Pawan Kalyan: ఉస్తాద్ భగత్‍సింగ్ షూటింగ్‍లో జాయిన్ అయిన పవర్‌స్టార్.. పవర్ ప్యాక్డ్ సీన్స్ అంటూ..

Pawan Kalyan: పవర్ స్టార్ పవన్ కల్యాణ్ ప్రస్తుతం చాలా బిజీగా ఉన్నారు. ఓవైపు తన రాజకీయ పార్టీ జనసేన కార్యక్రమాలు జోరుగా చేస్తూనే.. మరోవైపు సినిమాలను కూడా చేస్తున్నారు. ప్రస్తుతం ఓజీ, ఉస్తాద్ భగత్‍సింగ్ చిత్రాలను పూర్తి చేయాలని పవన్ ప్రాధాన్యతగా పెట్టుకున్నారు. వీటి తర్వాత హరిహర వీరమల్లు మిగిలిన షూటింగ్ చేయాలని ఆయన భావిస్తున్నారు. ఈ నేపథ్యంలో ఉస్తాద్ భగత్ సింగ్ మూవీ షూటింగ్‍లో జాయిన్ అయ్యారు పవన్. హరీశ్ శంకర్ ఈ యాక్షన్ ఎంటర్‌టైనర్‌కు దర్శకత్వం వహిస్తున్నారు. ఈ చిత్ర షూటింగ్ గురించి మూవీ యూనిట్ అధికారికంగా అప్‍డేట్ ఇచ్చింది.

ఉస్తాద్ భగత్ సింగ్ సెట్స్‌లో పవన్ కల్యాణ్ జాయిన్ అయ్యారని, భారీ షెడ్యూల్ ప్లాన్ పూర్తి చేయనున్నట్టు ఈ చిత్రాన్ని నిర్మిస్తున్న మైత్రీ మూవీ మేకర్స్ నేడు (సెప్టెంబర్ 7) ట్వీట్ చేసింది. ఓ పోస్టర్‌ను కూడా ట్వీట్ చేసింది. “ఉస్తాద్ మళ్లీ యాక్షన్‍లోకి వచ్చేశారు. భారీ షెడ్యూల్ కోసం ఉస్తాద్ భగత్ సింగ్ సెట్స్‌లో పవన్ కల్యాణ్ జాయిన్ అయ్యారు. కొన్ని పవర్ ప్యాక్డ్ సీన్లను షూట్ చేస్తున్నాం” అని మైత్రీ మూవీ మేకర్స్ ట్వీట్ చేసింది.

ఉస్తాత్ భగత్ సింగ్ చిత్రంలో పవన్ సరసన శ్రీలీల హీరోయిన్‍గా నటిస్తోంది. ఈ చిత్రంలో మరోసారి పోలీస్‍గా కనిపించనున్నారు పవన్. ఇప్పటికే వచ్చిన ఫస్ట్ గ్లింప్స్ మంచి స్పందన దక్కించుకుంది. యాంగ్రీ పోలీస్ ఆఫీసర్‌గా పవన్ సూపర్‌గా కనిపించారు. గబ్బర్ సింగ్ తర్వాత పవన్ కల్యాణ్ - డైరెక్టర్ హరీశ్ శంకర్ కాంబో వస్తున్న చిత్రం కావటంతో ఉస్తాత్ భగత్ సింగ్‍పై చాలా ఆసక్తి నెలకొంది. ఈ చిత్రంలో పంచ్ డైలాగ్‍లను గట్టిగానే ప్లాన్ చేశారట హరీశ్ శంకర్.

మైత్రీ మూవీ మేకర్స్ పతాకంపై నవీన్ యెర్నేని, రవిశంకర్ నిర్మిస్తున్న ఉస్తాద్ భగత్‍సింగ్ చిత్రానికి దేవీ శ్రీ ప్రసాద్ సంగీతం అందిస్తున్నారు. అయనంక బోస్ సినిమాటోగ్రాఫర్‌గా ఉండగా.. చోకా కే ప్రసాద్ ఎడిటింగ్ బాధ్యతలు నిర్వహిస్తున్నారు. ఈ సినిమాను వచ్చే ఏడాది సంక్రాంతికి తీసుకురావాలని మేకర్స్ ప్లాన్ చేస్తున్నట్టు తెలుస్తోంది.

సుజీత్ దర్శకత్వంలో పవన్ కల్యాణ్ నటిస్తున్న ఓజీ చిత్రం నుంచి ఇటీవలే హంగ్రీ చీతా గ్లింప్స్ వచ్చింది. హైవోల్టేజ్ యాక్షన్ సీన్లతో ఈ గ్లింప్స్ అదిరిపోయింది. 24 గంటల్లో అత్యధిక లైక్స్ దక్కించుకున్న టాలీవుడ్ గ్లింప్స్‌గా రికార్డు సృష్టించింది. ఓజీ సినిమా షూటింగ్ కూడా ఇంకా 40 శాతం వరకు పెండింగ్ ఉన్నట్టు తెలుస్తోంది. మరి, పవన్ కల్యాణ్ ముందుగా ఉస్తాద్ భగత్ సింగ్, ఓజీల్లో దేని షూటింగ్‍ను పూర్తి చేస్తారో చూడాలి.