Ram Pothineni: పసి పిల్లాడికి రామ్ పోతినేని సినిమా టైటిల్.. ఏ మూవీనో తెలుసా?

సినీ హీరోల అభిమానులు ఎప్పుడు ఎలా ప్రవర్తిస్తుంటారో అస్సలు ఊహించలేం. ఫ్యాన్స్ వార్‍తో గొడవలు పెట్టుకోవడమే కాకుండా ప్రాణాలు కోల్పోయిన సందర్భాలు ఉన్నాయి. ఇటీవలే తన హీరోను తక్కువ చేసి మాట్లాడాడని మరో కథానాయకుడి అభిమాని చంపేశాడు ఓ ఫ్యాన్. ఇక అభిమాన హీరోల సినిమాల విడుదల, రీ రిలీజ్ సమయంలో వాళ్లు చేసే గోల, రచ్చ అంతా ఇంతా కాదు. ఇవన్నీ వారి ప్రేమకు, అభిమానానికి ఉదాహరణలు. తాజాగా రామ్ పోతినేని అభిమాని సినిమా టైటిల్‍ను తన కొడుకుకు నామకరణం చేసి ఆశ్చర్యపరిచాడు.

మొన్నటివరకు లవర్ బాయ్ క్యారెక్టర్స్ చేసిన రామ్ పోతినేని ఇస్మార్ట్ శంకర్ మూవీతో ఫుల్ యాక్షన్ హీరోగా పేరు తెచ్చుకున్నాడు. ఈ సినిమా మంచి హిట్ కొట్టగా.. తర్వాత వచ్చిన ది వారియర్ మూవీ ఘోరంగా డిజాస్టర్ అయి కూర్చుంది. ఇప్పుడు మాస్ డైరెక్టర్ బోయపాటి శ్రీను (Boyapati Srinu) దర్శకత్వంలో రామ్ హీరోగా చేసిన సినిమా స్కంద (Skanda Movie). ఈ సినిమా పేరునే రామ్ అభిమాని తన కుమారుడికి పేరుగా నామకరణం చేశాడు.

హీరో రామ్ పోతినేని అభిమాని అయి హరిహర కొడుకు నామకరణ మహోత్సవానికి వెళ్లాడు ఫ్యాన్స్ అసోసియేషన్‍కు చెందిన సందీప్. అక్కడ హరిహర తన కొడుక్కి స్కంద అని రామ్ పోతినేని మూవీ టైటిల్‍ను పేరుగా పెట్టాడని సందీప్ ట్వీట్ చేశాడు. దీంతో ఈ ట్వీట్ తెగ వైరల్ అయింది. ఎంతలా అంటే.. ఆ ట్వీట్ రామ్ పోతినేని వరకూ చేరింది. దీంతో రామ్ పోతినేని ఆ ట్వీటుకు రియాక్ట్ అయ్యాడు. "ఈ విషయం నా మనసుకు హత్తుకుంది. ఆ పిల్లాడికి స్కంద దేవుడి ఆశీర్వాదాలు ఎప్పుడూ ఉంటాయి. ఆ అభిమానికి, అతడి కుటుంబాన్ని దేవుడు చల్లగా చూడాలని కోరుకుంటున్నాను" అని రామ్ రీట్వీట్ చేశాడు.

ఇదిలా ఉంటే స్కంద అనేది శివుడి కుమారుడు సుబ్రమణ్య స్వామి దేవుడి పేరు. అందుకే హరిహర తన కొడుక్కి స్కంద అని పేరు పెట్టినట్లు తెలుస్తోంది. కాగా రామ్ పోతినేని స్కంద సినిమా సెప్టెంబర్ 28న విడుదలకు సిద్ధంగా ఉంది. ఇందులో డ్యాన్సింగ్ బ్యూటి శ్రీలీల హీరోయిన్‍గా చేస్తుంది. ప్రిన్స్ సిసిల్ విలన్ రోల్ చేస్తున్నాడు. ఇక రామ్ ప్రస్తుతం డబుల్ ఇస్మార్ట్ మూవీతో బిజీగా ఉన్నాడు.