇచ్చినట్టు తెలుస్తోంది. బైక్​, ఇతర కానుకలకు సంబంధించిన నగదును వధువు కుటుంబానికి తిరిగిచ్చేసినట్టు సమాచారం.

ఈ కథ ఇంతటితో ముగియలేదు. ఆ తర్వాత.. వధువు తల్లి నేరుగా కస్బా పోలీస్​ స్టేషన్​కు వెళ్లింది. జరిగింది అంతా చెప్పి, వరుడు, అతడి తండ్రిపై ఫిర్యాదు చేసేసింది. అప్పుడే ఈ ఘటన వెలుగులోకి వచ్చింది. పోలీసులు ప్రస్తుతం ఈ వ్యవహారంపై దర్యాప్తు చేపట్టారు.