Vijay Deverakonda At Pvl League:ప్రైమ్ వాలీబాల్‌ లీగ్ మ్యాచ్‌లో విజ‌య్ దేవ‌ర‌కొండ సంద‌డి

Vijay Deverakonda At Pvl League: ప్రైమ్ వాలీబాల్ లీగ్‌(పీవీఎల్‌)లో భాగంగా శ‌నివారం హైద‌రాబాద్ బ్లాక్‌హాక్స్‌, చెన్నై బ్లిట్జ్ మ‌ధ్య వాలీబాల్ మ్యాచ్ జ‌రిగింది గ‌చ్చిబౌలి వేదిక‌గా జ‌రిగిన ఈ మ్యాచ్‌కు టాలీవుడ్ యంగ్ హీరో విజ‌య్ దేవ‌ర‌కొండ స్పెష‌ల్ అట్రాక్ష‌న్‌గా నిలిచారు. త‌న సోద‌రుడు ఆనంద్ దేవ‌ర‌కొండ‌తో క‌లిసి విజ‌య్ దేవ‌ర‌కొండ ఈ మ్యాచ్‌కు హాజ‌ర‌య్యాడు. అభిమానుల‌తో క‌లిసి సంద‌డి చేశాడు.

హైద‌రాబాద్ బ్లాక్ హాక్స్ టీమ్‌కు విజ‌య్ దేవ‌ర‌కొండ స‌హ య‌జ‌మానిగా వ్య‌వ‌హ‌రిస్తోన్నాడు విజ‌య్ దేవ‌ర‌కొండ‌. ఈ సంద‌ర్భంగా అత‌డు మాట్లాడుతూ వాలీబాల్‌పై ఉన్న ఇష్టం, హైద‌రాబాద్ న‌గ‌రంపై ఉన్న ప్రేమ వాలీబాల్ లీగ్ వైపు అడుగులు వేసేలా చేశాయ‌ని విజ‌య్ దేవ‌ర‌కొండ అన్నాడు. దేశంలోనే అత్య‌ధిక మంది వీక్షించే లీగ్‌గా ప్రైమ్ వాలీబాల్ లీగ్ నిలుస్తుంద‌నే న‌మ్మ‌క‌ముంద‌ని విజ‌య్ దేవ‌ర‌కొండ పేర్కొన్నాడు.

ఖ‌చ్చితంగా ఎంట‌ర్‌టైన్‌మెంట్‌కు చిరునామాగా నిలుస్తుంద‌ని అన్నాడు. వాలీబాల్ ఆట అంటేనే సూప‌ర్ జోష్‌. కండ్లు చెదిరే స్మాష్‌ల‌కు తోడు మెరుపు డైవింగ్‌లు ఈ ఆట ప్ర‌త్యేక‌త‌. ప్ర‌తీ ఐదు నిమిషాల‌కొక‌సారి మ్యాచ్ మ‌లుపులు తిరుగుతూనే ఉంటుంది. స్కూల్ డేస్‌లో నేను ఎటాకింగ్‌ను బాగా ఇష్ట‌ప‌డేవాణ్ణి. ప్ర‌పంచంలోనే చాలా మందిని ఆక‌ర్షించే ఆట ఇది అని విజ‌య్ దేవ‌ర‌కొండ పేర్కొన్నాడు.

ప్ర‌స్తుతం విజ‌య్ దేవ‌ర‌కొండ తెలుగులో ఖుషితో పాటు డైరెక్ట‌ర్స్ గౌత‌మ్ తిన్న‌నూరి, ప‌ర‌శురామ్‌ల‌తో సినిమాలు చేయ‌బోతున్నాడు.