pawan kalyan: మేనల్లుడితో పవన్ సినిమా ఎప్పుడు మొదలుకానుందంటే...

భీమ్లానాయ‌క్ త‌ర్వాత కొత్త సినిమాల్ని అంగీక‌రించే విష‌యంలో ఆచితూచి అడుగులు వేస్తున్నారు ప‌వ‌న్ క‌ళ్యాణ్‌. ఏపీ ఎల‌క్ష‌న్స్ దృష్టిలో పెట్టుకొని ప‌వ‌న్ క‌ళ్యాణ్ కొన్నాళ్లు సినిమాల‌కు దూరంగా ఉండ‌బోతున్న‌ట్లు వార్త‌లు వినిపించాయి. కానీ ఈ రూమ‌ర్స్‌కు చెక్ పెడుతూ మేన‌ల్లుడు సాయిధ‌ర‌మ్‌తేజ్‌తో క‌లిసి ఓ సినిమా చేయ‌డానికి అంగీక‌రించారు ప‌వ‌న్‌క‌ళ్యాణ్‌. త‌మిళంలో ప్రేక్ష‌కుల మ‌న్న‌న‌ల్ని అందుకున్న వినోధయ సీతమ్ చిత్రానికి రీమేక్‌గా ఈ మామాఅల్లుళ్ల సినిమా తెర‌కెక్కుతోంది. త‌మిళ మాతృక‌కు ద‌ర్శ‌క‌త్వం వ‌హించిన స‌ముద్ర‌ఖ‌ని తెలుగు వెర్ష‌న్ ను తెర‌కెక్కించే బాధ్య‌త‌ల్ని తీసుకున్నారు.

హ‌ఠాన్మ‌ర‌ణం చెందిన ఓ యువ‌కుడు దేవుడు అనుగ్ర‌హంతో తిరిగి జీవితాన్ని పొంది త‌న బాధ్య‌త‌ల్ని ఎలా నెర‌వేర్చాడ‌నే పాయింట్‌తో ఫాంటసీ డ్రామాగా ఈ చిత్రాన్ని తెరకెక్కిస్తున్నారు. ఇందులో దేవుడి పాత్ర‌లో ప‌వ‌న్ క‌ళ్యాణ్ క‌నిపించ‌బోతున్నారు. భ‌క్తుడిగా సాయిధ‌ర‌మ్‌తేజ్ న‌టిస్తున్నారు. ఇటీవ‌ల ఈ సినిమా పూజా కార్య‌క్ర‌మాల‌ను నిర్వ‌హించారు. ఇందులో ప‌వ‌న్‌క‌ళ్యాణ్‌తో పాటు సాయిధ‌ర‌మ్‌తేజ్ పాల్గొన్నారు. ఈ నెల 12న ఈ సినిమా రెగ్యుల‌ర్ షూటింగ్ ను ప్రారంభించ‌బోతున్న‌ట్లు స‌మాచారం. తొలి షెడ్యూల్‌లో సాయిధ‌ర‌మ్‌తేజ్ పై కీల‌క స‌న్నివేశాల‌ను చిత్రీక‌రించేందుకు ద‌ర్శ‌కుడు స‌ముద్ర‌ఖ‌ని స‌న్నాహాలు చేస్తున్న‌ట్లు తెలిసింది.

ఈ నెలాఖ‌రు నుండి ప‌వ‌న్ క‌ళ్యాణ్ షూటింగ్‌లో భాగం కాబోతున్న‌ట్లు స‌మాచారం. ఆగ‌స్ట్ నెలలో అత‌డి షూటింగ్ పార్ట్ పూర్త‌వుతుంద‌ని అంటున్నారు. ఈ సినిమా కోసం ప‌వ‌న్ కేవ‌లం ఇర‌వై రోజులు మాత్ర‌మే డేట్స్ కేటాయించిన‌ట్లు వార్త‌లు వినిపిస్తున్నాయి. ఇందుకోసం యాభైకోట్ల వ‌ర‌కు పారితోషికాన్ని డిమాండ్ చేసిన‌ట్లు స‌మాచారం. ఈ సినిమాలో కేతికా శ‌ర్మ హీరోయిన్‌గా న‌టిస్తోంది.