SS Rajamouli: మిస్ శెట్టి.. మిస్టర్ పోలిశెట్టి మూవీపై రాజమౌళి ట్వీట్.. దర్శకుడికి స్పెషల్ ప్రశంస.. జవాన్ గురించి కూడా..

SS Rajamouli: ‘మిస్ శెట్టి.. మిస్టర్ పోలిశెట్టి’ చిత్రం గురువారం (సెప్టెంబర్ 7) రిలీజై పాజిటివ్ టాక్ తెచ్చుకుంది. స్టార్ హీరోయిన్ అనుష్క శెట్టి, యంగ్ హీరో నవీన్ పోలిశెట్టి ప్రధాన పాత్రల్లో నటించిన ఈ సినిమాకు రివ్యూలు సైతం ఎక్కువ శాతం సానుకూలంగా వచ్చాయి. సరికొత్త కాన్సెప్ట్‌తో లవ్ కామెడీ ఎంటర్‌టైనర్‌గా ఈ చిత్రం తెరకెక్కింది. ఎమోషనల్ సీన్లు కూడా బాగా పండాయని టాక్ వచ్చింది. యువ దర్శకుడు పి.మహేశ్ బాబు.. ‘మిస్ శెట్టి.. మిస్టర్ పోలిశెట్టి’ చిత్రాన్ని తెరకెక్కించిన తీరుపై ప్రశంసలు వస్తున్నాయి. కాగా, ఈ చిత్రాన్ని దర్శక ధీరుడు రాజమౌళి చూశారు. ‘మిస్ శెట్టి.. మిస్టర్ పోలిశెట్టి’ టీమ్‍ను అభినందిస్తూ నేడు ట్వీట్ చేశారు.

“చాలా రోజుల తర్వాత రెండు చిత్రాలను వెనువెంటనే చూశా. స్వీటీ (అనుష్క శెట్టి) ఎప్పటిలాగానే అందంగా, ప్రకాశవంతంగా కనిపించింది. నవీన్ పోలిశెట్టి.. చాలా నవ్వులను, సరదాను పంచాడు. విజయం సాధించిన మిస్ శెట్టి.. మిస్టర్ పోలిశెట్టి యూనిట్‍కు కాంగ్రాచులేషన్స్. చాలా సెన్సిటివ్ సబ్జెక్ట్‌ను ఇంత సరదాగా, వినోదాత్మకంగా తెరకెక్కించిన దర్శకుడు మహేశ్‍కు అభినందనలు” అని రాజమౌళి ట్వీట్ చేశారు.

పెళ్లి కాకుండా, శారీరక సంబంధం లేకుండా పిల్లలకు జన్మనివ్వాలని ‘మిస్ శెట్టి.. మిస్టర్ పోలిశెట్టి’ చిత్రంలో అనుష్క శెట్టి భావిస్తుంటారు. చెఫ్ పాత్రను ఆమె ఈ సినిమాలో చేశారు. స్టాండప్ కమెడియన్ అయిన నవీన్ పోలిశెట్టి ఆమెతో ప్రేమలో పడతారు. ఈ తర్వాత ఏం జరిగిందన్నదే ఈ మూవీ ప్రధానమైన కథగా ఉంది. సున్నితమైన అంశాన్ని ఎంటర్‌టైనింగ్‍గా చూపించారు దర్శకుడు మహేశ్. నవీన్ పోలిశెట్టి తన కామెడీ టైమింగ్, డైలాగ్ డెలివరీతో మరోసారి ఆకట్టుకున్నారు.

రాజమౌళి చూసిన మరో సినిమా జవాన్. ఈ చిత్రం గురించి కూడా ట్వీట్ చేశారు రాజమౌళి. “షారుఖ్ ఖాన్‍ను బాక్సాఫీస్ బాద్‍షా అనేది ఇందుకే. ప్రకంపనలు సృష్టించేలా అద్భుతమైన ఓపెనింగ్. విజయపరంపరను ఉత్తరాదిలో కూడా కొనసాగించిన డైరెక్టర్ అట్లీకి అభినందనలు. అద్భుతమైన సక్సెస్ సాధించిన జవాన్ టీమ్‍కు కంగ్రాట్స్” అని రాజమౌళి ట్వీట్ చేశారు.

‘మిస్ శెట్టి.. మిస్టర్ పోలిశెట్టి’ సినిమా మంచి టాక్ తెచ్చుకున్న జవాన్ తీవ్రమైన పోటీని ఇవ్వటంతో ఊహించిన స్థాయిలో కలెక్షన్లను రాబట్టలేకపోయింది. అయితే, సినిమా బాగుండటంతో వసూళ్లు పుంజుకునే అవకాశాలు అధికంగా ఉన్నాయి.

మరోవైపు, జవాన్ సినిమా తొలి రోజు ప్రపంచవ్యాప్తంగా రూ.120కోట్లకుపైగా కలెక్షన్లను సాధించింది. షారుఖ్ అభిమానులకు ఈ యాక్షన్ కమర్షియల్ మూవీ ఫీస్ట్‌లా ఉంది.