Kushi second Single: 'ఖుషి' నుంచి మరో మెలొడీ సాంగ్ వచ్చేసింది.. మాయ చేసిన సిధ్ శ్రీరామ్, చిన్మయి

Kushi second Single: హీరో విజయ్ దేవరకొండ, స్టార్ హీరోయిన్ సమంత ప్రధాన పాత్రలు పోషిస్తున్న మూవీ ‘ఖుషి’. లవ్ రొమాంటిక్ ఎంటర్‌టైనర్‌గా ఈ సినిమా రూపొందుతోంది. శివ నిర్వాణ దర్శకత్వం వహిస్తున్న ఈ చిత్రం పాన్ ఇండియా రేంజ్‍లో తెరకెక్కుతోంది. హృదయం ఫేమ్ హేషమ్ అబ్దుల్ వహాబ్ ఈ చిత్రానికి మ్యూజిక్ డైరెక్టర్‌గా ఉన్నాడు. కాగా, నేడు (జూలై 12) ఖుషి సినిమా నుంచి రెండో పాట వచ్చేసింది. ఆరాధ్య అంటూ సాగే ఈ మెలోడీ ఆకట్టుకుంటోంది. వివరాలివే.

ఖుషి సినిమా నుంచి రెండో సింగిల్‍గా ఆరాధ్య లిరికల్ సాంగ్‍ను చిత్రయూనిట్ నేడు రిలీజ్ చేసింది. ఈ పాటను ప్రముఖ గాయకులు సిధ్ శ్రీరామ్, చిన్మయి శ్రీపాద ఆలపించారు. వారి గాత్రంతో మరోసారి మాయ చేశారు. మెలోడియస్‍గా రొమాంటిక్‍గా ఈ పాటను హేషమ్ స్వరపరిచాడు. కాగా, ఈ పాటకు ఈ సినిమా దర్శకుడు శివ నిర్వాణనే తెలుగు లిరిక్స్ అందించాడు.

ఖుషి నుంచి ఆరాధ్య పాటను హిందీ, తమిళం, కన్నడ, మలయాళంలోనూ రిలీజ్ చేసింది చిత్రయూనిట్. ఆయా భాషలను బట్టి గాయకులు, పాట రచయితలు వేరుగా ఉన్నారు. అన్ని భాషలకు ఈ మెలోడియస్ ట్యూన్ నప్పినట్టుగా అనిపిస్తోంది.

మైత్రీ మూవీ మేకర్స్ పతాకంపై నవీన్ ఎర్నేని, యలమంచిలి రవిశంకర్.. ఖుషి సినిమాను నిర్మిస్తున్నారు. ఇప్పటికే ఈ చిత్రం నుంచి ‘నా రోజా నువ్వే’ అనే పాట విడుదలైంది. ఈ పాట సూపర్ హిట్ అయింది. అన్ని భాషల్లోనూ అదరగొడుతోంది.

ఖుషి సినిమాలో విజయ్ దేవకొండ, సమంత హీరోహీరోయిన్లుగా ఉండగా.. జయరామ్, సచిన్ ఖేడేకర్, మురళీ శర్మ, లక్ష్మి కీలకపాత్రల్లో కనిపించనున్నారు. సెప్టెంబర్ 1వ తేదీన తెలుగుతో పాటు హిందీ, తమిళం, కన్నడ, మలయాళ భాషల్లో ఈ చిత్రం విడుదల కానుంది. ఈ చిత్రానికి మురళి జి.. సినిమాటోగ్రాఫర్‌గా ఉండగా.. ప్రవీణ్ పూడి ఎడిటింగ్ బాధ్యతలు నిర్వర్తిస్తున్నాడు.

గతేడాది విజయ్ దేవరకొండ మూవీ ‘లైగర్’ ఫ్లాఫ్ అయింది. పాన్ ఇండియా రేంజ్‍లో వచ్చిన ఈ సినిమా బాక్సాఫీస్ వద్ద బోల్తా కొట్టింది. ఇక ఈ ఏడాది సమంత ప్రధాన పాత్రలో వచ్చిన శాకుంతలం కూడా పరాజయాన్ని చవిచూసింది. దీంతో ఈ ఖుషి నినిమా విజయ్, సమంత ఇద్దరికీ కీలకంగా మారింది.