Salaar | సలార్ రూమర్లపై ప్రశాంత్ నీల్ క్లారిటీ.. ఆ చిత్రంతో సంబంధం లేదని వెల్లడి

రాధేశ్యామ్ తర్వాత ప్రభాస్ నటిస్తోన్న చిత్రం సలార్. ఈ సినిమాను కేజీఎఫ్ ఫేమ్ ప్రశాంత్ నీల్ తెరెక్కిస్తున్నారు. ఇప్పటికే ఈ చిత్రానికి సంబంధించిన ఫస్ట్ లుక్ ఆకట్టుకుంటోంది. అయితే గత కొన్ని రోజుల నుంచి సలార్ చిత్రంపై పలు రకాల ఊహాగానాలు వినిపిస్తున్నాయి. ఈ చిత్రం కేజీఎఫ్ సినిమాకు కొనసాగింపుగా రానుందని, ఇది ప్రశాంత్ నీల్ మొదటి చిత్రం ఉగ్రమ్‌కు రీమేక్‌గా తెరకెక్కనుందని పలు వార్తలు సామాజిక మాధ్యమాల్లో హల్‌చల్ చేస్తున్నాయి. తాజాగా ఈ రూమర్లపై క్లారిటీనిచ్చారు డైరెక్టర్ ప్రశాంత్ నీల్. సలార్ మాత్రం సరికొత్త కథ అని.. మిగిలిన సినిమాలతో దీనికి ఎలాంటి పోలిక లేదని రూమర్లన్నింటికీ చెక్ పెట్టారు.

నేను తెరకెక్కించిన చిత్రాలన్నింటిలోనూ నా మొదటి సినిమా ఉగ్రమ్‌తో కొన్ని పోలికలు ఉంటాయి. కానీ సలార్ మాత్రం చాలా ఫ్రెష్ స్టోరీ. ఇది ఉగ్రమ్‌కు రీమేక్ కాదు.. అలాగే ఈ సినిమాతో ఎలాంటి పోలిక లేదు. అని దర్శకుడు ప్రశాంత్ నీల్ స్పష్టం చేశారు. అంతేకాకుండా సలార్ చిత్రం ఏ ఫ్రాంచైజికి సంబంధించింది కాదని తెలిపారు. ప్రస్తుతం ప్రశాంత్ కేజీఎఫ్ ఛాప్టర్ 2 విడుదల పనుల్లో బిజీగా ఉన్నారు. ఈ సినిమా ఏప్రిల్ 14న ప్రేక్షకుల ముందుకు రానుంది.

ఈ సినిమాలో ప్రభాస్ డైనమిక్ పాత్రను పోషించనున్నారు. శృతిహాసన్ కథానాయిక. ఇప్పటికే ఈ హీరోయిన్ ఫస్ట్ లుక్ కూడా విడుదల చేసింది చిత్రబృందం. సలార్ చిత్రం కోసం ప్రభాస్ తన గెటప్‌ను పూర్తిగా మార్చారు. రఫ్ అండ్ మాస్ లుక్‌లో కనిపించేందుకు అవసరమైన కసరత్తులు చేస్తున్నారు. ఇప్పటికే ఈ సినిమా 30 శాతం షూటింగ్ పూర్తయిందని సమాచారం.

ప్రస్తుతం ప్రభాస్ సలార్‌తో పాటు ఆదిపురుష్ అనే చిత్రంలోనూ నటిస్తున్నారు. అంతేకాకుండా వినోద చిత్రాల దర్శకుడు మారుతీతో పనిచేసేందుకు ఓ చిత్రానికి పచ్చ జెండా ఉపారు. పాన్ఇండియా హీరోగా గుర్తింపు తెచ్చుకున్న మన డార్లింగ్ వద్దకు మరికొన్ని క్రేజీ ప్రాజెక్టులు కూడా లైన్లో ఉన్నాయి.