Crazy update from NTR30: ఎన్‌టీఆర్-కొరటాల శివ మూవీ నుంచి అదిరిపోయే అప్డేట్.. విలన్‌గా కోలీవుడ్ స్టార్..!

ఆర్ఆర్ఆర్ తర్వాత యంగ్ టైగర్ ఎన్టీఆర్ నటిస్తున్న సినిమా కోసం అభిమానులు ఆత్రుతగా ఎదురుచూస్తున్నారు. కొరటాల శివ దర్శకత్వంలో ఆయన ఇప్పటికే ఓ సినిమాకు ఓకే చెప్పడంతో అది ఎప్పుడెప్పుడు ప్రారంభమవుతుందా? అని ఫ్యాన్స్ ఉత్కంఠగా చూస్తున్నారు. ఇలాంటి సమయంలో ఇటీవల జరిగిన అమిగోస్ ప్రీ రిలీజ్ ఈవెంట్‌లో ఎన్టీఆర్ 30 గురించి అదిరిపోయే అప్డేట్ ఇచ్చారు. ఈ సినిమా ఈ నెలలోనే లాంచ్ అవుతుందని, వచ్చే నెల మధ్య నుంచి రెగ్యూలర్ షూటింగ్ ప్రారంభమవుతుందని తెలిపారు. అంతేకాకుండా వచ్చే ఏడాది విడుదలవుతుందని కూడా ప్రకటించారు. తాజాగా ఈ మూవీ మరో అప్డేట్ నెట్టింట హల్చల్ చేస్తోంది.

ఎన్టీఆర్-కొరటాల శివ కాంబినేషన్‌లో రానున్న ఈ సినిమాలో విలన్‌గా కోలీవుడ్ నటుడు విజయ్ సేతుపతి నటిస్తున్నాడని ఫిల్మ్ వర్గాల్లో టాక్ నడుస్తోంది. ప్రతినాయకుడి కోసం కొరటాల బలమైన క్యారెక్టర్‌ను రాసుకున్నారట. ఆ పాత్రకు విజయ్ సేతుపతినే సరిగ్గా సరిపోతాడని చిత్రబృందం ఆయనను సంప్రదించారట. ఇందుకు కోలీవుడ్ స్టార్ కూడా సానుకూలంగా స్పందించినట్లు తెలుస్తోంది.

ఎన్టీఆర్ ఇప్పటికే కొరటాలతో జనతా గ్యారేజ్ కోసం పనిచేశాడు. రాబోయే ప్రాజెక్ట్ వారి పునఃకలయికను సూచిస్తుంది. వార్తలు నిజమైతే ఎన్టీఆర్ ద్విపాత్రాభినయంలో కనిపించనున్నట్లు తెలుస్తోంది. స్మగ్లింగ్ బ్యాక్ డ్రాప్‌లో సినిమా ఉంటుందని సమాచారం. హీరోయిన్ కోసం జాన్వీ కపూర్‌ను సంప్రదించినట్లు వార్తలు వచ్చాయి. అయితే ఈ విషయంపై చిత్రబృందం నుంచి అధికారిక సమాచారం రావాల్సి ఉంది.