Samantha: బాలీవుడ్ లో సమంతకు బంపర్ ఆఫర్ - మైథలాజికల్ సినిమాకు గ్రీన్ సిగ్నల్

ఇటీవల కాఫీ విత్ కరణ్ షోలో కలిసి సందడి చేశారు అక్షయ్ కుమార్, సమంత. ఈ షోలో సమంతను చేతులతో ఎత్తుకొని అక్షయ్ కుమార్ వేదికపైకి తీసుకురావడం రావడం హైలైట్ గా నిలిచింది. ఈ టాక్ షోలో అక్షయ్, సామ్ ఒకరిపై మరొకరు జోక్స్ వేసుకుంటూ సరదాగా కనిపించారు. ఈ షో ద్వారా బుల్లితెరపై అలరించిన ఈ జోడి త్వరలోనే వెండితెరపై జంటగా కనిపించబోతున్నట్లు సమాచారం.

అక్షయ్ కుమార్ హీరోగా మైథలాజికల్ కథాంశంతో దర్శకనిర్మాత కరణ్ జోహార్ ఓ భారీ చిత్రాన్ని తెరకెక్కించేందుకు ప్లాన్ చేస్తున్నట్లు సమాచారం. పురాణాల ఆధారంగా పాన్ ఇండియన్ స్థాయిలో రూపొందుతున్న ఈ సినిమాలో అక్షయ్ కుమార్ కు జోడీగా సమంత నటించబోతున్నట్లు వార్తలు వినిపిస్తున్నాయి. ఈ కథ విని ఇంప్రెస్ అయిన సామ్ ఇటీవలే ఈ సినిమాకు గ్రీన్ సిగ్నల్ ఇచ్చినట్లు తెలిసింది. మైథలాజికల్ ఎపిక్ డ్రామాగా రూపొందుతున్న ఈ చిత్రంలో సమంత పాత్ర పవర్ ఫుల్ గా సాగుతుందని చెబుతున్నారు. త్వరలోనే ఈ మైథలాజికల్ చిత్రానికి సంబంధించిన అధికారిక ప్రకటన వెలువడే అవకాశం ఉన్నట్లు సమాచారం.

ఫ్యామిలీ మ్యాన్ 2 వెబ్ సిరీస్ తో బాలీవుడ్ లో అరంగేట్రం చేసింది సమంత. ఇందులో నెగెటివ్ షేడ్స్ తో కూడిన క్యారెక్టర్ లో అసమాన నటనను కనబరిచింది. ఈ సిరీస్ తో బాలీవుడ్ వర్గాల దృష్టిని ఆకర్షించడంలో సమంత సక్సెస్ అయ్యింది. ప్రస్తుతం హిందీలో పలు అవకాశాల్ని అందుకుంటోంది. ఫ్యామిలీ మ్యాన్ దర్శకద్వయం రాజ్ డీకేలతో యాక్షన్ ఓరియెంటెడ్ వెబ్ సిరీస్ చేస్తోంది. తెలుగులో మైథలాజికల్ రూపొందుతున్న శాకుంతలం సినిమాలో సమంత నటిస్తోంది. గుణశేఖర్ దర్శకత్వం వహించిన ఈ సినిమా షూటింగ్ పూర్తయింది. ప్రస్తుతం ప్రీప్రొడక్షన్ పనులు జరుగుతున్నాయి. అలాగే సమంత నటించిన మరో ద్విభాషా చిత్రం యశోద రిలీజ్ కు సిద్ధంగా ఉంది