అయ్యయ్యో అతిగా ఆందోళన వద్దమ్మా.. మీ ఆహారంలో ఇవి ఉంటే ఒత్తిడి మాయం, సుఖీభవ!

మనిషి ప్రశాంతంగా జీవించడం మరిచిపోతున్నాడు. అన్నీ ఉన్నా, ఏదో ఒక బాధ, వెలితి అనేది ఏదో రూపంలో అనునిత్యం వెంటాడుతూనే ఉంది. టెన్షన్, ఒత్తిడి, ఆందోళన మనిషిని కుదురుగా ఉండనివ్వడం లేదు. అందుకు కారణాలు ఎన్నో..  కుటుంబం, సమాజం, ఉద్యోగం లేదా వ్యాపారం ఇలా చెప్పుకుంటూపోతే ఇప్పుడున్న వేగవంతమైన జీవనశైలి కూడా ఒత్తిడి పెరుగడానికి కారణం అవుతోంది. కంటికి కనిపించని శక్తితో బయటకు కనిపించని యుద్ధం చేస్తున్న స్థితికి లోనవుతున్నారు.  మానవాళికి ఒక సవాలుగా పరిణమిస్తున్న ఈ పరిస్థితి సుదీర్ఘ కాలంపాటు అనుభవిస్తే, అది వివిధ అనారోగ్య సమస్యలకు దారితీస్తుంది. అందువల్ల, మీ ఒత్తిడి స్థాయిలను ఎలా నియంత్రించుకోవాలో నేర్చుకోవడం చాలా ముఖ్యం.

ఒత్తిడి నియంత్రణకు ఎన్నో మార్గాలు..

మీ ఆలోచనలు ఉద్రిక్తంగా ఉన్నప్పుడు ఒత్తిడి స్థాయిలను నియంత్రించడానికి అనేక మార్గాలు ఉన్నాయి. అందులో ఒకటి మనం రోజూ తినే ఆహారం కూడా మన అతిపెద్ద మిత్రుడు లేదా శత్రువుగా పరిణమించవచ్చు. అంటే మీరు తినే మీ ఒత్తిడి స్థాయిలను తగ్గించవచ్చు లేదా పెంచవచ్చు, కాబట్టి మీరు అయోమయంలో ఉన్నప్పుడు తినే తిండిపై కూడా దృష్టి పెట్టడం చాలా ముఖ్యం. ఒత్తిడికి గురికావడం వల్ల శరీరానికి విటమిన్ సి, విటమిన్ బి, సెలీనియం, మెగ్నీషియం వంటి కొన్ని పోషకాల అవసరం పెరుగుతుంది. కాబట్టి తినే ఆహారంలో అవి పుష్కలంగా ఉన్నాయో లేదో చూసుకోవాలి. సరైన ఆహారాన్ని తీసుకోవడం వలన మీరు కూడా ప్రశాంతంగా ఉండగలుగుతారు.

ఒత్తిడిని ఎదుర్కోవటానికి మీ ఆహారంలో చేర్చాల్సిన ఆహారాలు ఇక్కడ ఉన్నాయి:

1. ఆకుపచ్చని ఆకు కూరలు:

ఆకుపచ్చ ఆకుకూరలు మెగ్నీషియం, కాల్షియం, పొటాషియం లాంటి పోషకవిలువలకు  గొప్ప మూలం! కాలే, పాలకూర, క్యాబేజీ వంటి  ఆకుకూరలలో ఫోలేట్ ఉంటుంది, ఇది డోపమైన్‌ను ఉత్పత్తి చేస్తుంది. ఇది ఆనందాన్ని కలిగించే మెదడుకు చెందిన రసాయనం, ఇది మిమ్మల్ని ప్రశాంతంగా ఉంచడానికి సహాయపడుతుంది. అలాగే ఒత్తిడి ఉపశమనం కోసం అత్యంత శక్తివంతమైన ఖనిజం మెగ్నీషియం.

2. సాల్మన్:

సాల్మన్ ఫిష్ ఒమేగాకు గొప్ప మూలం సాల్మన్‌లో ఉండే ఒమేగా 3 కొవ్వు ఆమ్లాలు ఒత్తిడి ద్వారా శరీరంలో విడుదలయ్యే హార్మోన్ల ప్రతికూల ప్రభావాలను ఎదుర్కోవడంలో సహాయపడే లక్షణాలను కలిగి ఉంటాయి.

3. బ్లూబెర్రీస్:

బ్లూబెర్రీస్ ఒత్తిడిని తగ్గించే ఆహారాలలో ఒకటి. బ్లూబెర్రీస్ విటమిన్ 'సి' ని కలిగి ఉంటాయి, ఇది యాంటీఆక్సిడెంట్లలో ఒకటి, ఇది ఒత్తిడిని తగ్గించడానికి బాధ్యత వహిస్తుంది. ఇంకా, బెర్రీలలో ఉండే ఫైటోన్యూట్రియంట్లు ఒత్తిడి సమయంలో  మీ శరీరం ప్రతిస్పందించే గుణాన్ని మెరుగుపరుస్తుంది.

