Monsoon health guide: వర్షాకాలంలో వైరల్ ఫీవర్, ఇన్ఫెక్షన్ల లక్షణాలు.. నిపుణులు చెబుతున్న నివారణ మార్గాలివే

కాలానుగుణ వాతావరణ మార్పులు ప్రతి వ్యక్తిని భిన్నంగా ప్రభావితం చేస్తాయి. ఒక్కొక్కరి రోగనిరోధక శక్తి వేరువేరుగా ఉండటమే దానికి కారణం. కొందరు ఎటువంటి ఆరోగ్య ప్రభావాలు లేకుండా కాలానుగుణ మార్పులను ఎదుర్కోగలరు. మరికొందరు వైరల్ జ్వరాలు, ఇతర ఆరోగ్య సంబంధిత సమస్యలతో బాధపడుతుంటారు. 

వర్షాకాలంలో తెచ్చే వైరల్ ఇన్ఫెక్షన్లను అవి ఎలా వ్యాప్తి చెందుతాయనే దాని ఆధారంగా వివిధ గ్రూపులుగా విభజించవచ్చని మహిమ్లోని ఎస్ఎల్ రహేజా హాస్పిటల్ సీనియర్ కన్సల్టెంట్ (ఇంటర్నల్ మెడిసిన్) డాక్టర్ పరితోష్ బఘేల్ హెచ్టి లైఫ్స్టీకి ఇచ్చిన ఇంటర్వ్యూలో అన్నారు

• గాలి ద్వారా వచ్చే వైరల్ ఇన్ఫెక్షన్లలో సాధారణ జలుబు, ఇన్ఫ్లుఎంజా, వైరల్ ఫ్లూ రావచ్చు.
• వైరల్ గ్యాస్ట్రోఎంటెరిటిస్, డయేరియా రావచ్చు నీటి ద్వారా రావచ్చు.
• వెక్టర్-బోర్న్ వైరల్ ఇన్ఫెక్షన్లలో  చికున్ గున్యా, డెంగ్యూ ఉన్నాయి

వైరల్ ఇన్ఫెక్షన్లు వివిధ రకాల వైరస్‌ల వల్ల కలిగే అంటువ్యాధులు. వైరస్లు మన శరీరంలోని శ్వాసకోశ, ప్రేగు, గుండె, నాడీ వ్యవస్థ వంటి ఏదైనా అవయవ వ్యవస్థను ప్రభావితం చేస్తాయి. వర్షాకాలంలో సాధారణంగా కనిపించే వైరల్ ఇన్ఫెక్షన్ జ్వరం. చాలాసార్లు, మానవ శరీర ఉష్ణోగ్రత 98.6 ° ఫారెన్ హీట్ లేదా 37 ° సెంటీగ్రేడ్ ఉంటుంది. ఉష్ణోగ్రత ఒక డిగ్రీ కంటే ఎక్కువ పెరిగితే అది జ్వరం. జ్వరాలు సాధారణంగా మానవ శరీరం బ్యాక్టీరియా లేదా వైరల్ ఇన్ఫెక్షన్‌తో పోరాడటానికి ప్రయత్నిస్తోందని తెలియజేస్తాయి.

వైరల్ ఫీవర్ లక్షణాలు ఏమిటి?

వేసవి వేడి తర్వాత వర్షాలు వస్తాయి. కాబట్టి, ఉష్ణోగ్రత అకస్మాత్తుగా తగ్గుతుంది. దీని ఫలితంగా సాధారణంగా వైరల్ ఇన్ఫెక్షన్ పెరుగుతుందని డాక్టర్ పరితోష్ బఘేల్ వివరించారు. ఈ వైరల్ ఇన్ఫెక్షన్ సాధారణంగా ముక్కు, సైనస్, గొంతు, ఊపిరితిత్తులతో సహా శ్వాసనాళాన్ని ప్రభావితం చేస్తుంది. చాలా సందర్భాలలో, ఇన్ఫెక్షన్ తుంపర్ల వ్యాప్తి ద్వారా ఒకరి నుండి మరొకరికి వస్తుంది.

