Ram Charan Vasisth Mallidi Movie: బింబిసార డైరెక్ట‌ర్‌తో రామ్‌చ‌ర‌ణ్ పీరియాడిక‌ల్ మూవీ

Ram Charan Vasisth Mallidi Movie: బింబిసార ద‌ర్శ‌కుడు వ‌శిష్ట్ మ‌ల్లిడి తెలుగులో ల‌క్కీ ఛాన్స్ అందుకున్న‌ట్లు స‌మాచారం. త‌న‌ త‌దుప‌రి సినిమాను అత‌డు రామ్‌చ‌ర‌ణ్‌తో చేయ‌బోతున్న‌ట్లు వార్త‌లు వినిపిస్తున్నాయి. బింబిసార సినిమాతో ద‌ర్శ‌కుడిగా తొలి ప్ర‌య‌త్నంలోనే భారీ క‌మ‌ర్షియ‌ల్ హిట్‌ను అందుకున్నాడు వ‌శిష్ట్ మ‌ల్లిడి. క‌ళ్యాణ్ రామ్ హీరోగా సోషియా ఫాంట‌సీ డ్రామాగా రూపొందిన ఈ సినిమా బాక్సాఫీస్ వ‌ద్ద 70 కోట్ల‌కుపైగా క‌లెక్ష‌న్స్ రాబ‌ట్టింది. క‌ళ్యాణ్ రామ్ కెరీర్‌లో బిగ్గెస్ట్ హిట్‌గా నిలిచింది.

ఐద‌వ శ‌తాబ్దం నాటి కాలానికి చెందిన బింబిసారుడ‌నే చ‌క్ర‌వ‌ర్తి జీవితాన్ని 21వ శ‌తాబ్దంతో ముడిపెడుతూ స్క్రీన్‌ప్లే మ్యాజిక్‌తో ప్రేక్ష‌కుల్ని మెప్పించాడు వ‌శిష్ట్ మ‌ల్లిడి. ఫ‌స్ట్ సినిమాతోనే హిస్టారిక‌ల్ క‌థాంశాన్ని ఎలాంటి త‌డ‌బాటు లేకుండా అనుభ‌వ‌మున్న డైరెక్ట‌ర్‌లా వెండితెర‌పై ఆవిష్క‌రించి విమ‌ర్శ‌కుల ప్ర‌శంస‌ల్ని అందుకున్నాడు. బింబిసార సినిమాకు సీక్వెల్ రానుంది.

అయితే ఈ సీక్వెల్‌కు ముందు వ‌శిష్ట్ మ‌ల్లిడి స్టార్ హీరో రామ్‌చ‌ర‌ణ్‌తో ఓ సినిమా చేయ‌బోతున్న‌ట్లు ప్ర‌చారం జ‌రుగుతోంది. బింబిసార త‌ర‌హాలోనే హిస్టారిక‌ల్ యాక్ష‌న్ డ్రామాగా ఈ సినిమా రూపొంద‌నున్న‌ట్లు స‌మాచారం. ఇటీవ‌లే రామ్‌చ‌ర‌ణ్‌ను క‌లిసిన ద‌ర్శ‌కుడు వ‌శిష్ట్ మ‌ల్లిడి ఆయ‌న‌కు పాయింట్ వినిపించిన‌ట్లు చెబుతున్నారు. ద‌ర్శ‌కుడు చెప్పిన లైన్ ప‌ట్ల రామ్‌చ‌ర‌ణ్ ఇంప్రెస్ అయిన‌ట్లు స‌మాచారం.

ప్ర‌స్తుతం ఈ సినిమాకు సంబంధించిన డిస్క‌ష‌న్స్ జ‌రుగుతున్న‌ట్లు వార్త‌లు వినిపిస్తున్నాయి. ఆర్ఆర్ఆర్ స‌క్సెస్ త‌ర్వాత‌ ద‌ర్శ‌కుడు శంక‌ర్‌తో ఓ సినిమా చేస్తున్నాడు రామ్‌చ‌ర‌ణ్‌. పొలిటిక‌ల్ యాక్ష‌న్ ఎంట‌ర్‌టైన‌ర్‌గా రూపొందుతోన్న ఈ సినిమా షూటింగ్ జ‌రుగుతోంది.

ఈ పాన్ ఇండియ‌న్ సినిమా పూర్త‌యిన త‌ర్వాతే రామ్‌చ‌ర‌ణ్‌, వ‌శిష్ట్ మ‌ల్లిడి సినిమా సెట్స్‌పైకి వ‌చ్చే అవ‌కాశం ఉంద‌ని అంటున్నారు. కాగా శంక‌ర్ సినిమాలో రామ్‌చ‌ర‌ణ్ డ్యూయ‌ల్‌రోల్‌లో క‌నిపించ‌బోతున్న‌ట్లు ప్ర‌చారం జ‌రుగుతోంది. దిల్‌రాజు నిర్మిస్తోన్న ఈ సినిమాలో కియారా అద్వాణీ హీరోయిన్‌గా న‌టిస్తోంది.