Pathan Teaser | త్వరలోనే కలుస్తా.. కింగ్‌ ఖాన్‌ పఠాన్‌ టీజర్‌ వచ్చేసింది

బాలీవుడ్‌ బాద్‌షా షారుక్‌ఖాన్‌ 'పఠాన్‌' టైమ్‌ స్టార్ట్ అయిందని ప్రకటించాడు. చాలా రోజులుగా ఎదురుచూస్తున్న ఈ మూవీ తొలి టీజర్‌ను ఇన్‌స్టాలో పోస్ట్‌ చేశాడు. సిద్ధార్థ్‌ ఆనంద్‌ డైరెక్ట్‌ చేస్తున్న ఈ మూవీలో జాన్‌ అబ్రహం, దీపికా పదుకోన్‌ కూడా నటిస్తున్నారు. కింగ్‌ ఖాన్‌ ఓ గూఢచారిగా కనిపిస్తున్న ఈ యాక్షన్‌ థ్రిల్లర్‌ టీజర్‌ను ఇన్‌స్టాలో పోస్ట్‌ చేస్తూ.. "నాకు తెలుసు చాలా ఆలస్యమైందని.. కానీ ఈ డేట్‌ గుర్తుంచుకోడి.. పఠాన్‌ టైమ్‌ ఇప్పుడు స్టార్ట్‌ అయింది.. 2023, జనవరి 25న థియేటర్లలో కలుసుకుందాం. హిందీ, తమిళం, తెలుగుల్లో రిలీజ్‌ అవుతోంది" అని షారుక్‌ అన్నాడు. 

టీజర్‌లో మొదట జాన్‌ అబ్రహం, దీపికా పదుకోన్‌.. పఠాన్‌ను ఇంట్రడ్యూస్‌ చేశారు. మన దేశంలో కులం, మతం ఆధారంగానే పేర్లు పెడతారు. కానీ అతని దగ్గర అవేవీ లేవు అని జాన్‌ అబ్రహం అంటాడు. చివరికి అతనికి పేరు పెట్టేవాళ్లు కూడా లేరు.. అతని దగ్గర ఉన్నదల్లా ఈ దేశం ఒక్కటే అంటూ దీపికా ఈ టీజర్‌ను మరో లెవల్‌కు తీసుకెళ్లింది. చివరికి దేశాన్ని తన మతంగా, దాని రక్షణనే తన పనిగా మార్చుకున్నాడు.. అసలు అతనికి ఆ పేరు ఎలా వచ్చింది? ఎందుకు వచ్చిందో తెలుసుకోవాలంటే కొంతకాలం ఆగాల్సిందే అంటూ షారుక్‌ ఎంట్రీ ఇస్తాడు. ఈ చిన్న టీజర్‌ మూవీపై అంచనాలను పెంచేసింది. షారుక్‌ఖాన్‌ చివరిసారి 2018లో జీరో మూవీలో కనిపించాడు. ఆ సినిమా బాక్సాఫీస్‌ దగ్గర బోల్తాపడింది.