OTT Web Series: సూపర్ హిట్ మ్యూజికల్ డ్రామా వెబ్ సిరీస్ రెండో సీజన్ వచ్చేస్తోంది.. తెలుగులోనూ స్ట్రీమింగ్

OTT Web Series: మ్యూజిక్ లవర్స్ కు గుడ్ న్యూస్. ప్రైమ్ వీడియోలో నాలుగేళ్ల కిందట వచ్చి సూపర్ హిట్ అయిన మ్యూజికల్ డ్రామా బందిష్ బాండిట్స్ (Bandish Bandits) వెబ్ సిరీస్ రెండో సీజన్ స్ట్రీమింగ్ తేదీని అనౌన్స్ చేశారు. ఈ కొత్త సీజన్ డిసెంబర్ 13 నుంచి స్ట్రీమింగ్ కానున్నట్లు వెల్లడించారు. అంటే సరిగ్గా మరో నెల రోజుల్లో మరో ఎమోషనల్ మ్యూజికల్ జర్నీకి సిద్ధంగా ఉండండి.

బందిష్ బాండిట్స్ రెండో సీజన్

ఓటీటీల్లో పెద్దగా అంచనాలు లేకుండా వచ్చి ప్రేక్షకుల ఆదరణ పొందిన వెబ్ సిరీస్ లలో ఒకటి బందిష్ బాండిట్స్. రిత్విక్ భౌమిక్, శ్రేయా చౌదరి, షీబా చద్దా, అతుల్ కులకర్ణి, రాజేస్ తైలాంగ్ లాంటి వాళ్లు నటించిన ఈ సిరీస్ తొలి సీజన్ 2020లో వచ్చి మ్యూజిక్ లవర్స్ ను ఉర్రూతలూగించింది. ప్రేమ, సంగీత వారసత్వం మధ్య నలిగిపోయే ఓ కుర్రాడి చుట్టూ తిరిగే ఓ ఎమోషనల్ స్టోరీయే ఈ బందిష్ బాండిట్స్. రాధే (రిత్విక్), తమన్నా (శ్రేయా చౌదరి) లవ్ స్టోరీ ఇప్పుడు రెండో సీజన్ లోనూ కొనసాగనుంది.

ఇండియన్ క్లాసికల్ మ్యూజిక్, వెస్టర్న్ మ్యూజిక్.. ఇలా రెండు వేర్వేరు సంగీత ప్రపంచాలకు చెందిన వీళ్ల మధ్య ప్రేమ, దాని తాలూకు సంఘర్షణతో తొలి సీజన్ ఎంతో ఆసక్తిగా సాగింది. సంగీత్ సామ్రాట్ గా రిత్విక్ మారడం, తమన్నా ఓ ఆర్టిస్ట్ గా ఎదగడానికి కావాల్సిన నైపుణ్యాలను సాధించుకోవడానికి తన సొంత ప్రయాణాన్ని మొదలు పెట్టడంతో తొలి సీజన్ ముగిసింది. ఇప్పుడు రెండో సీజన్ వీళ్ల ప్రేమ కథను, వాళ్ల మ్యూజికల్ జర్నీని ఎక్కడికి తీసుకెళ్తుందన్న ఆసక్తి ప్రేక్షకుల్లో నెలకొంది. దీనికి సమాధానం మరో నెల రోజుల్లో అంటే డిసెంబర్ 13న తెలియనుంది.

బందిష్ బాండిట్స్ సీజన్ 2 స్టోరీ ఇదే

ఇండియన్ క్లాసికల్ మ్యూజిక్ ను మించింది లేదని భావించే కుటుంబం ఓ వైపు.. వెస్టర్న్ రాక్ అండ్ పాప్ మ్యూజిక్ కూడా తక్కువేమీ కాదని వాదించే అమ్మాయి మరోవైపు.. బందిష్ బాండిట్స్ తొలి సీజన్ మొత్తం వీటి చుట్టే తిరుగుతుంది. ఘనమైన తమ వంశ వారసత్వాన్ని కొనసాగించాలన్న ఒత్తిడిలో ఉండే రాధే అనే కుర్రాడు.. చివరికి తన ప్రేమను ఎలా కోల్పోయాడు.. అతన్ని ప్రేమించిన అమ్మాయి అతని ద్వారానే స్ఫూర్తి పొంది తన సొంత సంగీత ప్రయణాన్ని ఎలా ప్రారంభించింది అన్నది తొలి సీజన్ లో చూడొచ్చు.

రెండో సీజన్ దానికి కొనసాగింపుగా ఉండబోతోంది. సంగీత్ సామ్రాట్ రాధే క్లాసికల్ మ్యూజిక్.. తమన్నా ఆధునిక రాక్ అండ్ పాప్ మ్యూజిక్ మధ్య పోటీని ఈ రెండో సీజన్ లో చూపించబోతున్నారు. ఈ కొత్త సీజన్లోనూ తొలి సీజన్ లోని పాత్రలే తిరిగి రానున్నాయి. ఆ సీజన్లో నటించిన అందరు నటీనటులు ఇందులోనూ కనిపించబోతున్నారు. మరి కొత్త మ్యూజికల్ జర్నీని చూడటానికి సిద్ధంగా ఉండండి. బందిష్ బాండిట్స్ రెండో సీజన్ డిసెంబర్ 13 నుంచి అమెజాన్ ప్రైమ్ వీడియోలో స్ట్రీమింగ్ అవుతుంది.