4. పిస్తా:

పిస్తాలు అనేక పోషకాలకు నిలయం. పిస్తాపప్పులో కేలరీలు తక్కువగా ఉంటాయి, కొవ్వు తక్కువగా ఉంటుంది, ఫైబర్ అధికంగా ఉంటుంది.  పిస్తా తినడం వల్ల రక్తపోటు, గుండె వేగాన్ని నియంత్రించడం ద్వారా తీవ్రమైన ఒత్తిడిని తగ్గించవచ్చు. ఈ గింజల్లో ఉండే ఫైటోన్యూట్రియెంట్‌లు హృదయనాళ ఆరోగ్యానికి సహాయపడే యాంటీఆక్సిడెంట్‌లను అందిస్తాయి.

5. ఓట్ మీల్:

ఓట్ మీల్ శరీరంలో ప్రశాంతతను కలిగించే హార్మోన్ సెరోటోనిన్ విడుదల చేయడంలో సహాయపడుతుంది. మెదడు నుంచి విడుదలయ్యే సెరోటోనిన్ ఒకరి మానసిక స్థితిని మెరుగుపరుస్తుంది.  కొన్ని పరిశోధనల ప్రకారం, కార్బోహైడ్రేట్లు మెదడుకు సెరోటోనిన్ తయారీకి సహాయపడతాయి. కాంప్లెక్స్ కార్బ్ కావడం వల్ల, ఓట్ మీల్ నెమ్మదిగా జీర్ణమవుతుంది. అంతేకాకుండా రక్తంలో చక్కెర స్థాయిని పెరగనివ్వదు. గోధుమ, బియ్యం, క్వినోవా వంటి తృణధాన్యాలు తినడం వల్ల ఒత్తిడిని కూడా తగ్గించవచ్చు.

6. పెరుగు- యోగర్ట్:

పెరుగులో ప్రోబయోటిక్స్‌తో పాటు కాల్షియం మరియు ప్రోటీన్‌లు ఉంటాయి. ఒక పరిశోధన ప్రకారం జీర్ణాశయంలో ఉండే బ్యాక్టీరియా ఒత్తిడికి కారకం అవుతుంది. అయితే, పెరుగు తినడం వల్ల భావోద్వేగం మరియు నొప్పికి సంబంధించిన మెదడులోని కార్యాచరణను తగ్గించడం ద్వారా ఆందోళన, ఒత్తిడిని నియంత్రించవచ్చని తేలింది.

అలాగే పాలలో ఉండే లాక్టియం అనే ప్రోటీన్ కూడా ఒత్తిడి, రక్తపోటును తగ్గించడం, కార్టిసాల్ స్థాయిలను తగ్గించడం ద్వారా శరీరంపై శాంతించే ప్రభావాన్ని చూపుతుంది. ఫోర్టిఫైడ్ పాలు విటమిన్ డికి అద్భుతమైన మూలం. సంతోషాన్ని పెంచే పోషకం. తగినంత విటమిన్ డి స్థాయిలు ఉంటే సమతుల్యంగా ఉన్న వ్యక్తులు కొన్ని రకాల ఫోబియాలను సమర్థవంతంగా ఎదుర్కొంటారు.

7. డార్క్ చాక్లెట్:

డార్క్ చాక్లెట్‌కి మీ శరీరంలో ఒత్తిడి స్థాయిలను నియంత్రించే శక్తి ఉంది. ఈ స్వీట్‌లో ఉండే ఫ్లేవనాయిడ్స్ ఆందోళనకు కారణమయ్యే కార్టిసాల్‌తో సహా ఒత్తిడికారక హార్మోన్‌లను తగ్గించడానికి సహాయం చేస్తుంది. కోకోలో ఉండే యాంటీఆక్సిడెంట్లు మీ రక్త నాళాల గోడలను రక్తపోటును తగ్గించడానికి, రిలాక్స్ చేయడానికి, రక్త ప్రసరణను మెరుగుపరచడానికి ప్రేరేపిస్తాయి. డార్క్ చాక్లెట్‌లో ఉండే కొన్ని ప్రత్యేకమైన సహజ పదార్థాలు ఉంటాయి, ఇవి యుఫోరియా అంటే ప్రేమ కలిగినపుడు లభించే అనుభూతిని అందిస్తుంది. రోజూ ఒక చిన్న డార్క్ చాక్లెట్ ముక్క మిమ్మల్ని ప్రశాంతంగా ఉంచడంలో సహాయపడుతుంది.

8. విత్తనాలు- గింజలు:

అవిసె గింజలు, పొద్దుతిరుగుడు విత్తనాలు, గుమ్మడికాయలు మెగ్నీషియం గొప్ప వనరులు. మెగ్నీషియం డిప్రెషన్, చిరాకు, అలసటను తగ్గించడంలో సహాయపడుతుంది. నీటి నిలుపుదల, తిమ్మిరితో సహా PMS (నెలసరి) లక్షణాలతో పోరాడటానికి మెగ్నీషియం సహాయపడుతుంది.

చివరగా ఒక్కమాట.. ఆరోగ్యకరమైన ఆహారాన్ని తీసుకోవడం, యోగా, ధ్యానం, జపం లాంటివి చేయడం ద్వారా మిమ్మల్ని మీరు ప్రశాంతంగా మరియు సానుకూల దృక్పథంతో ఉంచుకోవడానికి ప్రయత్నించండి. ఆరోగ్యమే మహాభాగ్యం!