చలి, చెమట, డీహైడ్రేషన్, తలనొప్పి, కండరాల నొప్పులు, బలహీనత, ఆకలి లేకపోవడం వంటివి వైరల్ ఫీవర్ లక్షణాలు. కొన్నిసార్లు ఈ లక్షణాలు అస్పష్టంగా ఉంటాయి. ఇంట్లో జ్వరాన్ని నిర్ధారించడానికి ఉత్తమ మార్గం థర్మామీటర్ సహాయంతో వ్యక్తి యొక్క ఉష్ణోగ్రతను పరీక్షించడం. జ్వరం ఉంటే, రోగాన్ని నిర్ధారించడానికి, చికిత్స ప్రారంభించడానికి వీలైనంత త్వరగా నిపుణుడిని సంప్రదించడం మంచిది.

వైరల్ జ్వరానికి ఎలా చికిత్స చేస్తారు?

తీవ్రంగా మారి ఆసుపత్రిలో చేరాల్సిన అవసరం ఉంటే తప్ప దీన్ని సాధారణంగా ఇంట్లో తగ్గించుకోవచ్చు. ఒక వ్యక్తి వారి లక్షణాల నుండి ఉపశమనం పొందడంలో సహాయపడే కొన్ని సాధారణ మార్గాలు -

• డిస్ప్రిన్ లేదా క్రోసిన్ వంటి జ్వరం మందులు తీసుకోవచ్చు. ఇవి వైద్యుడి సిఫార్సు తర్వాత తీసుకోవాలి. ముఖ్యంగా పిల్లలకు వేసే ముందు వైద్య సలహా తప్పనిసరి.
• మీ శరీరానికి తగినంత విశ్రాంతి, నిద్ర ఇవ్వండి.
• హైడ్రేట్ గా ఉండటానికి ఎక్కువగా ద్రవాలు తాగాలి. లేదంటే జ్వరం మరింత ఎక్కువవుతుంది.
• శరీర ఉష్ణోగ్రతను తగ్గించడానికి గోరువెచ్చని స్నానం చేయండి.

వైరల్ ఫీవర్ ను ఎలా నివారించవచ్చు?

వైరల్ ఫీవర్, ఇన్ఫెక్షన్లు సర్వసాధారణమైనప్పటికీ… సాధారణ జాగ్రత్తలు వాటిని నివారించడంలో సహాయపడతాయి. వైరల్ ఇన్ఫెక్షన్లు, జ్వరాన్ని నివారించడానికి డాక్టర్ పరితోష్ బఘేల్ కొన్ని చిట్కాలను సూచించారు

• మీ ఇల్లు, పరిసరాలను పరిశుభ్రంగా ఉంచుకోండి.
• సబ్బుతో చేతులు కడుక్కోవడం ద్వారా వ్యక్తిగత పరిశుభ్రతను పాటించండి.
• ఒక వ్యక్తికి జ్వరం లేదా ఇన్ఫెక్షన్ ఉందని మీకు తెలిస్తే, వారికి దూరంగా ఉండండి.
• మీ ముక్కు, నోటిని తరచుగా తాకవద్దు. ముఖ్యంగా ఆరుబయట ఉన్నప్పుడు ప్రత్యేక శ్రద్ధ తీసుకోవాలి.
• మీరు దగ్గినప్పుడు / తుమ్మినప్పుడు, మీ నోరు మరియు ముక్కును ఎల్లప్పుడూ మూసుకోండి. మీకు అనారోగ్యం, జ్వరం ఉంటే, వ్యాధి వ్యాప్తి చెందకుండా ఉండటానికి బహిరంగ ప్రదేశాలకు వెళ్లడం మానుకోండి.
• రోగనిరోధక శక్తిని కాపాడుకోండి. దానికోసం సమతుల్య, పోషకాలున్న ఆహారాన్ని తీసుకోవడం ద్వారా ఆరోగ్యంగా ఉండండి.
• క్రమం తప్పకుండా వ్యాయామం చేయండి, పుష్కలంగా నీరు త్రాగండి. ప్రతి రోజు కనీసం ఎనిమిది గంటలు నిద్రపోండి.