Animal Closing Collections: యానిమ‌ల్ ఫైన‌ల్ క‌లెక్ష‌న్స్ - లాభాల్లో షారుఖ్‌, ప్ర‌భాస్‌ల‌ను దాటేసిన ర‌ణ్‌బీర్‌క‌పూర్ మూవీ

Animal Closing Collections: ర‌ణ్‌బీర్‌క‌పూర్ యానిమ‌ల్ 2023లో రిలీజైన ఇండియ‌న్ సినిమాల్లో హ‌య్యెస్ట్ క‌లెక్ష‌న్స్ రాబ‌ట్టిన మూవీస్‌లో ఒక‌టిగా రికార్డ్ క్రియేట్ చేసింది. షారుఖ్‌ఖాన్ జ‌వాన్‌, ప‌ఠాన్ త‌ర్వాత మూడో స్థానంలో నిలిచింది. సందీప్ వంగా ద‌ర్శ‌క‌త్వంలో డిసెంబ‌ర్ 1న రిలీజైన యానిమ‌ల్ వ‌ర‌ల్డ్‌ వైడ్‌గా 905 కోట్ల క‌లెక్ష‌న్స్ రాబ‌ట్టింది. దాదాపు వంద కోట్ల బ‌డ్జెట్‌తో రూపొందిన నిర్మాత‌ల‌కుఐదింత‌ల లాభాలను తెచ్చిపెట్టింది.

తెలుగులో రికార్డులు బ్రేక్‌...

905 కోట్ల క‌లెక్ష‌న్స్‌లో హిందీ వెర్ష‌న్ లాభాల వాటానే అధికంగా ఉంది. హిందీలో యానిమ‌ల్ మూవీ 500 కోట్ల షేర్ క‌లెక్ష‌న్స్ ద‌క్కించుకున్న‌ట్లు ట్రేడ్ వ‌ర్గాలు చెబుతున్నాయి. తెలుగుతో పాటు త‌మిళం, మ‌ల‌యాళం, క‌న్న‌డ భాష‌ల్లో క‌లిపి వంద కోట్ల‌కుపైగా గ్రాస్‌, 53 కోట్ల వ‌ర‌కు షేర్ క‌లెక్ష‌న్స్ వ‌చ్చిన‌ట్లు నిర్మాత‌లు పేర్కొన్నారు.

ఒక్క తెలుగులోనే ఈ మూవీ నిర్మాత‌ల‌కు ముప్పై కోట్ల‌కుపైగా లాభాల‌ను తెచ్చిపెట్టిన‌ట్లు స‌మాచారం. తెలుగులో 14 కోట్ల బ్రేక్ ఈవెన్ టార్గెట్‌తో యానిమ‌ల్ రిలీజైంది. ఫ‌స్ట్ వీకెండ్‌లోనే నిర్మాత‌లు లాభాల్లోకి అడుగుపెట్టారు. 85 కోట్ల గ్రాస్ క‌లెక్ష‌న్స్‌తో తెలుగులో రిలీజైన బాలీవుడ్ డ‌బ్బింగ్ మూవీలో ఒక‌టిగా యానిమ‌ల్ రికార్డ్ నెల‌కొల్పింది.

లాభాల్లో షారుఖ్‌, ప్ర‌భాస్ కంటే ఎక్కువే...

2023లో రిలీజైన సినిమాల్లో క‌లెక్ష‌న్స్ ప‌రంగా షారుఖ్‌ఖాన్ జ‌వాన్‌, ప‌ఠాన్ టాప్‌ప్లేస్‌లో ఉండ‌గా...ప్రాఫిట్స్ విష‌యంలో మాత్రం యానిమ‌ల్ మొద‌టిస్థానంలో నిలిచింది. జ‌వాన్ సినిమా 643 కోట్లు, ప‌ఠాన్ మూవీ 540 కోట్ల వ‌ర‌కు నెట్ క‌లెక్ష‌న్స్ రాబ‌ట్టాయి. యానిమ‌ల్ మూవీ 553 కోట్ల వ‌ర‌కు నెట్ క‌లెక్ష‌న్స్ ద‌క్కించుకున్న‌ది. జ‌వాన్, ప‌ఠాన్ తో పాటు ప్ర‌భాస్ స‌లార్‌ సినిమాల బ‌డ్జెట్ మూడు వంద‌ల కోట్ల‌కుపైనే కావ‌డం గ‌మ‌నార్హం.

పెట్టిన పెట్టుబ‌డికి డ‌బుల్ కూడా ఆ సినిమాలు క‌లెక్ష‌న్స్ రాబ‌ట్ట‌లేక‌పోయాయి. కానీ యానిమ‌ల్ మూవీ బ‌డ్జెట్ వంద కోట్లు కూడా నెట్ క‌లెక్ష‌న్స్ మాత్రం 553 కోట్లు వ‌చ్చాయి. పెట్టిన పెట్టుబ‌డికి ఐదింత‌ల లాభాల‌ను యానిమ‌ల్ తెచ్చిపెట్టింది. 2023లో ప్రాఫిట్స్ ప‌రంగా యానిమ‌ల్ ఫ‌స్ట్ ప్లేస్‌లో నిలిచిన‌ట్లు ట్రేడ్ వ‌ర్గాలు చెబుతోన్నాయి.

హై ఇంటెన్స్ డ్రామా...

తండ్రీ కొడుకుల క‌థ‌తో హై ఇంటెన్స్ యాక్ష‌న్ డ్రామాగా యానిమ‌ల్ మూవీని సందీప్ వంగా తెర‌కెక్కించాడు. ఈ సినిమాలో ర‌ణ్‌బీర్ న‌ట‌న‌కు ప్ర‌శంస‌లు ద‌క్కాయి. తండ్రి బ‌ల్బీర్ సింగ్ (అనిల్ క‌పూర్‌) అంటే ర‌ణ్ విజ‌య్‌కి (ర‌ణ్‌బీర్‌క‌పూర్‌) అమిత‌మైన ప్రేమ‌. కానీ వ్యాపార ప‌నుల్లో ప‌డి కొడుకును స‌రిగా ప‌ట్టించుకోడు బ‌ల్బీర్ సింగ్‌. తండ్రిపై హ‌త్యాప్ర‌య‌త్నం జ‌రిగింద‌ని తెలిసి ర‌ణ్ విజ‌య్ ఎలా రియాక్ట్ అయ్యాడు. శ‌త్రువుల్ని ఎలా మ‌ట్టుపెట్టాడు అన్న‌ది యానిమ‌ల్ మూవీ క‌థ‌.

యానిమ‌ల్ మూవీలో ర‌ష్మిక మంద‌న్న హీరోయిన్‌గా న‌టించింది. ర‌ణ్‌బీర్‌క‌పూర్ తండ్రిగా అనిల్ క‌పూర్ న‌టించ‌గా బాబీ డియోల్ విల‌న్ రోల్‌లో న‌టించాడు. యానిమ‌ల్ మూవీ జ‌న‌వ‌రి 26న నెట్‌ఫ్లిక్స్ ద్వారా ఓటీటీ ప్రేక్ష‌కుల ముందుకు రాబోతోంది. టీ సీరిస్‌తో క‌లిసి సందీప్ వంగా సోద‌రుడు ప్ర‌ణ‌య్ వంగా యానిమ‌ల్ మూవీని నిర్మించాడు.