Sidharth Kiara: పెళ్లి స్వీట్లు పంచిన కియారా, సిద్ధార్థ్.. ఫొటోలకు పోజులు

Sidharth Kiara: బాలీవుడ్ లో పెళ్లితో ఒక్కటైన మరో జంట కియారా అద్వానీ, సిద్ధార్థ్ మల్హోత్రా. ఈ ఇద్దరూ రాజస్థాన్ లోని జైసల్మేర్ లో మంగళవారం (ఫిబ్రవరి 7) పెళ్లి చేసుకున్న విషయం తెలిసిందే. వీళ్లు బుధవారం (ఫిబ్రవరి 8) సిద్ధార్థ్ సొంతూరు అయిన ఢిల్లీ చేరుకున్నారు. ఎయిర్ పోర్ట్ లో తమకోసం వేచి చూస్తున్న మీడియాకు ఎంతో వినయంగా నమస్కరిస్తూ.. గాల్లో ముద్దులు కురిపించారు.

ఢిల్లీలో వీళ్లు వెడ్డింగ్ రిసెప్షన్ ఏర్పాటు చేయనున్నారు. కొత్తగా పెళ్లి చేసుకున్న ఈ జంట ఢిల్లీలోని తమ ఇంట్లో నుంచి బయటకు వచ్చి అభిమానులు, మీడియా వాళ్లకు స్వీట్లు పంచారు. ఈ ఇద్దరూ ఎరుపు రంగు దుస్తుల్లోనే కనిపించడం విశేషం. కియారా రెడ్ కలర్ సల్వార్ సూట్ లో కనిపించగా.. సిద్ధార్థ్ రెడ్ కుర్తా, వైట్ ప్యాంట్ వేసుకున్నాడు.

వీళ్ల ముఖాల్లో పెళ్లి కళ స్పష్టంగా కనిపిస్తోంది. స్వీట్లు పంచిన తర్వాత ఒకరి చేతులో మరొకరు చేయి వేసి ఫొటోలకు పోజులిచ్చారు. 2021లో వచ్చిన షేర్షా మూవీ సమయంలోనే ప్రేమలో పడిన వీళ్లు.. మొత్తానికి పెళ్లితో ఒక్కటయ్యారు. మంగళవారం పెళ్లి తర్వాత కాసేపటికి ఇన్‌స్టాగ్రామ్ లో ఈ ఇద్దరూ తమ పెళ్లి ఫొటోలను షేర్ చేసుకున్నారు.

పెళ్లి వేడుకకు సిద్ధార్థ్ రాయల్ లుక్ లో కనిపించాడు. అతడు గోల్డెన్ షేర్వాణీ వేసుకోగా.. కియారా పింక్ లెహెంగాలో మెరిసిపోయింది. పెళ్లి సందర్బంగా కియారాకు సిద్ధార్థ్ ఖరీదైన ఉంగరాన్ని బహుమతిగా ఇచ్చాడు. "ఇప్పుడు శాశ్వతంగా మా బుకింగ్ అయిపోయింది. మీ ఆశీర్వాదాలు కావాలి" అనే క్యాప్షన్ తో ఈ ఇద్దరూ తమ పెళ్లి ఫొటోలను షేర్ చేసుకున్నారు.