OG Movie Release Date: పవన్ కల్యాణ్ ‘ఓజీ’ సినిమా రిలీజ్ డేట్ ఇదే!

OG Movie Release Date: పవర్ స్టార్ పవన్ కల్యాణ్ నటించిన ఓజీ సినిమా కోసం ప్రేక్షకులు చాలా ఆసక్తిగా ఎదురుచూస్తున్నారు. ఈ మూవీలో వైలెంట్ గ్యాంగ్‍స్టర్‌ రోల్‍ను పవన్ చేస్తుండటంతో అంచనాలు భారీ స్థాయిలో ఉన్నాయి. సాహో ఫేమ్ డైరెక్టర్ సుజిత్.. ఎపిక్ యాక్షన్ థ్రిల్లర్‌గా ఓజీని రూపొందిస్తున్నారు. గ్లింప్స్ తర్వాత ఈ చిత్రంపై అంచనాలు హైప్ ఆకాశానికి చేరింది. అయితే, షూటింగ్ ఆలస్యమవుతుండటంతో ఓజీ ఎప్పుడు రిలీజ్ అవుతుందా అనే ఉత్కంఠ నెలకొని ఉంది.

ఆంధ్రప్రదేశ్ రాజకీయాల్లో పవన్ కల్యాణ్ బిజీగా ఉండటంతో ఓజీ షూటింగ్ ఆలస్యమవుతూ వస్తోంది. ఇంకా సుమారు 30 శాతం వరకు చిత్రీకరణ మిగిలి ఉందని తెలుస్తోంది. ఈ తరుణంలో తాజాగా ఈ మూవీ రిలీజ్ డేట్‍పై మేకర్స్ ఓ నిర్ణయానికి వచ్చారని తెలుస్తోంది.

ఓజీ మూవీని ఈ ఏడాది సెప్టెంబర్ 27వ తేదీన రిలీజ్ చేయాలని మేకర్స్ డిసైడ్ అయ్యారని సమాచారం. అప్పటికల్లా ఈ సినిమా పూర్తిగా సిద్ధమవుతుందని టీమ్ అంచనా వేస్తోంది.ఈ విషయంపై త్వరలోనే ప్రకటన వచ్చే అవకాశం ఉందని తెలుస్తోంది.

‘అత్తారింటికి దారేది’ తేదీనే..

త్రివిక్రమ్ శ్రీనివాస్ దర్శకత్వంలో పవన్ కల్యాణ్ హీరోగా నటించిన ‘అత్తారింటికి దారేది’ సినిమా 2013లో సెప్టెంబర్ 27వ తేదీనే విడుదలైంది. అప్పట్లో ఆ సినిమా ఇండస్ట్రీ రికార్డులను బద్దలుకొట్టింది. భారీ బ్లాక్‍బాస్టర్ అయింది. దీంతో అదే సెంటిమెంట్‍తో ఈ ఏడాది 2024 సెప్టెంబర్ 27న ఓజీని రిలీజ్ చేయాలని మేకర్స్ నిర్ణయించినట్టు తెలుస్తోంది.

ఆంధ్రప్రదేశ్‍ శాసనసభ ఎన్నికలు ఏప్రిల్‍లో ముగిసే అవకాశాలు ఉన్నాయి. ఎలక్షన్ హడావుడి అయ్యాక మే తర్వాత ఓజీ షూటింగ్‍లో పవన్ కల్యాణ్ పాల్గొంటారని అంచనాలు ఉన్నాయి.

1950ల బ్యాక్‍డ్రాప్‍లో ముంబైలో గ్యాంగ్‍స్టర్స్ యాక్షన్ డ్రామా ‘ఓజీ’ మూవీ ఉండనుందని తెలుస్తోంది. ఈ చిత్రంలో పవర్ ఫుల్ గ్యాంగ్‍స్టర్‌గా పవన్ కనిపించనున్నారు. గ్లింప్స్‌లో పవన్ యాక్షన్, స్వాగ్, స్టైల్ అభిమానులను విపరీతంగా ఆకట్టుకున్నాయి. పాన్ ఇండియా రేంజ్‍లో ఈ చిత్రం రానుంది. తెలుగుతో పాటు హిందీ, తమిళం, మలయాళం, కన్నడ భాషల్లోనూ ఈ చిత్రం రిలీజ్ కానుంది.

ఓజీ మూవీలో పవన్ సరసన ప్రియాంక అరుల్ మోహన్ హీరోయిన్‍గా నటిస్తున్నారు. బాలీవుడ్ స్టార్ ఇమ్రాన్ హష్మి విలన్‍ పాత్ర పోషిస్తున్నారు. అర్జున్ దాస్, ప్రసాఖ్ రాజ్, శ్రీయారెడ్డి, హరిశ్ ఉత్తమన్, అభిమన్యు సింగ్ కీరోల్స్ చేస్తున్నారు. థమన్ ఈ మూవీకి సంగీతం అందిస్తున్నారు. డీవీవీ ఎంటర్‌టైన్‍మెంట్స్ బ్యానర్‌పై డీవీవీ దానయ్య ఈ మూవీని నిర్మిస్తున్నారు. భారీ బడ్జెట్‍తో ఈ చిత్రం రూపొందుతోంది.

ఆలస్యమవుతుండటంతో ఓజీ చిత్రం చేతులు మారనుందంటూ ఇటీవల రూమర్లు వచ్చాయి. డీవీవీ ఎంటర్‌టైన్‍మెంట్స్ నుంచి పీపుల్ మీడియా ఫ్యాక్టరీకీ ఈ సినిమా వెళుతుందని ఊహాగానాలు వినిపించాయి. అయితే, దీనిపై డీవీవీ ఎంటర్‌టైన్‍మెంట్స్ క్లారిటీ ఇచ్చింది. ఓజీ మూవీ తమ వద్దే ఉంటుందని, పుకార్లు నమ్మొద్దంటూ సోషల్ మీడియాలో స్పష్టత ఇచ్చింది. పవన్ కల్యాణ్‍కు తాను ఎప్పుడు కృతజ్ఞతతో ఉంటామని తెలిపింది.